Wahonekelwa Ova Loma 8:1-39
8 Ngwe mwene vana vapolela peke na Kilisitu Sesusi kavavelwa onombei.
2 Mokonda otyitumino tyomphepo ikola tyipa omwenyo ava vapolela peke na Kilisitu Sesusi, tyemuyovola+ motyitumino tyonkhali no tyononkhia.
3 Etyi Ovitumino viehevilile+ mokonda viayengenga+ viayemba kohitu, Huku pahe wetyivila, watuma Omona wae+ eya lwohitu yonkhali,+ aendela umwe onkhali, onkhali mohitu inyime-mo,
4 opo evi viaviuka vituma Ovitumino vilingwe umwe mwoonthwe,+ twahaende vali lwohitu, mahi tweende lwomphepo ikola.+
5 Mahi ava valinga ovipuka viohitu vapaka-ko vala tyohitu;+ ngwe ava vahula komphepo ikola, vesuka no vya Huku.+
6 Okupaka omutwe mo viohitu tyityita ononkhia,+ mahi okupaka omutwe mo vya Huku* tyityita omwenyo nombembwa;+
7 mokonda okupaka omutwe mo viohitu ulinga ondyale ya Huku,+ tyeetyi ohitu kaitavela otyitumino tya Huku, ngwe nayo vala ha yatyo-ale.
8 Naina ava velipaka vala mu evi viayemba kohitu, kavahambukiswa Huku.
9 Mahi onwe kamuli mu evi viayemba kohitu, onwe mwayemba ko vya Huku,+ ngwe ongootyo ine tyili-tyili omphepo ya Huku ikala umwe mwoonwe. Ou wehena onondunge* mba Kilisitu, oo ha wae-ko.
10 Mahi ine Kilisitu una onwe,+ opo olutu lwankhia tyelwiipaa onkhali, mahi omphepo ya Huku oyo omwenyo watuka kokuviukisa.
11 Ngwe ine omphepo ikola yo ou wapindula-po Sesusi kovokwankhia+ ili mwoonwe, opo ou wokwapindula-po Kilisitu Sesusi kovokwankhia, nomalutu enyi ankhia meepe omwenyo+ nomphepo yae ili mwoonwe.
12 Mahi pahe vanthu vetu, onthwe tuna ongele, mahi hangele yohitu pahe na tulinge vala evi viayemba kohitu;+
13 mokonda onwe okulinga evi viohitu, opo kononkhia oko umwe muhungi; mahi ine ovilinga violutu muvileka+ nomphepo ikola, opo mamukamona omwenyo.+
14 Aveho valulikwa nomphepo ya Huku, ovo ovana va Huku.+
15 Ngwe onwe kamwatambulile omphepo youpika, na mutile vali owoma, mwatambula omphepo yemwaalula mulinge ovana, omphepo ei tutila: “Abba,* Tate!”+
16 Omphepo oyo mwene, oyo ombangi ityipaka kohi yetu+ tyokuti onthwe tuvana va Huku.+
17 Naina opo ine onthwe vana vae, opo noonthwe tulinga onomphinga — tupinga tya Huku, tuhonya+ na Kilisitu — ine tumonena kumwe nae+ ononkhumbi noonthwe tukankhimanekelwa kumwe nae.+
18 Otyo ame ndyitila, ononkhumbi ombu tuli nokumona hono, mbutupu-ale etyi mbulinga okumbweeleka nomunkhima mauhololokela mwoonthwe.+
19 Mokonda ovipuka aviho viatungwa, vikevelela umwe vala ovana va Huku vaholololwe.+
20 Viokwatungwa aviho vianthikulukila vala kokutoyesa,+ ha kokwetyihanda kwavio mahi otyo ou wevitahulilako vihule umwe vala kokukevela
21 okuti aviho viokwatungwa maviyovoka+ koupika wolutu luvola, viyovokele momunkhima wovana va Huku.
22 Mokonda tutyii okuti aviho evi viokwatungwa vikalela vala okukema, no pahetyino vala aviho viaihamenwa.
23 Ngwe haviovio vala, mwene noonthwe umwe, onthwe vomphepo, tuli vala nokukema+ nkhele mokukevela twaalulwe tulinge ovana,*+ mokukevela otyilikutila tyituyovole momalutu etu aa.
24 Tyetuyovola umwe vala otyetyi tukevelela; mahi ngwe otyipuka weete otyo hatyo vali ukevela, okuti omunthu ukevelela otyipuka eete-ale?
25 Mahi okukevelela+ etyi weheete,+ opo ukevela-ko umwe vala, opu umwe elundo.+
26 Ongootyo omphepo ikola itwaavela ononkhono tyina twahapamene;+ pamwe neetyi vala twiita melikwambelo katutyii, mahi omphepo ikola itupopilako namphila tyitunda vala kokukema, apahapopiwa ondaka.
27 Mwene ou utala momitima,+ oo wii etyi omphepo yahanda, mokonda oyo iitila-ko ovasukuki mweetyi Huku ahanda.
28 Onthwe tutyii okuti Huku ovipuka aviho atunga uvilinga viundapele kokulike, vipe ouwa ava vehole Huku, ava vakongelwa momphango yae;+
29 mokonda nkhele tyanthyimbi ava ankho makongo uvei, wapanga vapole otyifwika Tyomona wae+ opo ngwe alinge otyiveli+ tya vakwavo.+
30 Ngwe tupu, ava apanga,+ navo eveihana;+ ovo aihana navo eveti onondingaviwa.+ Konyima pahe ava ati onondingaviwa ovo ankhimaneka.+
31 Pahe oityi vali matupopi movipuka ovio? Ine Huku wahula kwoonthwe, opo onthwe olie utuvila?+
32 Ngwe tyina ayeka umwe Omona wae mwene etupakulila-e umwe atuho,+ okuti kamavandeka-ko vali, mokankhenda kae etwaavela ovipuka ovikwavo?
33 Olie metyivili okuhunga ava Huku akoya?+ Mwene uveti onondingaviwa o Huku Yatyo.+
34 Opo olie uvevela onombei? Kilisitu Sesusi wankhile, apindulwa-po vali kovokwankhia, pahe uli kokulio kwa Huku,+ oe utwiitilako.+
35 Otyityi tyityivila okutuhondovola kolwembia lwa Kilisitu?+ Okuti ononkhumbi, okuhulilwa, okuhukaiswa, ondyala, epene, okuhungikwa kononkhia, omutunga?+
36 Tyahonekwa-le tyatiwa: “Onthiki aiho tupakulwa vala kononkhia kombanda yove; twalinga onongi mbapambulwa-po mbwiipawe.”+
37 Mahi ngwe, onthwe tuli umwe nokutyivila movipuka viatyo aviho,+ walingile ou wetulinga olwembia.
38 Mwene ame ndyityii umwe, tyati vala ononkhia, omwenyo, onoandyu, ovatumini, ovipuka vikahi-ko, ovipuka maviya, ounene,+
39 eulu, o mombwelo, otyipuka otyikwavo vali hamwe tyatungwa, petupu-ale etyi tyityivila okutuhondovola kolwembia lwa Huku luli mu Kilisitu Sesusi Tatekulu yetu.
Outoi
^ Ine, “momphepo ikola.”
^ Melaka Liokonthuko: “Omphepo.” Mo Ngeleku, pneuma.
^ Otyo mo Alamaiku okuti “ove Tate.”
^ Melaka Liokonthuko: “Ovinyango viotete.”
