Selemiya 50:1-46
50 Ei ondaka Siovaa apopia ipopia o Mbambilonia,+ otyilongo tyova Kalindeya, etyi atuma omuuli Selemiya, yati:
2 “Ketyipopiei movanthu vovilongo, tyiivisei.
Yelulei otyilekesa,* tyiivisei.
Mwahaholekei natyike!
Popiei muti: ‘O Mbambilonia veinyingila.+
O Mbele yakunda.+
Melondake wapaalala.
Ovilolo viatyo, viakunda.
Ovika-huku viatyo vitoyesa* viapaalala.’
3 Mokonda, kuna ovanthu votyilongo tyimwe vatunda kombanda veyeendela.+
Otyilongo tyatyo etyi vetyilinga tyitilisa owoma;Petupu vali ou ukala-mo.
Atyiho tyakahateka, novanthu, novinyama;Vapita.”
4 “Pononthiki opo, pomuvo watyo opo,” o Siovaa wetyipopia, “ovanthu vomo Isilayeli novanthu vomo Sundaa mavakakongoloka aveho.+ Mavakaenda nokulila,+ aveho mavakaovola Siovaa Huku yavo.+
5 Mavakapula ondyila yokwenda no ko Siyau, ngako vakapilukisila otyipala tyavo,+ avati: ‘Endywei, tuliwanekei na Siovaa momphango yahapu ovanthu vahakalimbwa vali.’+
6 Ovanthu vange pahe valinga otyunda tyonongi mbavomba.+ Ovanthita vambo vembuvombesa.+ Vembutwala konomphunda, vembutyamaisa monomphunda, no movipunda. Ambulimbwa-po apa mbwoombaila.
7 Aveho vembuvasa, vembulia-po,+ onondyale mbavo vati: ‘Onthwe tutupu onombei mwene ovo valinga onkhali ku Siovaa, no komphangu kukala okuviukisa, komphamekelo yonombwale mbavo, Siovaa.’”
8 “Tundei-mo mo Mbambilonia,Lupukei-mo motyilongo tyova Kalindeya,+Kalei ngovipako vitenga komutwe wovikwavo motyunda.
9 Ame oo ndyikatulila Mbambilonia, ndyili nokuyeetelaOvanthu vamwe ovanyingi-nyingi vovilongo vyo kombanda.+
Maveya tyamaneka, maiveilwisa;Oku mavatumbukila, oko maveinyingilila.
Onohevo mbavo mbulinga ngo mbomukwa-vita,Vokuna ovana mbuvesa tyehena ovana,+Okupasulwa kambulikondokela.
10 O Kalindeya mavekeityinda-po.+
Aveho mavekeipunda, mavakatuuka-po umwe,”+ o Siovaa wetyipopia.
11 “Mokonda onwe tyenyi ankho okuhambukwa vala,+ okuhela valaPokupunda epingo liange.+
Onwe ankho muhombauka* uti vala onthane ili meholi liatalala,Amulingi ngonkhambe ikwena.
12 Nyoko pahe wakunda.+
Wokwekutyita welivela.
Tala! Povilongo, oe walinga-po omututu watyo,Walinga otyipembe tyakukuta, walinga oluhandya.+
13 Mokonda yonyengo ya Siovaa, epunda-umbo olio kamalikalwa-kalwa vali;+Malilingi umwe ekongola.+
Aveho mavakakwata mo Mbambilonia, mavakatumphuluka,Mavakahika omwelwa mokonda yovihuna aviho liamona.+
14 Endywei tyamaneka mulwise o Mbambilonia kononthele ambuho,Amuho onwe vokulunda* ononkhondyi.
Iyahei, mwahaevelei onohevo,+Mokonda yaleva Siovaa, yalinga onkhali.+
15 Yuululilei onkhu yovilwa kononthele ambuho.
Yeliheka.*
Onomphandyi mbayo mbatoka, ovimato viayo viahanyaunwa-po+Mokonda yonyengo ya Siovaa.+
Ilingei etyi yemulingaile.
