Okutunda 34:1-35
34 Siovaa apopila Mwisesi okuti: “Teta omamanya omapapi evali elifwa nomamanya otete,+ ame mandyihoneka komamanya oo, onondaka mbali komamanya evali otete omapapi+ watyatyaula.+
2 Maneka komuhuka mokonda moya komphunda Sinai okulilekesa kwaame keulu liomphunda.+
3 Moya vala awike, petupu omunthu nawike upondola okumoneka konthele onkhwavo yomphunda. Nii onongi nii onongombe kambupondola okukalia konthele komphunda.”+
4 Mwisesi atete omamanya evali omapapi elifwa no otete. Apinduka-po komuhuka, alondo komphunda Sinai ngeetyi Siovaa emutumine, atyindi peke omavai evali omapapi.
5 Siovaa eya nekaka akalela ponthele yae,+ apopi enyina lya Siovaa.+
6 Siovaa alambela komutwe wae otyo ati: “Siovaa, Siovaa Huku weevela+ una okankhenda,+ wokwapwa-elundo,*+ una olwembia olunene,*+ apeho ufwisapo ondaka yae,*+
7 ulinga olwembia olunene ovanthu ovanyingi-nyingi,+ mokweevela etyi tyapenga,+ noviponyo, nononkhali.+ Una wahayeke vala ngootyo ou walinga onkhali, mevetyepesako umwe navo novana vavo, novatekula vavo, nonomphokole mbavo, novana vonomphokole mbavo.”+
8 Liwa-liwa, Mwisesi aikila konongolo elipetamena-po.
9 Ati: “Ove Siovaa, ine unthyole, mbambavo Siovaa twende atuho,+ kala-vo pokati ketu namphila tunomphwililiki.*+ Twevele-vo etyi twapengesa+ nonkhali twalinga, tavela tukale ovanthu vove.”
10 Ngwe akumbulula okuti: “Nalinga omphango, mandyilingi ovipuka vimwe vihuvisa ovanthu vove otyo vatala, ovipuka viehenelingwe* kombanda yeheke, nii pokati kovanthu vovilongo aviho.+ Ovanthu aveho mamukakala-kala navo, mavakamona ovilinga vya Siovaa, mokonda etyi mandyikulingila otyipuka tyimwe tyihuvisa.+
11 “Tehelela nawa etyi mandyikupopila hono.+ Mandyitaata komutwe wove ova Amoleu, nova Kanaa, nova Hete, nova Peliseu, nova Heveu, nova Sembusi.+
12 Lunguka, wahalinge omphango naike, novanthu vakala motyilongo omo wenda namo,+ opo vahakale eliva ngoove ukwata-mo.+
13 Ove una okuhanyauna-po omitala viavo viovilikutila, oteya-teya-po onomphandyi mbavo mbukola,* novipandyi viavo vikola.+
14 Kupondola okulipetamena kotyika-huku natyike,+ mokonda Siovaa* wahanda vala okufendwa aike.* O Huku wahanda okufendwa vala aike.+
15 Lunguka, wahalinge omphango novanthu votyilongo etyi. Mokonda tyina ngwe vamelipake momafendelo ovika-huku viavo,+ avevilingila ovilikutila, umwe puvo mekukongo oli kovilikutila ovio.+
16 Mokapola ovana vavo ovafikwena vanepwe novana vove,+ ovana vavo ovafikwena avekelipaka mefendelo liovika-huku viavo,+ avahindila ovana vove ovakwendye okulipaka mefendelo olio.
17 “Wehelinthilile ovika-huku viovivela.+
18 “Linga Otyipito Tyonombolo+ Mbahapakelwe Onkhiso; molia-alia onombolo mbahapakelwe onkhiso ngeetyi nekutuma. Una okulinga ngootyo mononthiki epandu-vali, una okutyilinga mononthiki mbanakwa mohanyi ya Ambimbe*+ mokonda omohanyi ya Ambimbe watundile ko Isitu.
