Omukanda Wahonekelwa Ova Kolosu 1:1-29
1 Ame Paulu, mutumwa wa Kilisitu Sesusi kokwahanda kwa Huku, tuna Timotiu,+ mukwetu,
2 twahonekela ovasukuki vakwetu vakakatela motyili veli kumwe na Kilisitu veli mo Kolosu:
Okankhenda okanene kakale noonwe, atyiho nombembwa itunda ku Huku, Tate yetu.
3 Onthwe apeho tupandula Huku, Tate ya Tatekulu yetu Sesusi Kilisitu, tyina tumwiitila-ko momalikwambelo,
4 onthwe twetyiiva otyipuka muyumba onthumbi mu Kilisitu Sesusi, notyipuka muhole ovasukuki aveho
5 mokonda yeetyi mukevelela mwapakelwa keulu.+ Onwe otyo mwapakelwa mwetyinoñgonoka-le pokweiva ondaka yotyili tyoviwa ovipe
6 viehika kwoonwe. Ngeetyi mouye auho oviwa ovipe vili nokweeta ovinyango, vili nokukula,+ no kwoonwe oko, otyo tyili nokweenda ngootyo, okutuka umwe monthiki mweiva okankhenda okanene ka Huku, amukenoñgonoka umwe nawa omu mwene kakalela.
7 Otyo, otyo onwe mwalongeswa na mupika mukwetu tuhole, Epafala,+ omuundapi uyumbwa onthumbi wa Kilisitu, wetukalelapo.
8 Nae wetutompholela olwembia lwenyi lutuka momphepo ya Huku.*
9 Okutuka vala monthiki twetyiiva, onthwe katwatalamene-ale kokumwiitila-ko momalikwambelo,+ twiita mwoonwe muyule enoñgonoko liotyotyili+ lieetyi ahanda, mukale nounongo auho, mukungunyike evi vituka komphepo yae,+
10 opo mweendele omu Siovaa* ahandela, mumuhambukiswe umwe nawa-nawa, putyina mwahatalama kokweeta ovinyango movilinga aviho oviwa, mukula menoñgonoko liotyotyili lya Huku;+
11 twahanda onwe mupamekwe nononkhono ambuho mbutuka kononkhono mbae ononene,+ na mutyivile okukoleleya umwe nawa noumphwa-lundo nehambu,
12 otyo mupandula ku Tate, ou wemuhuta noonwe mulingile kumwe onomphinga novasukuki,+ motyimimi.
13 Ngwe wetuyovola menthiki+ twahatuminwe vali nalio,* etutwala mouhamba Womona wae ehole,
14 ou twayovokela wetuhukulula, ou twaevelelwa ononkhali mbetu.+
15 Ngwe otyifwika tya Huku wahamonwa,+ otyiveli tyovipuka aviho viatungwa;+
16 mokonda ovipuka aviho ovikwavo, viatungwa tupu oe, ovipuka keulu, kombanda yohi, evi vimoneka neevi viahamoneka,+ tyilinge ovipundi viokutumina, tyilinge ovatumini, tyilinge onohamba tyilinge ovanene vatyo. Ovipuka aviho ovikwavo viatungwa tupu oe,+ oe viatungilwa.
17 Tupu, oe omutete kovipuka aviho,+ ya ovipuka aviho ovikwavo vieya-ko tupu oe,
18 oe omutwe wolutu, wewaneno.+ Oe onthyimbi, otyiveli kokwatunda povokwankhia,+ opo alinge omutete kovipuka aviho;
19 mokonda mwene Huku otyo ahanda, mwe mukale ovipuka aviho viaoya,+
20 vahonyene mwe novipuka ovikwavo aviho,+ tyilinge ovipuka kombanda yohi tyilinge ovipuka keulu, vahonyene mohonde+ amomesila momuti wemone.*
21 Otyili, onwe mwali kokule na Huku, ankho munondyale mokonda ankho mwaika vala omitwe vienyi movilinga ovivi,
22 mahi pahe ngwe wemweeta no kwe muhonyene molutu lwohitu lwo ou wokwankhile, opo atie tyina emweete muvanthu umwe vakola, mutupu otyinthembia natyike, mutupu natyike tyimuvelesa onombei+ —
23 pahe, tyenyi okwahatundu vala meyumba-nthumbi,+ okukala tyaika kelisesu,+ tyapama,+ amwahayapulwa mweetyi mukevela tyoviwa ovipe mweiva, evi viapopiwa movanthu aveho veli mombwelo yeulu.+ Ame Paulu, nalinga omuundapi woviwa ovio ovipe.+
24 Ame pahe nahambukwa okuli nokukondyela onwe,+ ndyili nokututumba nononkhumbi mba Kilisitu nkhele mbeheneye molutu lwange, ndyilingile olutu lwae,+ ewaneno.+
25 Ame nalinga omuundapi wewaneno tyeetyi otyilinga+ napewa na Huku ndyilingile onwe, otyilinga tyokupopia umwe ondaka ya Huku andyooyo,
26 otyipuka tyikola+ ankho tyaholekwa kouye wo kohale,*+ ku ava veheko-ale vali. Mahi pahe tyili nokuholololelwa ovasukuki vae,+
27 ava Huku mwene akoya mo vomihoko omikwavo mwene ati ndyivenoñgonokese olumono lwange olunene lwotyipuka otyo tyikola tyaholekwa,+ otyipuka otyo o Kilisitu uli kumwe noonwe, o tyokukevela omunkhima wae.+
28 Oo oe tuli nokupopia movanthu, oe tulondolela ovanthu aveho, oe tulongesila aveho mounongo auho, opo aveho tuvehikiye umwe tyafwapo, tyili kumwe na Kilisitu.+
29 Otyo otyo ndyiundapela unene, ndyitutumba umwe nononkhono mbae ampha mbuli nokuundapa otyinene mwaame.+
Outoi
^ Melaka Liokonthuko: “Olwembia lwenyi momphepo.”
^ Tala Ovipuka Viapotoyolwa A5.
^ Melaka Liokonthuko: “Wetupola mombwelo yetumino lienthiki.”
^ Tala Onondaka Mbahangununwa.
^ Ine, “omivo viokwalamba.” Tala Onondaka Mbahangununwa.
