• ENIMA ATYITWA: 1941

• OTYILONGO ATYITILWA: BENIN

• EHIPULULO: ANKHO UNA OVAKAI OVANYINGI, TUPU ANKHO UYELE ONOMBANGI MBA SIOVAA

OMWENYO WANGE KOHALE:

Ame ndyikala ko Cotonou epunda-umbo limwe lyo ko Benin. Ongeleya yange ankho o Katolika mahi ankho hiende-ko-ale unene. Potyilongo ankho ndyikala ova Katolika ovanyingi ankho vena ovakai ovanyingi, mokonda pomuvo opo okukala novakai ovanyingi kuvo ankho katyapengele. Etyi pakala ame andyikala novakai vekuana.

Etyi mo 1970 ovanthu vatyitukila-po ovatumini andyisoko okuti pahe otyilongo tyetu matyikala nawa. Naame andyilipake mopulitika. Vana vokuatyitukila-po ovatumini ankho veyele Onombangi mba Siovaa, mokonda kavelipake mopulitika. Naame ankho ndyiyele Onombangi mba Siovaa. Etyi mo 1976 onomisionaliu vatewa motyilongo tyetu, pahe ankho ndyisoka okuti kamavakondoka vali.

OÑGENI OMBIMBILIYA YAPILULULA OMWENYO WANGE:

Otyipuka otyo tyokutyitukila-po ovatumini atyipu mo 1990. Pakala vala katutu onomisionaliu avakondoka vali, otyipuka otyo atyinthyuvisa unene. Andyilipopila okuti ovanthu ava vena umwe Huku. Pomuvo opo andyimono vali ovilinga ovikuavo. Umwe pu ava ndyiundapa navo ankho Ombangi ya Siovaa. Pakala vala katutu, ahimbika okumphopila ovipuka vimwe vyo Mbimbiliya. Andekesa ono tesitu mbumwe mo Mbimbiliya ankho mbupopia okuti Siovaa una oluembia iya uhole etyi tyaviuka. (Deuteronômio 32:4; 1 Suau 4:8) Andyihumbu unene ovipuka ovio. Mokonda ankho nahanda okunoñgonoka Siovaa andyitavela andongaise Ombimbiliya.

Pakala vala katutu andyihimbika okuenda komaliongiyo Onombangi mba Siovaa. Atyinthyuvisa okutala onthyole vena pokati kavo. Ankho nawike ulitala ngatyina avilapo vali ku vakuavo mokonda yotyivala ine mokonda yokuamona. Apeho tyina ankho ndyenda komaliongiyo ankho ndyikala vali nonthumbi yokuti Onombangi mba Siovaa, ovo ovalanduli votyotyili va Sesusi. — Suau 13:35.

Andyinoñgonoka okuti opo ndyikale Ombangi ya Siovaa ndyina okuyeka-po ongeleya yo Katolika. Otyo kuame ankho katyapepukile mokonda ankho ndyilipula oityi ovanthu mavasoko. Siovaa ankhuatesako, etyi palamba omuvo umwe andyitundu-mo umwe.

Nkhele ankho pena vali otyipuka otyikuavo tyalema ndyina okuyeka-po. Nelilongesa mo Mbimbiliya okuti Huku kahande omunthu anepe ovakai ovanyingi. (Gênesis 2: 18-24; Mateusi 19: 4-6) Ku Huku omukai wanepa tete oe umwe omukai wove. Atulihonekesa nomukai wange wotete ovakuavo andyivehenge, mahi otyo ndyivepa umwe evi vesukisa. Etyi pakala vevali navo avakala onombangi mba Siovaa.

OUWA NAPOLA-KO:

Namphila omukai wange nkhele owo Katolika, mahi una onthilo netyi nakoya okuumbila Siovaa. Tyati naame nae, atuho tusoka umwe okuti pahe ndyinkhalamutwe ikahi nawa yombunga.