19 “Ovakwendye aveho oviveli ovange;+ noviveli aviho viovipako, tyilinge onthane tyilinge otyingi.+
20 Otyimbuluwena tyokwatetekelwa okutyitwa una okutyikumana nongi. Ine kutyikumana, opo tyityoka omunyino. Ovana vove aveho oviveli ovakwendye vekumana.+ Nawike uya kwaame mankhanya.
21 “Onwe muna okuundapa vala ononthiki epandu, onthiki ya pandu-vali oyokupululukwa.*+ Mopululukwa umwe, no pomuvo wokulimisa, no pomuvo wokuteya.
22 “Ove una okulinga Otyipito Tyonosimanu notiliku yatetekela okuyela; olingi Otyipito Tyokuteya konthyulilo yenima.+
23 “Tutatu menima ovalume aveho vena okwenda ku Tatekulu Siovaa Huku yotyotyili, Huku yova Isilayeli.+
24 Mandyitaata ovanthu vovilongo komutwe wove,+ andyiyawisa kotyilongo tyove, nawike mekekupola ohika yove, tyina ove wenda ku Siovaa Huku yove, tutatu menima.
25 “Wahaave ohonde yotyilikutila tyange notyipuka tyimwe tyina onkhiso.+ Otyilikutila tyilingwa Motyipito Tyopasikwa katyipondola okulalekwa.+
26 “Ove una okutwala kondywo ya Siovaa Huku yove+ ovikuna viokukahi vali nawa viatetekela okupia motyilongo.
“Wahateleke otyiketa nomahini otyiina.”+
27 Siovaa atolela vali Mwisesi ati: “Honeka onondaka ombo,+ mokonda ononondaka ombo mandyilingi noove omphango, nova Isilayeli.”+
28 Mwisesi akala na Siovaa ovitenya 40, novinthiki 40, tyahali ombolo nii tyahanu omaande.+ Huku ahoneka komamanya oo, onondaka mbomphango, Ovitumino 10.*+
29 Pahe Mwisesi atuluka komphunda yo Sinai, nomamanya evali Oumbangi unao peke.+ Tyina atuluka komphunda, Mwisesi ankho kelieete okuti otyipala tyae tyikahi nokuliaima unene, mokonda yokwapopia na Huku.
30 Etyi Alau nova Isilayeli aveho vatala Mwisesi, avamono okuti otyipala tyae tyikahi nokuliaima, avatili unene owoma okufwena ponthele yae.+
31 Mahi Mwisesi eveihana, ovo Alau nonohongoi ambuho mbova Isilayeli, avafwene ponthele ya Mwisesi apopi navo.
32 Ova Isilayeli aveho avafwene pwe evepopila ovitumino aviho Siovaa emutuma, vina emupopila komphunda Sinai.+
33 Apeho tyina Mwisesi apopia navo, ulipaka otyinyanga motyipala.+
34 Mahi Mwisesi tyina enda ku Siovaa akapopie nae, otyinyanga ulipola-tyo atee atunda-ko.+ Putyina amatundu-ko, upopila ova Isilayeli ovitumino aviho apewa.+
35 Ova Isilayeli vamona okuti otyipala tya Mwisesi tyiliaima unene; pahe Mwisesi, uti tyina amakatomphola na Huku,+ pokutunda-ko elipake vali otyinyanga.
Outoi
^ Ine, “useta okunumana.”
^ Ine, “okankhenda.”
^ Ine, “omukwatyili.”
^ Melaka Liokonthuko: “Twatena ehinga.”
^ Ine, “vihenetungwe.”
^ Tala Onondaka Mbahangununwa.
^ Ine, “una onkhwelume.”
^ Melaka Liokonthuko: “Siovaa, enyina liae.”
^ Tala Ovipuka Viapotoyolwa B15.
^ Ine, “tavelei otyitumino Tyotyasapalo.”
^ Melaka Liokonthuko: “Onondaka 10.” Tupu mbwiwe okuti Ndekalongo.
