OVE uhinangela omokonda yatyi oandyu imwe ya Huku yakalela Satanasi Eliapu? — Omokonda ankho elungavi ya yahanda okufendwa, pahe atyitukilapo Huku. Okuti kuna onoandyu mbumwe mbahulile koumphuki wa Satanasi? — Eenga, kuna umwe. Ombimbiliya ipopia onoandyu ombo mbahula ku Satanasi okuti, ovilulu. — Eholololo 12:9.

Okuti onoandyu ombu onondingavivi mbutavela okuti kuna Huku? — Ombimbiliya ipopia okuti ‘ovilulu vitavela okuti kuna Huku.’ (Tiaku 2:19) Mahi pahe mbumutila owoma mokonda mbutyii okuti Huku meya okumbuhanyako mokonda yovipuka ovivi mbalinga. Ovipuka patyi ovivi mbalinga?—

Ombimbiliya ipopia onoandyu mbatunda kuna keulu, oku mwene ankho mbuna umwe okukala, ambuya okukala pano pohi ngovanthu. Mbalingile ngootyo mokonda ankho mbuhanda okulala novahikwena vamwe ovawa veli pano pohi. (Gênesis 6:1, 2; Sunda 6) Oityi ove wii tyayemba kotyinepo tyopoula? —

Otyinepo tyopoula oputyina omulume nomukai velihole valala kumwe. Konyima pamwe pahe omukai akala neimo. Mahi onoandyu kambupondola okulinga otyinepo tyopoula. Huku wapopia okuti ovanthu vala velinepa vapondola okulinga otyinepo tyopoula. Opo pahe tyina vamakala nomona mavemutekula aveho vevali.

Etyi onoandyu mbuna onomphuki mba tyituka ovanthu ambulala novakai pano pohi ambukala novana, etyi vekula, avakala ovanene unene. Ankho ovakalavi unene tupu ankho vaveta vala vakwavo. Pahe Huku aetako ombila unene opo ahanyeko ovanthu onondingavivi kumwe nomakihi oo. Mahi Huku apopila Nowee opo atunge owato, ombaluku imwe onene opo muhupile ovanthu vehehi ankho valinga etyi tyaviuka. Omulongesi Omunene wati otyiwa tuhinangele etyi tyaendeleko pombila unene. — Gênesis 6:3, 4, 13, 14; Luka 17:26, 27.

Etyi Ombila onene yaloka, utyii tyamonekele no noandyu onondingavivi? — Mbayekelepo okukala ovanthu aambukondoka keulu. Mahi pahe kambupondola vali okukala onoandyu mba Huku, ambukala onoandyu mba Satanasi, ovilulu. Ya oityi tyamonekele novana ovakalavi vono andyu ombo? — Vaipaelwe nombila onene kumwe novanthu vana ankho vehetavela Huku.

Okutuka umwe opo pehepano pahe Huku kayeke vali onoandyu mbukale nomalutu ovanthu. Onthwe katumono ovilulu mahi ngwe na hono vitwalako okuyondya ovanthu opo valinge ovipuka ovivi. Pehepano pahe vihongiliya vali unene ovanthu mokonda viatewa keulu opo vikale pano pohi.

Utyii omokonda yatyi twahapondola okumona ovilulu? — Omokonda ngwe kavimonwa komaiho, mahi mwene-mwene okovili umwe. Ombimbiliya ipopia okuti Satanasi ‘likahi nokuyapula ovanthu kombanda yohi aiho.’ — Eholololo 12:9, 12.

Okuti Satanasi novilulu viae vapondola okutuyondya? — Eenga, vapondola umwe okuyondya ine katulunguka, mahi katusukisa okutila owoma. Omulongesi Omunene wati: ‘Eliapu litupu epondolo liokundinga na tyike.’ Otyo tyilekesa okuti ine tutwalako okukala omapanga Huku, ngwe metuyakulila Keliapu noko vilulu viae. — Suau 14:30.

Tuna okunoñgonoka ovipuka ovivi ovilulu viahanda onthwe tulinge. Soka kweetyi: Ovipuka patyi ovivi ovilulu ankho vilinga etyi vili pano pohi? — Etyi Ombila Onene yeheneloke, mbalalele novahikwena, otyipuka tyimwe onoandyu mbahapondola okulinga. Hono ovilulu vihambukwa unene tyina ovanthu valinga vala ovinepo viasila, avehetavela etyi Huku apopia. Nkhele ndyikupule-po tyimwe: Ovalie vena vala okulinga otyinepo tyopoula? — Otyo yatyo, ovanthu vana vala velinepa.

Hono kuna ovana vamwe valinga otyinepo tyopoula, mahi otyo katyilingwa tyapenga. Ombimbiliya ipopia umwe otyipuka omulume nomukai vena. (Levítico 15:1-3) Ovipuka ovio Huku atunga, una etyi evitungila. Otyo Huku ahandela vala ovanthu velinepa ngavo valinga otyinepo tyopoula. Ovilulu vihambukwa unene tyina ovanthu valinga etyi Huku ati katyipondola okulingwa. Vihambukwa tyina omukwendye nomukainthu velikwata-kwata omapita. Ove kuhande okuhambukiswa ovilulu, hatyo? —

Pena vali otyipuka otyikwavo ovilulu vihole Siovaa eyele. Utyii oityi? — Oungangala. (Salmo 11:5) Oungangala oputyina omunthu umwe aveta vakwavo tyawina. Uhinangela etyi ankho ovana vo vilulu valinga.

Ovilulu tupu vityihole tyokutilisa owoma ovanthu. Pamwe vilikembesa umwe avikala ngomunthu wokwankhia. Otyo hono ovanthu vasokela okuti omunthu wokwankhia una ohande yahankhi ipopia no vokuna omwenyo. Ovilulu ovio vilingisisa ovanthu okusoka okuti omunthu tyina amankhi usapo uhande.

Twesukisa okulunguka opo Satanasi novilulu vehetuyondye. Ombimbiliya yati: ‘Satanasi utwalako okulikembesa ngatyina oandyu yotyitei.’ (2 Ova Kolindu 11:14, 15) Mahi tyotyili ovilulu ovikalavi. Matutale etyi vilinga opo noonthwe tukale ovanthu ovakalavi.

Opi ovanthu haunene vatala ovipuka vilekesa omaungangala, novinepo viasila, novilulu? — Haa motelevisau mulekeswa onofilimi, nomawela amwe ayumbilwa mono kombutandole, nono videogames mbumwe, nomo internet? Okutala ine okutanga ovipuka ovio, tyitukalesa omapanga a Huku ine a Satanasi? Oityi ove usoka? —

Olie umwe mwene-mwene uhanda tutale ovipuka ovio? — Eenga, o Satanasi novilulu. Naina oityi ove naame tuna okulinga? — Tuna okutanga nokutehelela ovipuka vikahi nawa, vitukwatesako okukala omapanga a Siovaa. Okuti ove wii otyipuka tyimwe tyikahi nawa tupondola okulinga? —

Ine tulinga etyi tyaviuka opo katwesukisile okutila owoma ovilulu. Sesusi una vali ononkhono tyipona ovilulu, ya mwene navio vina owoma nae. Nthiki imwe ovilulu viapopilile Sesusi okuti: “Weya okutunyima-ko?” (Maluku 1:24) Matuhambukwa unene tyina Sesusi amakahanya-ko Satanasi novilulu viae, hatyo? — Tyina nkhele omuvo wehenehikepo, onthwe tuna onthumbi yokuti Sesusi metuyakulila kovilulu ine katuyeke-po okukala omapanga ae na Tate yae.