Okutunda 10:1-29
10 Siovaa atolela Mwisesi ati: “Enda ku Falaoo, nemuyeka nae novaundapi vae vateneke omitima opo ndyilinge omaelema+ oo otyo mwene atala,+
2 ove opopila ovana vove novatekula vove ononkhumbi namonesa ova Isitu, nomaelema nalinga pokati kavo.+ Ngootyo onwe mamunoñgonoka okuti ame, ame Siovaa.”
3 Ovo Mwisesi na Alau avaende ku Falaoo avemupopila okuti: “Siovaa Huku yova Hembeleu wati: ‘Atee-pi utwalako okunthesa onkhango, otyo wehetavela kwaame?+ Yeka ovanthu vange vaye vakafende kwaame.
4 Ove ine waanyena ñgoo ovanthu vange, muhuka mandyieta motyilongo tyove ovimphunia-mphunia.
5 Maviuumbu kombanda yohi, pohi apahamoneka. Mavili-po ovipuka aviho viahupa kongandavila, avili omiti aviho vikala mepia liove.+
6 Maviyula monondywo mbove, no monondywo mbovaundapi vove, no monondywo ambuho mbomo Isitu, mavikala ovimphunia-mphunia vimwe ovinyingi, ovoho, no voho-mbwale, vehenemone nkhele vatyitilwe.’”+ Etyi apopia ngootyo, pu Falaoo atundupo aende.
7 Ovaundapi va Falaoo avemupopila okuti: “Atee nalupi omulume ou matwalako okututilisa owoma?* Veyeka vende, vakafende Siovaa Huku yavo. Ove tatekulu kutyiete okuti o Isitu ikahi nokuhanyunwa?”
8 Ou Falaoo, aihana vali ovo Mwisesi na Alau evepopila okuti: “Endei, kafendei Siovaa Huku yenyi. Mahi ovalie mavaende?”
9 Mwisesi emukumbulula okuti: “Matwende novakwendye, nonombwale mbetu, novana vetu ovakwendye novakainthu, nonongi mbetu, nonongombe mbetu,+ tyeetyi matukalingila Siovaa otyipito.”+
10 Ngwe ati: “Ine nthiki imwe ndyimuyeka mwende novana venyi, opo nkhwali Siovaa una umwe onwe!+ Onwe muna etyi mwahanda okulinga tyapenga.
11 Ai katyitavela! Ovalume vala venda vakafende Siovaa, mokonda otyo mwaitile ngootyo.” Pahe avevetaata pu Falaoo.
12 Siovaa atolela Mwisesi okuti: “Tandaveka okuvoko kwove kombanda yeheke motyilongo tyo Isitu, wiihane ovimphunia-mphunia, viye motyilongo tyo Isitu avili-mo ovifo aviho, avili ovipuka aviho viahupa kongandavila.”
13 Mwisesi atandaveka otyimuti tyae motyilongo tyo Isitu, Siovaa aeta omphepo yatunda koutundilo motyilongo, otyitenya atyiho notyinthiki atyiho. Vakati vala ñgaa etyi kwatya, omphepo yaeta ovimphunia-mphunia.
14 Ovimphunia-mphunia aviya motyilongo tyo Isitu aviyandyana motyilongo atyiho.+ Ovihuna ovio avihanyauna ovipuka ovinyingi.+ Kakunekale ovimphunia-mphunia ovinyingi nga vina, tupu kavikakalako vali.
15 Ovimphunia-mphunia aviyula motyilongo atyiho, eheke aliho alinthikovela. Avili-po ovifo aviho novinyango aviho viomiti ankho viahupa kongandavila. Motyilongo atyiho tyo Isitu amwehesala natyike tyatalala nii omiti nii ovifo vyo momapia.
16 Falaoo aihana liwa-liwa ovo Mwisesi na Alau, eveti: “Nalinga onkhali ku Siovaa Huku yenyi, no kwoonwe.
17 Mbambavo, mpholeleipo-vo onkhali nalinga, ndingilei-vo elikwambelo ku Siovaa Huku yenyi, hamwe ndyiyovoka kovihuna evi viipaa ovanthu.”
18 Pahe ngwe* atundu pu Falaoo, akalinga elikwambelo ku Siovaa.+
19 Siovaa apilulula omphepo, ayeende no koutakelo omphepo imwe onene, ovimphunia-mphunia aivitahela Melunga Likuhuka. Amwehesala otyimphunia-mphunia natyike motyilongo tyo Isitu.
20 Mahi Siovaa ayeke Falaoo atene omutima,+ ahayeke ova Isilayeli vende.
21 Siovaa atolela Mwisesi ati: “Tandaveka okuvoko kwove no peulu, motyilongo tyo Isitu mamukala enthiki, epuputu limwe enene litavela okuliyama.”
22 Mwisesi wati vala tyiivee, atandaveka okuvoko no peulu, amukala epuputu limwe enene motyilongo tyo Isitu liakalele-ko ononthiki ononthatu.+
23 Avehelimono na vakwavo kombanda yenthiki enene, avakala ononthiki ononthatu tyahatundu apa veli, mahi ova Isilayeli aveho, oku vakala veli motyitei.+
24 Falaoo aihana Mwisesi etyi eya emutolela ati: “Endei, kafendei Siovaa.+ Mahi onongi mbenyi nonongombe mbenyi mbusala. Ovana venyi mupondola okwenda navo.”
25 Mwisesi ati: “Ove tatekulu, noove motwavela* ovipako opo tukalinge ovilikutila, noviawa viokuyokwa, atuviaavela Siovaa Huku yetu.+
26 Ovipako vietu matwende navio. Kamamusala otyinyama natyike* motyilongo muno, mokonda vimwe matukeviava opo tukafende Siovaa Huku yetu, nga twehika kuna atutale otyipi matwavela Siovaa.”
27 Siovaa ayeke Falaoo atene omutima ahayeke ovanthu vende.+
28 Falaoo ati: “Tunda ponthele yange! Weheye-aye vali muno, onthiki ndyikumona vali muno monkhi.”
29 Mwisesi emutolela okuti: “Mandyilingi ngeetyi wapopia tatekulu; muno himaliate-mo vali.”
Outoi
^ Melaka Liokonthuko: “Okukala eliva lietu.”
^ Mokutala o Mwisesi wapopiwa apa.
^ Ine, “motuyeke tutyinde.”
^ Melaka Liokonthuko: “Ekondyo nalike.”
