Wahonekelwa Ova Loma 14:1-23
14 Tambulei nawa ou wayengenga monthumbi yae,+ mwahapolei-po omapita ou wasoka tyityatyo.*
2 Umwe mwene monthumbi yae, ovipuka aviho ulia, ou umwe wayengenga-vo ulia vala pahe onombi.
3 Ou ulia ahatombe ou wahali, ou wahali ahapole-po omapita ou ulia,+ mokonda Huku nae wemutavela.
4 Ove ovelie ukavela onombei omuundapi wa mukwenyi?+ Mwene utei ku hekulu, atalame-talame, atoke-toke otyo otya hekulu.+ Ngwe tyili upondola atalama umwe, mokonda Siovaa* upondola okumutalameka.
5 Umwe mwene uti onthiki imwe onene vali kononkhwavo;+ ou umwe uti ononthiki ambuho otyipuka tyike vala;+ munthu na munthu ayembe ku etyi mwene tyaviuka monondunge mbae.
6 Ou una onthiki onene, mwene utyilingila Siovaa.* Ou tupu ulia, ulia tupu o Siovaa,* mokonda ulia apandula Huku;+ ou wahali, kalile tupu o Siovaa,* mwene nae upandula Huku.+
7 Ngwe tyili, onthwe atuho petupu-ale ou ukala-ko alingi vala tyae,+ apehena-le ou unkhia unkhila-e vala.
8 Ine tuna omwenyo, twakalela-ko Siovaa,*+ ine tunkhia, tunkhila Siovaa.* Naina, tyilinge tuna omwenyo tyilinge twankhia, tu va Siovaa.*+
9 Ngwe otyo Kilisitu ankhila, pahe akala vali nomwenyo, walinga Tatekulu yo vokwankhia no vokuna omwenyo.+
10 Mahi ove oityi uvelela onombei mukwenyi?+ Oityi watombela mukwenyi? Onthwe atuho matukatalama potyipundi tyonomphela, otyipundi tya Huku.+
11 Tyahonekwa okuti: “‘Natukaila umwe omwenyo wange’+ o Siovaa* wetyipopia, ‘onongolo ambuho mambukaika pohi kotyipala tyange, omalaka aeho maeketyipopila poluhandya okuti ame Huku.’”+
12 Opo pahe atuho, munthu na munthu makapulwa mwene na Huku.+
13 Naina, onthwe poyetu twehelipopiei vali,+ mahi onwe, sukei umwe natyo tyokwahatokesisa vakwenyi, mwahatyikei vakwenyi komutwe.+
14 Mu Tatekulu Sesusi ndyityii umwe, nokutyitavela ndyityitavela umwe, petupu-ale etyi tyitiwa tyasila kohalwatyo;+ tyilinga vala tyokwasila tyina omunthu ametyiti tyasila, ngootyo kwe tyasila.
15 Ine mukwenyi wanumanena okulia kumwe ahahandele, opo ove kuli-ale vali nokweendela monthyole.+ Wahanyone* ou Kilisitu ankhila nokulia ulia.+
16 Naina, mwahapopisei omapita oviwa mulinga.
17 Mokonda Ouhamba wa Huku hakulia, hakunwa,+ mahi okuviukisa, ombembwa, okuhambukilwa momphepo ikola.
18 Ou ulinga ngootyo, aundapa umwe tyokuti omupika wa Kilisitu, utavelwa na Huku, utavelwa novanthu.
19 Naina, tulipakei mu evi vieeta ombembwa,+ no mweevi vitunga tulikwate-po na vakwetu.+
20 Tyiyekei-po tyokuhanya ovilinga vya Huku kombanda vala yokulia.+ Otyili, ovipuka aviho viasukuka, mahi tyikola* katyilingwa omunthu okulia etyi tyitokesisa vakwavo.+
21 Ine okulia ohitu, hamwe okunwa ovinyu, hamwe okulinga vali tyimwe mukwenyi tyimutokesisa,+ opo hahe vali okwehetyilingi.
22 Etyi ove wayumba onthumbi tyilinge vala tyenyi na Huku. Uhambukwa oyou wahati otyipuka oe mwene wetyilinga ngwe nkhele elivele vali onombei.
23 Mahi ine umwe una evi viemuuhanesa* otyo alia vala, oo uli nokulikwata, mokonda walia otyo ahayumbile-ko onthumbi. Ovipuka aviho vilingwa vala tyahayumbile-ko onthumbi o vionkhali.
Outoi
^ Ine hamwe, “etyi mwene omunthu asoka.”
^ Tala Ovipuka Viapotoyolwa A5.
^ Tala Ovipuka Viapotoyolwa A5.
^ Tala Ovipuka Viapotoyolwa A5.
^ Tala Ovipuka Viapotoyolwa A5.
^ Tala Ovipuka Viapotoyolwa A5.
^ Tala Ovipuka Viapotoyolwa A5.
^ Tala Ovipuka Viapotoyolwa A5.
^ Tala Ovipuka Viapotoyolwa A5.
^ Ine, “wahahanye.”
^ Ine, “tyapenga.”
^ Ine, “ohuhunya.”
