Oviimbo 71:1-24
71 Siovaa ame natilila mwoove,
Wahayeke ndyikunde.+
2 Ndyovole-vo, nthyukulule-vo mokonda ove umuviuki.
Yendelekela-vo okutwi kwove kwaame* ondyovola.+
3 Linga-vo onkhanda yange yokwapama,Omu ame ndyipondola okutilila apeho.
Tuma-vo omunthu undyovola,Mokonda ove unkhanda yange, ove tyimphaka tyange ndyiholama.+
4 Huku yange, ndyovole-vo peke lionondingavivi,+Peke lyo wokuna onya.
5 Mokonda ame ndyikevelela vala kwoove Tatekulu Hamba Onene Siovaa.Tundee poututu ame ndyiyumba vala onthumbi mwoove.+
6 Tundee etyi natyitwa ame ndyitei vala kwoove.Ove wamphola meimo lya mee.+
Ame ndyikuhivilika apeho.
7 Ovanthu ovanyingi vahuva unene tyina vanthala,Mahi ove, ove tyiholamo tyange tyapama.
8 Momulungu wange mweyula omunkhima wove,+Onthiki aiho ame ndyihipulula omunkhima wove.
9 Wahandyeke-po tyina namakulupa,+Wahandyeke-po tyina nehena vali ononkhono.+
10 Onondyale mbange mbumphopia omapita,Vokuhanda okumphola omwenyo wange,* velipakaila-mo okundinga omapita,+
11 Vati: “Huku wemuyeka-po.
Muhupulei amumukwata petupu ou memuyovola.”+
12 Huku yange, wahakale kokule naame.
Huku yange, kanyauka endyu-vo unkhwateseko.+
13 Vokundyele*Vakundiswe avanyimwa-ko.+
Vokunthyandela ononkhumbi,Vakunde avaunduka.+
14 Mahi ame mandyitwalako okukevelela.Pahe mandyikuhivilika vali unene.
15 Omulungu wange maukahipulula ouviuki wove,+Onthiki aiho maukahipulula ovilinga viove viokuyovola,Namphila ovinyingi unene nehevivili-ale okuvivalula.*+
16 Mandyiende andyikahipulula ovilinga viove ovinene,Tatekulu Hamba Onene Siovaa.Mandyikahipulula ouviuki wove, ouviuki wove vala.
17 Huku yange, ove wandongesa tundee pouna,+No pahetyino ndyipopia vala ovilinga viove vihuvisa.+
18 Nga ndyikulupa, onohuki ambulingi onongonga, Huku yange, wahandyeke.+
Ndyeke ndyikahipulule ounanene wove* kwaava vekeya,Ononkhono mbove kovanthu aveho mavakatyitwa.+
19 Huku yange, okuviukisa kwove kuhika keulu.+Ove walinga ovipuka ovinene.Huku yange, olie weelekwa noove?+
20 Namphila wandyeka ndyimone emone, ndyimone onkhumbi,+Mphe vali omafa.Mphole-vo kohi yeheke.*+
21 Ndyawise vali mounene wange,Liseta-vo naame, mphameke.
22 Ame mandyikuhilivika novihumba,Ove ukakatela kotyili tyove, Huku yange.+
Mandyiimbi nkhuhilivike* notyisandyi,Ove Mukwa-ukola wa Isilayeli.
23 Omilungu viange mavikwiilila putyina ndyiimba ndyikuhilivika,+Mokonda wayovola omwenyo wange.*+
24 Elaka liange malikahipulula okuviukisa* kwove onthiki aiho,+Mokonda vokuhanda ndyihanywe-ko mavakakunda, mavakawilila.+
Outoi
^ Ine, “nyongama onthehelela.”
^ Ine, “ohande yange.”
^ Ine, “vokuyele ohande yange.”
^ Ine, “okuvinoñgonoka.”
^ Melaka Liokonthuko: “Okuvoko kwove.”
^ Ine, “yomeva.”
^ Ine, “andyihindi.”
^ Ine, “wahukulula ohande yange.”
^ Ine, “malikasokolola kouviuki.”
