Omukanda Wahonekelwa Ova Kolosu 4:1-18
4 Onwe vahona, ovapika venyi, velingei etyi tyaviuka, etyi tyata-mo, mwahalimbwei-ko, noonwe muna Omunene wenyi keulu.+
2 Kolelei komalikwambelo,+ pahukei likwambelei otyo mupandula.+
3 Otyo ñgoo tupu mutulingila-ko omalikwambelo,+ Huku aikulile ondaka ombundi, onthwe tutyivile okupopia movanthu otyipuka tyikola tyaholekwa tyayemba ku Kilisitu, etyi ame napakelwa momalienge ñgaa,+
4 pokutyipopia ndyityipotoyole umwe nawa ngo omu tyina okulingilwa.
5 Endailei vala mounongo ko vo kondye, amulingi umwe tyitiwa otyetyi momuvo muna-o.*+
6 Onondaka mbenyi apeho mbulinge onongwa, mbahingwa nawa omongwa+, munoñgonoke oñgeni mamukumbulula munthu na munthu.+
7 Tikiku,+ omunthu wange ndyihole, omuundapi uyumbwa onthumbi, mupika mukwetu mu Tatekulu, memupopila etyi ame ndyina-tyo kuno atyiho.
8 Ndyili nokumutuma eye oko, onwe munoñgonoke etyi onthwe kuno tukahi, opo tupu emupameke omitima.
9 Ngwe meya oko na Onesimu,+ omunthu wange uyumbwa onthumbi, omunthu ndyihole, wenyi wo oko; maveya okumupopila ovipuka aviho tuna-vio kuno.
10 Alisitaluku,+ nkhwatwa mukwetu, watuma okumutyalungusa-po, aveho na Maluku+ wavo ya Mbalanambee, (Maluku ou mwatilwe muyakulei nawa+ nga eya oko),
11 na Sesusi ou vati o Susitu, ovo o vokwapita ekwendye. Ovo vala ovo ovaundapi vakwetu mokulingila Ouhamba wa Huku, ngwe valinga ondyivi-ndyivi onene yononkhono mbange.*
12 Epafala,+ omupika wa Kilisitu Sesusi wenyi wo oko, utuma okumutyalungusa-po. Apeho umulingila omalikwambelo, watokota umwe natyo ombungo, opo pahe mwooye umwe, atyiho Huku ahanda tyimukululuke umwe.
13 Mokonda mwene naame ndyimbangi umwe, watutumbila umwe onwe, no voko Laondiseya no voko Hiyelapolisi.
14 Luka+ omunthu wetu tuhole, omuhakuli, nae na Ndema+ vatuma okumutyalungusa-po.
15 Nkhukunyinei-po ovataveli vakwetu vo mo Laondiseya, na Nifa, newaneno liliongiyila mondywo yae.+
16 Tyina omukanda ou mwameutangelwa, ukehike no kewaneno lyo Laondiseya navo veutange,+ onwe noonwe tangei ou mautundu ko Laondiseya.
17 Tupu popilei Alukipu+ muti: “Suka novilinga wetavela mu Tatekulu, uvilinge umwe nawa-nawa.”
18 Ame Paulu ndyimukukunya-po nokuvoko kwange mwene.+ Mwahalimbwei-ko komalienge ange.+ Okankhenda okanene kakale noonwe.
