Okutunda 33:1-23
33 Siovaa apopila vali Mwisesi okuti: “Enda novanthu wapolele kotyilongo tyo Isitu, vetwala no kotyilongo nalaele Ambalayau na Isake na Sakoo, andyiti: ‘Mandyiketyaavela vana vakatuka mwoove.’*+
2 Mandyitumu oandyu komutwe wenyi+ andyikataata ova Kanaa, nova Amoleu, nova Hete, nova Peliseu, nova Heveu, nova Sembusi.+
3 Endei no kotyilongo tyomahini nowiki,+ ame himaende noonwe mokonda munomphwililiki, *+ ine ndyenda noonwe ndyipondola okukemwipaela mondyila.”+
4 Etyi ovanthu veiva onondaka ombo mbaihama avehimbika okulila, avahavale vali ovipuka viokulifiviswa.
5 Siovaa apopila Mwisesi okuti: “Popila ova Isilayeli okuti, ‘Onwe munomphwililiki.*+ Kwakamba vala katutu, ñgeno neya oko andyimunyimi-ko.+ Mwehelipakei ovipuka viokulifiviswa nkhele ndyitale etyi mandyimulingi.’”
6 Okuhimbikila komphunda yo Holembe ova Isilayeli kavavalele vali* ovipuka viokulifiviswa.
7 Mwisesi apolo ohinge yae ekeitunga kokule naapa ankho veli, okuhondovoka monthanda yavo eiluku okuti ohinge yomaliongiyo. Aveho ankho vakapula ku Siovaa+ venda mohinge yomaliongiyo okutunda monthanda.
8 Tyina Mwisesi enda mohinge yae, ovanthu aveho vakatuka avatalama pombundi ponohinge mbavo, otyo vemulavesa, atee anyingila mohinge yae.
9 Apeho tyina Mwisesi amanyingila mohinge yae, kuya ekaka+ alikala pombundi yohinge putyina Huku apopia na Mwisesi.+
10 Tyina ovanthu vamona okuti ekaka liatalama pombundi yohinge ya Mwisesi, aveho avelipetamena otyo veli ponohinge mbavo.
11 Siovaa ankho upopia na Mwisesi ngovanthu vatomphola vevali.+ Tyina Mwisesi ankho akondoka monthanda yavo, Susuwee+ omona wa Nuu, ankho usala pohinge.+
12 Mwisesi pahe apopila Siovaa okuti: “Ove wati: ‘Hongolela ovanthu ava’ mahi kwamphopilile olie ou motumu mankhwatesako, tupu wantholela okuti ‘undyi umwe nawa nenyina liange ulii,* unthyole.’
13 Tatekulu, ine wandinga okankhenda noñgonokese-vo onondyila mbove,+ opo ndyikunoñgonoke nawa ndyikale omunthu uhole, hinangela okuti ovanthu ava ovanthu vove.”+
14 Huku ati: “Ame mandyeende* noove+ andyikekupululukiswa-po.”+
15 Mwisesi apopi okuti: “Ine kumaende* noonthwe wehetupole pano.
16 Oñgeni matyimoneka okuti utuhole, naame novanthu vove, ha putyina waya noonthwe,+ ovanthu avetyimono okuti ame novanthu vove twelikalela novanthu ovakwavo kombanda yohi?”+
17 Siovaa apopila Mwisesi okuti: “Mandyilingi etyi wandyita, mokonda ndyikuhole ndyikwii nawa.”
18 Mwisesi ati: “Mbambavo ndekese-vo omunkhima wove.”
19 Emukumbulula okuti: “Ame mandyikwata komutwe wove otyimono okuti ndyikahi nawa, ame andyikupopila enyina liange Siovaa.+ Ame mandyilingi nawa una nahanda okulinga nawa, andyilingi okankhenda una nahanda okulinga okankhenda.”+
20 Ayawisa-ko vali okuti: “Ove kupondola okumona otyipala tyange mokonda petupu omunthu nawike upondola okumona otyipala tyange, atwalako nomwenyo.”
21 Siovaa ayawisa-ko vali ati: “Tala! Ponthele yange pena omphangu, kalela kombanda yonkhanda oyo.
22 Putyina omunkhima wange ulamba mandyikupake meleva limwe lionkhanda andyikufiki nokuvoko kwange atee ndyilamba.
23 Nga nekupola okuvoko kwange ove momono omwongo wange, mahi otyipala tyange katyipondola okumonwa.”+
Outoi
^ Melaka Liokonthuko: “Ombuto yove.”
^ Melaka Liokonthuko: “Mwatena ekohi.”
^ Melaka Liokonthuko: “Mwatena ekohi.”
^ Melaka Liokonthuko: “Ovana va Isilayeli velitukula.”
^ Ine, “wanthyolovona.”
^ Melaka Liokonthuko: “Otyipala tyange matyiende.”
^ Melaka Liokonthuko: “Ine otyipala tyove kamatyiende.”
