Omihe 8:1-36
8 Okuti ounongo hao uli nokupopila peulu?
Ekungunyiko halio lili nokukalavandya?+
2 Ounongo oyoo utai konthele ketapalo,+ utai pomatulumba,Utalama umwe ponondyapu.
3 Utai ponombundi mbepunda-umbo,Utai konombundi,Wiivala okupopila peulu, wiivala okuti:+
4 “Onwe, onwe ndyipopila vanthu vovilongo.Onwe, onwe umwe amuho ndyikalavandyela.*
5 Ndyimuti: onwe vahima lungukei-vo pahe.+Onwe vokwehena onondunge kalei nomitima vipunga ovipuka.*
6 Nthehelelei, etyi ndyipopia tyesukisa unene,Momulungu wange mutunda evi viaviuka.
7 Momulungu wange mutunda otyili, ndyipopia otyili nondaka yavova,Ovivi momulungu wange kavitetela-mo.
8 Onondaka ambuho mbutunda momulungu wange mbaviuka.
Kamutundu matutu, kamutundu ondaka iyondya.
9 Onondaka ndyipopia mbwiivala nawa, vana vapunga nawa ovipuka vembwiiva,Onondaka mbange mbaviuka, mbaviukila vana vavasa enoñgonoko.
10 Hahe mukoye-po okulongwa naame, tyipona opalata,Koyei-po enoñgonoko, tyipona oolu, ngailingi oolu ikahi vali nawa.+
11 Ounongo wapona pomamanya omawa.*Petupu natyike otyiwa tyielekwa nounongo.
12 Ounongo ame yatyo, tukala nekungunyiko.Navasa enoñgonoko nonondunge.+
13 Owoma na Siovaa okuyala ovivi.+
Ame ndyiyele okulipaka-ko, ndyiyele elungavi,+ nondyila yahaviukile, nonondaka onombi.+
14 Mwaame mutunda onondaka onongwa mbulondola, mutunda ounongo.+Ame, ame hekulu yenoñgonoko,+ hekulu yononkhono.+
15 Onohamba mbutumina tupu ame vala,Ovatumini vahinda tupu ovitumino viaviuka, ame.+
16 Ovatumini vatumina tupu ame vala,Omanene-atyo akoya tupu onomphela mbaviuka, ame.
17 Ame, ava ndyihole ovovana venthyole,Vana vanthaindya, vambasa.+
18 Ame nati vala, ame kolumono ame komunkhima,Ame kolumono lwahapu* ame kokuviukisa.
19 Etyi upola mwaame, otyiwa vali koolu, no koolu umwe yakangulwa,Etyi ame ndyilinga, otyiwa vali tyipona opalata ongwa unene.+
20 Ame ndyikwata mondyila yokwaviuka,Ndyikwata monondyila mbaviuka.
21 Vana venthyole, ame ndyivepa oviwa,Ndyiyulisa oviwa movimbundu viavo.
22 Siovaa wanthunga andyikala onthyimbi yondyila yae,+Otyipuka tyo tete-tete alinga kovipuka aviho vyo kohale.+
23 Apa naetwa kouye okohale,*+Naetwako-ale ponthyimbi, neheke ankho nkhele kaliko-ale.+
24 Nkhele ankho nomeva okohi kaeko,+ ngwe ame ankho okondyili-ale,*Nkhele ankho kutupu onondongi mbeyula omeva.
25 Nkhele ankho kutupu onomphunda,Nkhele ankho kutupu ovipunda mahi ame ankho okondyili-ale,
26 Nkhele ankho ohi keneitunge ombu onohika mbayo kambuko-ale,Nkhele ankho nenkhelele vala lyo tete lieheke kaliivala.
27 Ufwiika tupu eulu pokutungwa,+ ame opondyili.Etyi ati pokunthinda apa eulu liaoyela* kombanda yomeva opondyili,+
28 Etyi apaka* omakaka meulu,Apaka-ko onondyivi-ndyivi mbo kohi opondyili,
29 Etyi apaka-ko otyitumino tyelunga,Etyi ati omaande alio kamalambe apa ena okwooyela,+Etyi atunga* omphapelo yohi, ame ankho okondyili.
30 Ame mwene twali nae tyina evilinga, ame nali omuundapi omunongo.+
Ame ankho unthyole unene,+ unthyambukilwa apeho ononthiki ambuho.Apeho ankho tyina tuna-e, umbasa vala nahambukwa.+
31 Nahambukilwe unene etyi atunga ohi mamukala ovanthu,Etyi ankho ndyihole vali unene ovanthu.*
32 Vana vange, nthehelelei.Mavahambukwa vali unene ovovana valandula onondyila mbange.
33 Tehelelei onondunge+ mukale ovanongo,Mwehembwaanyei.
34 Mahambukwa oyouna unthehelela,Oyouna uya apeho pepito liange komuhuka-huka,*Oyouna ukevelela kombundi yeumbo liange.
35 Una unthaindya ambasi, wavasa omwenyo,+Metavelwa na Siovaa.
36 Mahi una wehesuku naame, welinyona,*Vana vendyele, vehole ononkhia.”+
Outoi
^ Melaka Liokonthuko: “Ovanthu ndyikatulila.”
^ Melaka Liokonthuko: “Noñgonokei omutima.”
^ Tala Onondaka Mbahangununwa.
^ Ine, “omalumono apiñganwa.”
^ Ine, “kolukulu-ale kuhasokwa-le vali.”
^ Ine, “naetwako-ale ngatyina nakutulwa nomalwihamo.”
^ Melaka Liokonthuko: “Elola.”
^ Melaka Liokonthuko: “Atunga.”
^ Ine, “aika-po.”
^ Ine, “ovana vovalume.”
^ Ine, “ukala tyipahi.”
^ Ine, “unyona ohande yae.”