Omihe 7:1-27
7 Mona wange, tavela etyi ndyikupopila,Paka nawa ovitumino viange.+
2 Tavela ovitumino viange vikupe omwenyo.+Ondongeso* yange ikale ngotyitindi tyeiho liove.
3 Evi ndyikulonga vikutila kominwe viove.Vihoneka kevai liomutima wove.+
4 Popila ounongo uti: “Ove umphange yange,”
Eli ekungunyiko oliti: “Ove uwetu.”
5 Ounongo ukuyakulile, eli ekungukunyiko nalio likwaamene komukai otyihayo,*+Utyivile okuyepa omukai otyihayo,* omukai wonondaka mbuyondya.*+
6 Etyi ndyili mondywo natalela pondyanena yange,Natalela pomamphana ondyanena yange andyitale mombwelo,
7 Namona-mo ovanthu vamwe ovahima,*Povakwendye namona, pena umwe wehena onondunge.*+
8 Wakwata ponthele petapalo pakala omukai otyihayo,Soka aviuku umwe peumbo liomukai oo,
9 Waya-po kokawi-wii, etyi kwanthikovela pahe,+Kokangulohi oku, tyina pahe makunthikovela umwe.
10 Tyina ndyikati ñgaa, kuna kuya omukai avahonyenena,Omukai umwe wavala* ngekunga,+ womutima uyondya.
11 Omukai umwe womayava, omukai wahakundu.+
No meumbo vala kakala-mo-ale.*
12 Uti vala hono uli momatapalo, hono uli ponopalasa.Ukevela apa pahonyenena onondyila.+
13 Etyi velivasa nomukwendye oo, emukwate emuhipi ombesu.Nohonyi utupu, upopia umwe vala tyahakundu, wivala okuti:
14 “Mukwe ankho ndyina okulinga otyilikutila tyange tyombembwa.+
Hono netyilinga ngeetyi napopile.
15 Pahe andyiti ndyende tukahonyene, otyo neila,Ove neya okutaindya, pahe nekuvasa!
16 Koula wange nayala-ko, kuna onomanda onongwa,Mbomulinya wo ko Isitu, onomanda onongwa.+
17 Koula wange nanyanya-ko ombao yomila, ombao yendombo, akwii ombao yokanela.*+
18 Endyu twende atuho, tulihande-po matukala vala koula wange atee kutya.Twende tukalangalepo mokonda onthwe tulihole.
19 Omulume wange meumbo kemo-ale.Una watunda-po, oku aya okokule-ale.
20 Tyina aya watyinda otyipapo tyonombongo,Una kepepi-ale, mekeya vala tyina ohanyi ili kenthiki.”
21 Omukai oo ateye umwe omutima omukwendye.+
Onondaka apopia ambumwoolo onomona.
22 Omukwendye oo kelisetaile-ale vali emulandula, uti vala ongombe onthwei ikaipawa,Alandula-mo umwe, uti vala otyova tyikakutilwa mepundi,*+
23 Umukwama umwe atee akavahiwa nohevo aimuyahe aikatoma kehuli.Tyina aya ñgaa, uti vala otyiila tyienda na apa patelwa, nokuti makankhia ketyii.*+
24 Vana vange, tehelelei kuno.Tehelelei nawa etyi ndyipopia.
25 Omitima vienyi viahaye no monondyila mbae.
Viahaye no monondyila mbae,+
26 Omukai oo, wamana-le ovanthu ovanyingi,+Ava aipaa, kavelifwe pano.+
27 Eumbo liae evelo lyo Kondyembo,*Eumbo liae evelo litwala ovanthu meleva liononkhia.
Outoi
^ Ine, “otyitumino tyange.”
^ Melaka Liokonthuko: “Wehei.” Tala okapitulu 2:16.
^ Melaka Liokonthuko: “Onthunda-vilongo.” Tala okapitulu 2:16.
^ Ine, “mbukengelela.”
^ Ine, “vehei ovipuka.”
^ Melaka Liokonthuko: “Wehena omutima.”
^ Ine, “una omivalo viekunga.”
^ Melaka Liokonthuko: “Onomphai mbae kambukala meumbo.”
^ Ovipuka ovio onombao.
^ Ine, “tyikakutilwa nomalienge.”
^ Ine, “makaipaesa ohande yae.”
^ Tala Onondaka Mbahangununwa.
