Ovakoyesi 15:1-20
-
Sasau ukondolela ova Filisitiya etyi vemulinga (1-20)
15 Etyi pakala, nthiki imwe pomuvo wokuteya otiliku, Sasau aende komukai wae asingi* otyinkhombo. Etyi ehika ati: “Nahanda okunyingila mondywo* yomukai wange.” Mahi he-ivi ehemuyeke anyingile.
2 He-ivi ati: “Ame nasoka okuti ‘hamwe kumuhande-ale.’+ Nemwavela umwe povalume vokwekulandulile.+ Ondenge yae omuwa vali kwe, hae vala upola-po?”
3 Mahi Sasau ati: “Hono ova Filisitiya kavapondola okumbela onombei mbeetyi mandyivelingi.”
4 Sasau akwata omalunga 300. Akutu omalunga evali-evali momityila, eekutila ovihihi pokati kao.
5 Apake otupia kovihihi ovio, atahela omalunga movilia momapia ova Filisitiya. Aayakesa atyiho, ovipandi viovilia novilia vieheneteywe nomapia omiti vionouva no omindyambi.
6 Ova Filisitiya avapulu okuti: “Olie walinga ñgaa?” Avevepopila okuti: “O Sasau he-ivi yomu Timinaa, mokonda he-ivi* wemupola omukai wae emwavela umwe povalume vemulandulile.”+ Ova Filisitiya avaende-ko avakwata omukai wa Sasau na he aveveyumbu motupia.+
7 Sasau evepopila okuti: “Etyi mwalinga ngootyo, himakala pohi atee ndyimukondolela etyi mwandinga.”+
8 Ehimbika okuvanga wike-wike,* aipaa ovanthu ovanyingi monthiki oyo. Pahe aende no meleva lionkhanda yo ko Etau.
9 Konyima ova Filisitiya aveya, avaongo onthanda mo Sundaa avakala nokuliseta-seta mo Lei.+
10 Ovalume vo Sundaa avevepulu okuti: “Oityi mweya okutulwisila?” Ova Filisitiya avakumbulula okuti: “Tweya okukwata* Sasau, tukemulinge ngeetyi etulinga.”
11 Ovalume vo Sundaa 3.000 avaende no meleva lyo monkhanda ko Etau avapopila Sasau okuti: “Ove kutyii okuti ova Filisitiya vena vali ononkhono ku onthwe?+ Omokonda yatyi wetulingila ñgaa?” Evepopila okuti: “Ame nevelinga vala etyi navo vandinga.”
12 Mahi avemupopila okuti: “Tweya okukukwata,* tukekupakule kova Filisitiya.” Sasau evepopila okuti: “Popiei okuti kamamundwisa, amwaane.”
13 Avemupopila okuti: “Matukukutu vala atukekupakula kuvo, onthwe kamatukwipaa.”
Avemukutu nomapanda evali omape, meleva avemupolo-mo.
14 Etyi vehika ko Lei, ova Filisitiya etyi vemumona avakwililila nehambu. Omphepo ya Siovaa aimwavela ononkhono,+ omapanda eli komavoko ae aakala ngonongoi mbomulinya mbavauka notupia, komavoko ae aatoko-ko.+
15 Avasi olupanda lwotyimbulu, lwahavolele, atandaveka okuvoko elupolo-po, aipaa nalo ovalume 1.000.+
16 Sasau ati:
“Nolupanda lwike lwotyimbulu neveipaa andyiveongiya ononthunthu!*
Nolupanda lwike lwotyimbulu naipaa ovalume 1.000.”+
17 Etyi amana okupopia, ayumbuhi olupanda ena-lo, omphangu oyo eiluku okuti o Lamate-Lei.*+
18 Aliwa unene nohunga, eliyave ku Siovaa ati: “Ove, ove waetela omuundapi wove eyovo enene. Okuti pahe mandyinkhi kohunga, andyitokela pomavoko a vana vahaile ekwendye?”
19 Huku aikula metoto lili ko Lei amutundu omaande.+ Etyi Sasau anwa akala vali nononkhono,* apame. Otyo alukila omphangu oyo ikala ko Lei okuti o Ene-Akolee* atee hono.
20 Sasau akala omukoyesi wova Isilayeli pononthiki mbova Filisitiya momanima 20.+
Outoi
^ Ine, “atyindi.”
^ Ine, “mondywo yo koluhinyi.”
^ Ine, “omukwelume.”
^ Melaka Liokonthuko: “Avangela otyikalo pontho.”
^ Ine, “okukuta.”
^ Ine, “okukukuta.”
^ Ine, “ononthumbo.”
^ Tyihangununa okuti: “Omphangu yaya peulu yolupanda.”
^ Melaka Liokonthuko: “Akala vali nomphepo.”
^ Tyihangununa okuti: “Ondyivi-ndyivi ya una wiita.”