Ilingei ngeetyi yalinga.+
16 Tetei-ko omukuni mo Mbambilonia,No ou ukwata ofoso pokuteya.+
Mokonda yomutunga wanumana, munthu na munthu makakondoka kovanthu vae,Munthu na munthu makatilila kotyilongo tyae.+
17 “Ovanthu vomo Isilayeli valinga ngonongi mbavomba.+ Ononkhulika mbeveyandyanesa.+ Yatenga umwe okumbulia-po, ohamba yo Asilia;+ pahe, Nambukondonosole* ohamba yo Mbambilonia akokota omankhipa ambo.+
18 Pahe, etyi otyo tyapopia Siovaa womambamba ovita, Huku ya Isilayeli wati: ‘Ame mandyilingi ohamba yo Mbambilonia notyilongo tyayo ngeetyi nalinga ohamba yo Asilia.+
19 Mandyikakondola Isilayeli komalihilo ae,+ akalila ko Kalumelu no ko Mbasaa.+ Makalila monomphunda mbo Efalaii+ no mbo Sileyande+ ekuta.’”*
20 “Pononthiki opo, pomuvo watyo opo,” o Siovaa wetyipopia,“Onombei mba Isilayeli mambukaovolwa,Mahi kambukavasiwa,Ononkhali mba Sundaa kambukavasiwa,Mokonda mandyikaevela ava mandyihupisa.”+
21 “Enda kalwise otyilongo tyo Melataii no vokukala mo Pekonde.+
Ovanthu vatyo vaipawe, avahanywa-ko* aveho,” o Siovaa wetyipopia.
“Linga atyiho nekutuma.
22 Mwiivalela omuhindo wovilwa motyilongo,Otyinimawe tyimwe otyinene.
23 Tala etyi ohamala* ankho ityopa otyilongo atyiho yatyokwa, yatipaulwa!+
Tala etyi o Mbambilonia pahe yakala etyi tyitilisa owoma ovanthu vovilongo!+
24 Nekutela eliva ove Mbambilonia, ove wankhia-mo,Wankhia-mo otyo wehetyii.
Ove wavasiwa, wakwatwa,+Mokonda walwisa Siovaa.
25 Siovaa waikula potyilimba* tyae,Ukahi nokulupula pondye oviti vionyengo yae.+
Mokonda Tatekulu Ohamba Onene, Siovaa womambamba ovita, una otyilinga malingiMotyilongo tyova Kalindeya.
26 Endywei muhanye-po ohika ei, onwe vokokule.+
Patulei kovimbundu viayo.+
Yoongiyei ngovilia,
Ihanyei-po aiho.*+
Mwahahupe nawike.
27 Ipaei onondume-tane mbamo ambuho;+Mbutwalwe oku mbukaipaelwa, mbukaipawe.
Tatiei mbaetesa, mambupeseka, onthiki yambo yeya-po,Onthiki yokutala etyi mbalinga yeya-po!
28 Kwivalela ondaka yo vokukahomboka,Vokwataula kotyilongo tyo Mbambilonia,Opo vakapopie ko Siyau onyengo ya Siovaa Huku yetu,Onyengo ena-yo mokonda yondywo yae.+
29 Kongelei o Mbambilonia vokuyaha nononkhondyi,Aveho vokulunda* ononkhondyi.+
Ongei onthanda lisetei nayo; mwahahupisei nawike.
Mulingei etyi tyata movilinga viae.+
Mulingei etyi emulinga.+
Mokonda welipaka-ko, waleva Siovaa,Waleva Omukwa-ukola wa Isilayeli.+
30 Otyo ovakwendye vamo mavatokelela ponopalasa,+Ovakwa-vita vatyo avanyimwa-ko* aveho monthiki oyo,” o Siovaa wetyipopia.
31 “Tala! Himekuyeke+ ove wokwehena onondunge,”+ o Tatekulu Ohamba Onene, Siovaa womambamba ovita wetyipopia,“Mokonda onthiki yove ina nokuya-po, onthiki matulipulu noove.
32 Ove wokwehena onondunge mokelipunduka, okatoka,Petupu ou mekekupindula-po.+
Mandyikapaka otupia komapunda-umbo ove,Atukalia-po atyiho tyili ponthele yove.”
