Okutunda 23:1-33
23 “Wahahahanese* omatutu.+ Wehelipake kumwe nondingavivi otendendeleya umwe omunthu okwahanda vala okumunyona.+
2 Wahalandule vala movanyingi, olingi otyivi; tyina wamalingi ombangi wahanyone etyi tyaviuka, oyembe kovanyingi.*
3 Wahalinge okapungulula momphela yomuhepe.+
4 “Ine uvasa otyipako tyondyale yove tyavomba, tyilinge ongombe tyilinge otyimbulu tyae mutwaila-tyo.+
5 Ine umona otyimbulu tyomunthu umwe ukuyele tyatoka nonosaku, wahaye otyisipo. Kwatesako muhekulu, okutyipola onosaku.+
6 “Wahanyone ouviuki momphela yomuhepi mukala nae.+
7 “Wehelipake pwaava vatendeleya,* wahaipae ou wehena etyi alinga, nii ondingaviwa, tyeetyi ou wamalingi otyivi himemuti ondingaviwa.*+
8 “Wehetavele okulipumwa-po, tyipata omaiho ovanongo,* atyinyono onondaka mbovaviuki.+
9 “Wahalinge onya onthunda-vilongo. Mokonda onwe mutyii oñgeni tyikala okulinga onthunda-vilongo,* noonwe mwali ononthunda-vilongo kotyilongo tyo Isitu.+
10 “Kuna ombuto yove, oteye ovikuna viatyo momanima epandu.+
11 Mahi menima lya pandu-vali wehelilime; liyeka lipululukwe-po.* Okulinga ngootyo ovahepe mavali omandyilimenena atyo, etyi vamasi-mo atyiliwa-mo novinyama vyo mohika. Otyo una okulinga ngootyo, mepia liomiti vionouva no liomindyambi.
12 “Linga ovilinga viove mononthiki epandu; mahi monthiki ya pandu-vali wahalinge natyike, opo ongombe yove notyimbulu tyove vipululukwe-po, omona womupika wove womukai, nonthunda-vilongo avafimi-po.+
13 “Lingei atyiho nemutolela.+ Mwahatumbulei enyina liovika-huku; momulungu wenyi mweheivale enyina liavio.+
14 “Omanima atyo aeho muna okundingila ovipito vitatu.+
15 Muna okulinga Otyipito Tyonombolo+ Mbahapakelwe Onkhiso. Mononthiki epandu-vali molia-lia onombolo mbahapakelwe onkhiso ngeetyi nemutuma mononthiki mbanakwa mohanyi ya Ambimbe,*+ mokonda omohanyi oyo watunda ko Isitu. Nawike upondola okuya kwaame mankhanya.+
16 Tupu lingei Otyipito Tyokuteya* ovinyango viokwapia tete, vina mwatwika mepia;+ amulingi Otyipito Tyokuwana Okuteya* ovinyango vyo pomuvo watyo, tyina mupola momapia ovipuka mwaundapele konthyulilo yenima.+
17 Tutatu menima ovalume aveho vena okwenda ku tatekulu Siovaa Huku yotyotyili.+
18 “Wahaave ohonde yotyilikutila tyange notyipuka tyimwe tyina onkhiso. Ovilenga viaawa povipito viovilikutila viange kavipondola okulalekwa.
19 “Una okutwala kondywo ya Siovaa Huku yove,+ ovikuna viokukahi vali nawa viatetekela okupia motyilongo.
“Wahateleke otyiketa nomahini otyiina.+
20 “Mandyitumu oandyu maikupiti komutwe mondyila+ opo ikuyakulile, aikutwala komphangu nekutaindyila.+
21 Tehela nawa etyi maipopi, olingi etyi yapopia. Wahalinge onkhango nae, ine uyaanya kamayeevela oviponyo viove+ mokonda yuundapa menyina liange.
22 Mahi ine utavela umwe nawa-nawa etyi ikupopila, olingi atyiho ndyikutolela, mandyimonesa ononkhumbi onondyale mbove ambuho, andyilwisa vana vekulwisa.
23 Oandyu yange maikupiti komutwe, aikutwala kova Amoleu, no kova Hete, no kova Peliseu, no kova Kanaa, no kova Heveu, no kova Sembusi, andyivenyimi-ko.+
24 Mwehelipetamenei kovika-huku viovanthu vovilongo ovio, nii mweheviundapelei,* mwahahetekelei evi valinga.+ Mahi vihanyaunei, amutipaula onomphandyi mbavo mbukola.+
25 Undapelei Siovaa Huku yenyi,+ ngwe memuyambe emwavela okulia nomaande.+ Mandyimuyakulila konombela amuho.+
26 Motyilongo tyove, ovakai omaimo avo kamaakatunda-po+ nii kamavakala tyehena olutyito, ove mandyikekwavela omwenyo omule.*
27 “Mandyikevetilisa owoma tyina ove wehenevevase,+ ovanthu aveho mokalwisa mandyivengwangwanesa, onondyale mbove ambuho mandyikembutilisa, ambukekuhomboka.*+
28 Mandyikevesoyesa* tyina wehenevevase,+ ngwe ova Heveu, nova Kanaa, nova Hete avekekuhomboka.+
29 Himevetaata komutwe wove menima like aveho opo otyilongo tyahakale tyehena ovanthu, ovinyama vyo mohika avilityiti avikuli-po.+
30 Ame mandyivetaata komutwe wove kapii-kapii atee onwe mukala ovanyingi, otyilongo amutyitambula-ko.+
31 “Mandyikapaka onondimbu mbo motyilongo tyove okuhimbikila Kelunga Likuhuka atee kelunga liova Filisitiya, okuhimbikila moluhandya atee Kondongi;*+ ovanthu vakala motyilongo otyo mandyikevepakula pomavoko ove, okevetaata komutwe wove.+
32 Wahalinge omphango navo, nii novika-huku viavo.+
33 Kavapondola okukala motyilongo tyove opo vehekulingisise onkhali kwaame. Oundapela ovika-huku viavo, atyikala eliva ngoove unkhia-mo.”+
Outoi
^ Melaka Liokonthuko: “Wahakatule.”
^ Ine, “pokupopia wahanyone ouviuki nondaka ovanyingi vapopia.”
^ Melaka Liokonthuko: “Mondaka yomatutu.”
^ Ine, “himaamena ondingavivi.”
^ Ine, “ovakungunyiki.”
^ Ine, “mwii omwenyo wonthunda-vilongo.”
^ Ine, “lipinunuke, lilile.”
^ Tala Ovipuka Viapotoyolwa B15.
^ Tyiiwe okuti Otyipito Tyomakaka (Tyonohinge).
^ Tupu tyiiwe okuti Otyipito Tyonosimanu, o Pendekosite.
^ Ine, “nii mwahahongiliywei amuviundapela.”
^ Ine, “ononthiki mbomwenyo wove mambulifwila-po.”
^ Ine, “onondyale mbove mandyikembutyindamenesa kwoove.”
^ Ine hamwe, “mandyikevepipililiswa; mandyikevetilisa owoma.”
^ Ondongi oyo, ondongi Eufalate.
