Ndaniyele 6:1-28
6 Ndaliu asoko ati ndyinake ovalume 120 valinge ovanene vovilongo mouhamba auho.+
2 Anake ovalume vetatu valinge ovaluliki vatyo, umwe o Ndaniyele;+ Ovanene vovilongo+ ovo vapopila ovipuka, opo ohamba yahapeseke komalumono ayo.
3 Ndaniyele walingile vali nawa otyilinga tyae, tyipona novanene vatyo vovilongo, mokonda mwe mwali omphepo imwe onene,+ ohamba pahe aihande imupe otyilinga otyinene vali motyilongo atyiho.
4 Pononthiki mbatyo opo, avai mokwoovola apa mavatendeleyila Ndaniyele movipuka viotyilongo,* mahi vetupu-ale apa vemukwatelele, okuvaka una kavake, mokonda wali omunthu uyumbwa onthumbi, wehena ondende, wehenale natyike avaka.
5 Ovalume ovo pahe avati: “Kamatuvasi otyipuka natyike tupondola okukwatela Ndaniyele, nkhwali twovola etyi tyiyemba kovitumino vya Huku yae.”+
6 Pahe, ovaluliki, novanene vatyo vovilongo, avelipake umwe kumwe avai kohamba avati: “Hamba Ndaliu, kala-ko apeho nomwenyo!
7 Ovaluliki aveho movilinga viohamba, ononkhalamutwe mbovatumini, novanene vovilongo, no vokupakaila-mo ohamba, novatumini, velipakaila-mo opo ohamba ipake-ko otyitumino tyiilika* tyiti mononthiki 30, omunthu ulikwambela kono huku hamwe o komunthu, ehelikwambela kwoove tatekulu ohamba, uyumbwa metoto liononkhulika.+
8 Pahe ove tatekulu hamba, honeka otyitumino opake-po otyilimbo,+ opo tyahapilululwe ngeetyi tyipopia ovitumino viova Mendia nova Pelesa viahapilululwa.”+
9 Ohamba Ndaliu apake otyilimbo kotyitumino otyo tyokwiilika.
10 Etyi Ndaniyele etyiiva okuti ohamba yetavela otyitumino otyo, aende mondywo yae ina onondyanena mbapilukila ko Selusalei.+ Aikila konongolo tutatu monthiki, otyo elikwambela ku Huku yae nokumuhilivika, ngeetyi mwene alinga-linga-le ononthiki ambuho.
11 Poola yatyo opo, ovalume vana avelityulukuta mondywo ya Ndaniyele, vemuvasa ulikwambela, wiita Huku yae emulinge onkhenda.
12 Ovalume ovo avakapopia nohamba, avemuhinangelesa otyitumino tyina ahoneka, avati: “Tatekulu hamba, kwapakele otyilimbo kotyitumino tyokwati, mononthiki 30, omunthu ulikwambela kono huku hamwe o komunthu, ehelikwambela kwoove tatekulu ohamba, uyumbwa metoto liononkhulika?” Ohamba aiti: “Otyitumino okotyili-ale, otyo tyipopia ovitumino viova Mendia nova Pelesa viahapilululwa.”+
13 Ohamba yati vala manee okupopia, aveipopila avati: “Ndaniyele umwe povikonde vyo ko Sundaa,+ kesukile-ale noove tatekulu hamba, nii kesukile notyitumino ove wahoneka, una ulikwambela tutatu monthiki.”+
14 Etyi ohamba yeiva onondaka ombo, pahe aitokota omutima, aihimbika okutala oñgeni mayovola Ndaniyele; atutumba umwe natyo atee ekumbi lianyingila.
15 Pahe, ovalume ovo avaende umwe aveho kohamba. Avapopila ohamba avati: “Tatekulu hamba, hinangela okuti, ngeetyi tyipopia ovitumino viova Mendia nova Pelesa, otyitumino tyahonekwa, hamwe otyipuka tyailikwa nohamba, katyipondola okupilululwa.”+
16 Ohamba aitumu Ndaniyele akapolwe, avekemupola, avemuyumbu metoto liononkhulika.+ Ohamba aipopila Ndaniyele aiti: “Huku yove, ou ove ulingila apeho, mekuyovola.”
17 Avaeta emanya, avelipate ketoto.* Ohamba aipake-ko otyilimbo nonela yayo yokupaka ovilimbo, nonela yomanene-atyo yokupaka ovilimbo, opo pahapilululwe natyike pu otyo tyalingwa Ndaniyele.
18 Ohamba ayeende no mombala yayo. Otyinthiki tyatyo otyo ahali natyike, ehetavela natyike ñgeno tyimutalula-vo,* nokulala ahalala.*
19 Tyina pahe kwaandyuluka umwe, apinduka-po, aende nokukanyauka ai no ketoto liononkhulika.
20 Etyi ehika ponthele petoto, aihana Ndaniyele tyasoya-soya vala. Ohamba aipulu Ndaniyele aiti: “Ndaniyele mupika wa Huku una omwenyo, okuti Huku yove ou ulingila apeho wetyivila okukuyovola kononkhulika?”
21 Kuna Ndaniyele apopila ohamba, ati: “Tatekulu hamba, kala-ko apeho nomwenyo!
22 Huku yange watuma oandyu yae, aipate omulungu wononkhulika,+ mbutupu etyi mbandinga,+ mokonda wetyimona okuti halingile natyike tyapenga; no kwoove hamba, ndyitupu etyi nalinga tyapenga.”
23 Ohamba aihambukwa unene, aitumu Ndaniyele apolwe metoto. Etyi Ndaniyele atunda metoto, nii utupu apa aliwa, mokonda wayumba onthumbi mu Huku yae.+
24 Pahe ohamba aitumu vakapole ovalume vana vatendeleyile* Ndaniyele, aveho novana vavo novakai vavo. Pokuyumbwa metoto liononkhulika, kavehikile-ale pohi, ononkhulika ambuvekwate ambuvetunyauna, ambukokota nomankhipa atyo.+
25 Ohamba Ndaliu ahonekela ovanthu vovilongo aviho, vomalaka aeho vakala kombanda yohi+ ati: “Ombembwa yenyi ilinge onene!
26 Ndyili nokupaka-ko otyitumino tyokuti, movilongo aviho ndyitumina, ovanthu vena okutila Huku ya Ndaniyele.+ Mokonda ngwe o Huku una omwenyo, ukala-ko apeho. Kutupu onthiki naike ouhamba wae maukahanywa-ko, outumini* wae utwala-twala-ko apeho.+
27 Ngwe uyovola,+ uhukulula, ulinga ovilekesa, nomaelema meulu no pohi,+ mokonda wayovola Ndaniyele komankhanya ononkhulika.”
28 Ndaniyele wali omunene mouhamba wa Ndaliu,+ no wa Silu omu Pelesa.+
Outoi
^ Melaka liokonthuko: “Viouhamba.”
^ Ine, “tyityilika.”
^ Melaka liokonthuko: “Komulungu wetoto.”
^ Ine hamwe, “kayaetelelwe omwiimbi nawike.”
^ Melaka liokonthuko: “Olumphoki ankho lumweenda nkholo.”
^ Ine, “vokwahungile.”
^ Ine, “ounene.”