33 Etyi otyo tyapopia Siovaa womambamba ovita wati:
“Ovanthu vomo Isilayeli no vomo Sundaa vaihamenwa,Aveho vevekwata vevetwala koupika.+
Kavetavelele okuveyeka vaye.+
34 Mahi Omuyovoli wavo wapama.+
Utiwa o Siovaa womambamba ovita.+
Mwene makaamena omphela yavo,+Opo otyilongo tyavo tyikafime-po,+Ahahavalesa ovanthu vokukala mo Mbambilonia.”+
35 “Makuya omutunga umwe maweendela ova Kalindeya,” o Siovaa wetyipopia,“Maweendela vokukala mo Mbambilonia, novanene vatyo, novanongo vatyo.+
36 Oyoo omutunga maweendela ava vapopia etyi tyahai na mutwe,* mavalingi ngovityova.
Oyoo omutunga maweendela ovakwa-vita vatyo, avapaalala.+
37 Oyoo omutunga maweendela ononkhambe mbavo, nomatemba avo ovilwa,Novanthu aveho vovilongo ovikwavo vakala-mo,Mavakakala umwe ngovakai.+
Oyoo omutunga maweendela olumono lwavo, alukapundwa.+
38 Ehanyauno oliolio malieendela omaande ayo, aakakukuta.+
Mokonda, otyilongo tyovilolo vianthilwa.+Mokonda yovililenya viavo vitilisa owoma, vakala ngomaova.
39 Otyo otyo mamukakalela ovinyama vyo moluhanda, novinyama viokuulula,Nonompho ngamo mbukakala.+
Kamamukakala-kala vali natyike,Nii vala katyikalinga vali otyilongo tyikalwa atee umwe kovanthu vekeya.”+
40 “Matyikakala ngeetyi tyalingilwe o Sondoma, no Ngomola,+ nomapunda-umbo ali popepi novilongo ovio etyi Huku eehanya-ko,”+ o Siovaa wetyipopia, “nawike makakala-mo, petupu omulume makatunga-mo.+
41 Tala! Ovanthu votyilongo tyimwe ovoo veya, vatundilila kombanda;Ovanthu votyilongo otyinene, vena onohamba ononene+ mavakakatuka,Avakatunda kovilongo viokokule-kule viohi.+
42 Vamaneka ononkhondyi nomaonga.+
Vena onya, kamavalingi okankhenda.+
Omuhindo wavo uti omaande elunga atutumba,+Tyina veya tyavelama kononkhambe mbavo.
Velipaka kumwe, veya vamaneka vekulwise, ove mona omukainthu wo Mbambilonia.+
43 Ohamba yo Mbambilonia ina etyi yeiva tyayemba kuvo,+Omavoko ae ayendyelela.+
Weihamenwa,Wiivite omalukeno alinga ngo omukai ukutula.
44 “Tala! Pena umwe maendela omalihilo okwapama, ngonkhulika itunda motyiteta tyavinda tyo ko Solondau, mahi kamapakala-le ehimbwe, mandyikevetaata avaende kokule nayo. Mandyikemunakela ou wokwakoywa.+ Olie ulifwe naame, olie upondola okumphatana? Omunthita patyi upondola okulipambeka naame?+
45 Onwe valume, tehelelei etyi Siovaa ati metyilingi* o Mbambilonia,+ neetyi mahande okulinga otyilongo tyova Kalindeya:
Onongi mambukakokelwa kokule.
Apa mbukala, mapakahanyaunwa,* kombanda yavo.+
46 Omutitimo wo Mbambilonia apa munyingilwa, maukateketesa ohi,Onkhu yatyo maikeivala kovanthu vovilongo.”+
Outoi
^ Ine, “otyipandyi tyenyingilikilo.”
^ Ondaka yo Hembeleu yapopiwa apa, yelikwata kumwe “nomatahi,” ondaka yokupenyenyeka.
^ Ine, “muhombana, muhela.”
^ Melaka Liokonthuko: “Vokuliata.”
^ Melaka Liokonthuko: “Yaeta okuvoko kwayo.”
^ Melaka Liokonthuko: “Nambukondolosole,” vamwe ankho ongootyo velihoneka.
^ Ine, “ohande yae aikekuta.”
^ Ine, “avapakulwa kehanyauno.”
^ Ine, “ondyundo.”
^ Ine, “otyivo-tyinene.”
^ Ine, “ipakulei kehanyauno.”
^ Melaka Liokonthuko: “Vokuliata.”
^ Melaka Liokonthuko: “Aati filuu.”
^ Ine, “ovauli vomatutu.”
^ Ine, “alondola.”
^ Ine, “omalihilo maakahanyaunwa.”