Okutunda 36:1-38
36 “Mbesaleli mavaundapa na Ooliambe novalume aveho vena ounongo,* vana Siovaa aavela ekungunyiko nenoñgonoko liokulinga ovilinga aviho vikola, ngeetyi Siovaa atuma.”+
2 Mwisesi aihana Mbesaleli na Ooliambe novalume aveho vena ounongo vana Siovaa aavelele enoñgonoko,+ aveho vana veliava nomutima wavo mwene opo veye okuundapa motyilinga otyo.+
3 Avapewa na Mwisesi oviawa aviho+ viaetelwe nova Isilayeli, mavikwatesako ovilinga vikola. Mahi ova Isilayeli avahayeke-po okulinga oviawa viavo ononthiki ambuho komuhuka.
4 Etyi ovilinga vikola viahimbika ovanthu aveho ovaundapi ovanongo avahimbika okuya wike-wike,
5 okupopia na Mwisesi, avemutolela okuti: “Ovanthu vekahi nokweta ovipuka ovinyingi ngwe evi twesuka navio motyilinga Siovaa etutuma viatuuka-ae.”
6 Pahe Mwisesi atumu vapopile ovanthu monthanda okuti: “Onwe ovipuka vioviawa vikola muhaetei vali.” Okutuka opo avahayeke vali ovanthu vaete ovipuka viokwava.
7 Ovipuka viokutunga ovinyingi-ae unene tyokuhupa-po.
8 Ovaundapi aveho+ ovanongo avatungu ekaka liefendelo+ novinyanga 10 viomulinya ukahi nawa wapohwa, nomulinya omungole, nomainya ongi otyivala tyonkhula, nomulinya wakuhuka; anyikila-ko* onokelumbii mbaunda-unda.+
9 Otyinyanga tyike tyina onokovandu* 28 moule, nonokovandu 4 mounthanda. Ovinyanga aviho vilifwe.
10 Ovinyanga vitano evitokeka kumwe, novikwavo vali vitano evitokeka kumwe.
11 Pahe apake oulwilo oututu womulinya omungole, komwoyo wotyinyanga tyahulilila momutete watyo, ngatyo ñgo alinga komwoyo wotyinyanga tyahulilila komutete omukwavo pana omitete ovio vivali mavihonyena.
12 Alingi oulwilo 50 kotyinyanga tyimwe, alingi vali oulwilo 50 komwoyo wotyinyanga otyikwavo, opo oulwilo oo, ulipilukile noukwavo apa omitete ovio mavihonyena.
13 Alingi ovikongo 50 vioolu* omitete viovinyanga ngamo evihaka, ekaka liefendelo alieheliyapauka.
14 Tupu alingi ovinyanga viomainya otyinkhombo ayambele ekaka liefendelo, alingi ovinyanga 11.+
15 Otyinyanga tyike tyina onokovandu 30 moule, nonokovandu 4 mounthanda. Ovinyanga ovio 11 vilifwe.
16 Ovinyanga vitano evitopekeka, atopekeka vali ovikwavo epandu.
17 Alingi oulwilo 50 komwoyo wotyinyanga tyahulilila komutete, alingi vali oulwilo 50 komwoyo wotyinyanga tyahulilila komutete omukwavo, apa viahonyena.
18 Alingi vali ovikongo viotyitasu 50 opo atokeke kumwe ovinyanga viokwayambela ekaka avikala otyinyanga tyike.
19 Ataindya ombandwa yongi ombambi ayambela nayo ekaka liefendelo, kombanda yombandwa oyo apake-ko ombandwa yotyinyama otyikwavo.+
20 Alingi olukweyo lwekaka liefendelo nomavai+ omuti omu akasiya, alutalama.+
21 Olukweyo lwike luna onokovandu 10 motyitai, nokovandu ike notyihupe mounthanda.
22 Olukweyo luna omavai evali-evali elimata kumwe. Otyo alingile ngootyo omalukweyo aeho atungile nao ekaka liefendelo.
23 Elitungu nomalukweyo 20 omavai elimata evali-evali, aapilukila kombwelo.
24 Alingi ovipundi viopalata 40, vina onombundi mamukwatela omalukweyo 20 omavai, omavai evali okwahimbika aakwatela movipundi vivali-vivali vina onombundi, omakwavo alandula-ko nao aakwatela movipundi vivali vina onombundi.+
25 Konthele onkhwavo yekaka liefendelo okuyemba kombanda yalio, nako alingila-ko omalukweyo 20 omavai, maelimate evali-evali,
26 novipundi 40 vyo palata vina onombundi, omavai evali okwahimbika aakwatela movipundi vivali, omakwavo alandula-ko aakwatela movipundi vivali-vivali.
27 Konyima yekaka liefendelo okutala koutakelo, alingila-ko omalukweyo epandu omavai elimata evali-evali.+
28 Alingila omalukweyo evali omavai elimata kumwe, akale konyima yekaka liefendelo elikwate.
29 Omavai oo, aelimate kumwe aelikwata evali-evali okuhimbikila pehina atee peulu, aehikila meyulu lyo tete, aeho o ngootyo eelingile aakala onomphandyi onombali mbo pomavindi.
30 Alingi omalukweyo etyinana omavai, novipundi viatyo vyo palata 16 vina onombundi, ovipundi vivali viomavai otete, ovipundi vivali-vivali vina onombundi viomavai okwalandula-ko.
31 Alingi omaluvala omavai omuti omu akasiya, omaluvala etano aakwata omalukweyo a nthele imwe yekaka liefendelo,+
32 omakwavo etano, aakwata omalukweyo a nthele onkhwavo yekaka liefendelo, omakwavo vali etano aakwata omalukweyo o koutakelo konyima yekaka liefendelo.
33 Oluvala lwo pokati alutete pokati olukweyo lwomavai, alutundu konthele atee konthele onkhwavo.
34 Asolongolola omavai olukweyo noolu, eepake omayulu omu mamukwatela oluvala, omaluvala aeho eesolongolola noolu.+
35 Alingi otyinyanga+ nomulinya omungole, nomainya ongi otyivala tyonkhula, nomulinya wakuhuka nomulinya ukahi nawa wapohwa. Etyipake onokelumbii+ mbaundaiswa-ko.+
36 Alingi onomphandyi ononkhwana mbomuti omu akasiya mbokukwata otyinyanga, embusolongolola noolu, tupu alingi onohako mboolu, anthili ovipundi vikwana viopalata vina onombundi.
37 Alingi ombundi yekaka, otyinyanga tyatungwa nomulinya omungole nomainya ongi otyivala tyonkhula, nomulinya wakuhuka nomulinya ukahi nawa wapohwa,+
38 nonomphandyi ononthano nonohako mbatyo. Omitwe vionomphandyi nouvela watyo wokuhonyeka,* evisolongolola noolu, mahi ovipundi viatyo vitano viokuna onombundi oviotyitasu.
Outoi
^ Melaka Liokonthuko: “Vomutima omunongo.”
^ Mokutala o Mbesaleli.
^ Okovandu ike ankho ituuka onosendimetulu 44,5. Tala Ovipuka Viapotoyolwa B14.
^ Ine, “onohako mbo.”
^ Ine, “ovikwatelo, omalwilo, ovinyanga viokukuta.”
