Ovilinga Viovatumwa 25:1-27
25 Fesitu+ etyi eya motyilongo, ngae ukala kotyipundi, wakala vala ononthiki ononthatu atundu ko Sesaleya aende no ko Selusalei.
2 Ava ononkhalamutwe mbovanakwa, nomanene atyo omo Sundaa avemupopila onondaka vena-mbo na Paulu.+ Avakengelela Fesitu
3 evetumine-vo* vala Paulu aye ko Selusalei. Ngwe ankho vahanda vakayolamene Paulu mondyila,+ vemwipae.
4 Mahi Fesitu eveti Paulu makala vala mo Sesaleya, naame kuno himasete-ko-ale mandyikondoka.
5 Eveti: “Onwe vakulu vatyo lipungei, twende atuho noonwe mukapopile kuna tukatale ine omulume una una etyi alinga tyapenga.”+
6 Akala umwe navo ononthiki mbukehika petyinana no pekwii umwe, pahe alauka no ko Sesaleya, muhuka lya mukwavo, apumphama kotyipundi tyonomphela, atumu Paulu eye.
7 Ngwe etyi eya anyingila, ova Sundaa vokwatunda ko Selusalei avemwoongelela, otyo vemutendeleya vala ovipuka ovinene, ovipuka umwe navo mwene ankho vatataula vala.+
8 Mwene Paulu apopi vemwiive ati: “Ame nati umwe anahapengehile Movitumino viova Sundaa, anahapengehile mondywo ya Huku, anahapengehile ku Sesale.”+
9 Ou Fesitu tyokwahanda okuhumbwa nova Sundaa,+ apulu Paulu ati: “Wahanda wende no ko Selusalei ngako omphela yove ikapopila, ukapopie ovipuka ovio?”
10 Mahi Paulu ati: “Ame pano ndyili, ndyitai-ale potyipundi tyonomphela tya Sesale, apa umwe onomphela mbupopila-le. Ame ndyitupu etyi nalinga tyapenga kova Sundaa, noove utyeete umwe.
11 Ine tyili ame ndyindingavivi, pahe ñgaa ndyina umwe etyi napengesa tyindyipaesa,+ ame hiti nahaipawe; mahi ine tupu evi ovalume ava veli nokupopia ñgaa vevihinda vala haviotyili-ko, opo hipondola vala okupakulwa peke liavo otyali. Opo omphela ei yende ku Sesale!”+
12 Etyi pahe Fesitu atomphola no vokumupakaila-mo, emupopila ati: “Mwene ove waita yende ku Sesale. Pahe ku Sesale oko umwe mayeende.”
13 Apakala umwe ononthiki, hono ohamba Angilipa na Mbelenise aveya mo Sesaleya, veya okulikukunya-po na Fesitu.
14 Mokonda ankho valala-ko umwe ononthiki, ou Fesitu apopila ohamba omphela ya Paulu ati:
“Kuno ndyina omulume umwe Felisi asa-le mokaleya,
15 etyi naya ko Selusalei ononkhalamutwe mbovanakwa novakulu vatyo ova Sundaa avakolo ovipuka vati alinga,+ avati ñgeno omphela iwila vala kwe.
16 Ame andyiveti, otyo ha tyova Loma, omunthu kapakulwa vala ngootyo ku ava ena navo onondaka, ngwe ahapumphamene-vo tyipala na tyipala no vokwemuhunga mwene nae apopi-vo atehelwe.+
17 Etyi pahe veya na kuno, ame anahasete-ale vali, veya vala ngo hono muhuka tyee andyipumphama kotyipundi tyonomphela, andyitumu vekemupole.
18 Vakatuka vokwemuhunga, evi ñgeno vitiwa-vo viapenga vina havio-ko vapopia alinga.+
19 Vana naina velinana vala viavo evi viokufenda viono huku,*+ no tyomulume ou vati o Sesusi, ou wokwankhia-le, ou Paulu uti una omwenyo.+
20 Etyi natala ame yamphona vala, apa ndyiitwala napo hipelwete, andyimupulu ine hamwe mwene wahanda ende, omphela yae ikapopile ko Selusalei, oko vakapopile ovipuka ovio.+
21 Mahi ngwe Paulu aiti nkhele akale vala ngootyo tyakwatwa tukevele etyi Angusitu*+ mapopi, ame pahe andyiti akale ngootyo ndyimutume ku Sesale.”
22 Angilipa apopila Fesitu ati: “Naame nahanda omulume oo mwene ndyimwiive.”+ Ngwe ati: “Muhuka momwiivi.”
23 Kwatya muhuka lya mukwavo, atyiti na Angilipa na Mbelenise aveya avanyingila mombonge, tyina veya ñgaa valemwa vala, veya novanene vatyo vomafwalali, nomanene atyo o mepunda-umbo; Fesitu atumu vaete Paulu, avekemweta.
24 Pahe Fesitu ati: “Hamba Angilipa, noonwe amuho tuna onwe pano, mumweete omulume ou ova Sundaa aveho veli nokundyita, tyilinge ko Selusalei tyilinge va kuno, omulume vati kehiwa vali okukala nomwenyo.+
25 Mahi netyimona naina utupu-ale etyi alinga tyimwipaesa.+ Etyi pahe mwene aita yende ku Angusitu, naame andyiti umwe ende.
26 Mahi etyi ndyihonekela-vo Komukulu nkhele hityeete. Pahe nemweeta pano pwoonwe amuho, haunene nemweetela ove, Hamba Angilipa, na mutale ei mukoya-po hamwe naame ndyimona-vo etyi ndyihoneka.
27 Mokonda ame katyitavela ndyitume vala ngootyo onkhwatwa, anahapopi-vo etyi akwatelwa.”
Outoi
^ Melaka Liokonthuko: “Avaiti evelinge otyali evetume-e.”
^ Ine, “vielongeso liavo.”
^ Enyina lipewa ou utumina o Loma, henyina-ko liomunthu.