Ame ankho ndyisoka okuti ine ndyilipaka mo pulitika mandyikuatesako unene otyilongo tyange, naina ankho ndyikahi vala nokulinga ononkhono-puila. Pahe ndyityii umwe okuti Ouhamba wa Huku oo vala mauya okumana-ko ovitateka aviho viovanthu. (Mateusi 6:9, 10) Ndyipandula unene Siovaa wandekesa etyi ndyina okulinga opo ndyikale nomwenyo ukahi nawa.

• ENIMA ATYITWA: 1977

• KOTYILONGO ATYITILWA: BRASIL

• EHIPULULO: ELOMBE LIONGELEYA PENTECOSTAL

OMWENYO WANGE KOHALE:

Nekulila pohika itiwa Itu, mepunda-umbo lyo São Paulo. Pohika yatyo opo, ankho peiiwe umwe okuti pena onongangala ononyingi.

Ame ankho ndyimukalavi natyinda vala omwenyo wasila. Tupu, ankho ndyilandesa omapangwe. Mokueenda kuomuvo andyimono okuti ovipuka evi ndyili nokulinga ine kavinthuala mokaleya, mavindyipaesa. Pahe andyiyeke-po ovipuka ovio andyinyingila mongeleya Pentecostal. Etyi pakala andyikala elombe mongeleya omo.

Ankho ndyisoka okuti mandyityivili okukuatesako ovanthu novilinga ankho ndyilinga mongeleya omo. Atee ankho ndyipopila mo Laliu ovilinga viongeleya, pahe ovanthu ovanyingi ankho vendyii umwe nawa. Mahi mokueenda kuomuvo andyimono okuti ovanthu vongeleya oyo ankho kavesukile-ale na vakuavo tupu ankho kavalingi evi vihambukiswa Huku. Etyi ankho vesuka vali natyo okupola vala onombongo kovanthu. Etyi pakala andyitundu-mo.

OÑGENI OMBIMBILIYA YAPILULULA OMWENYO WANGE:

Etyi nahimbika okulilongesa Ombimbiliya no Nombangi mba Siovaa andyimono okuti velikalela unene no vonongeleya ononkhuavo. Pena ovipuka vivali napandele vali unene. Tyo tete, Onombangi mba Siovaa kavapopi vala okuti tuna okukala nonthyole na Huku na vakuetu, mahi muene vetyilekesa umwe muevi valinga. Tya vali, kavelipake mo pulitika no movilwa. (Isaías 2:4) Ovipuka ovio vivali viankhalesa umwe nonthumbi yokuti navasa ongeleya yotyotyili, ombundi yahita, ondyila yahita ituala komwenyo. — Mateusi 7:13, 14.

Andyimono okuti opo ndyityivile okuhambukiswa Siovaa ankho nesukisa okuyeka-po ovipuka vimwe. Ankho ndyina okusuka vali unene nombunga yange. Tupu ankho ndyina okuliola omutima. Ankho katyapepukile okuyeka-po ovipuka ovio, mahi Siovaa ankhuatesako umwe andyityivili. Omukai wange mokonda ankho ulilongesa-le Ombimbiliya, ahuvu unene etyi nalinga omapiluluko oo, nae liwa-liwa ekulu motyili. Etyi pakala vala katutu atutyimono umwe okuti tuhanda okukala Onombangi mba Siovaa. Atumbatisalwa monthiki ike vala.

OUWA NAPOLA-KO:

Ame nomukai wange tuahambukwa unene mokonda tuetyivila okukuatesako ovana vetu vetatu okukala noupanga wapama na Siovaa. Atuho meumbo tuna ehambu. Ndyipandula unene Siovaa wandekesa otyili tyivasiwa Mondaka yae Ombimbiliya. Tyotyili, otyili tyipilulula umwe omienyo viovanthu! Naame tyamphilulula umwe.

• ENIMA ATYITWA: 1957

• KOTYILONGO ATYITILWA: AUSTRALIA

• EHIPUPULULO: NALI NOVITATEKA OVINYINGI ETYI NDYIMONA

OMWENYO WANGE KOHALE:

Nekulila ko Newcastle, mepunda-umbo litiwa Nova Gales do Sul. Onthue tuatyitwa epandu-vali iya ame, ame tyiveli. Tate ankho unwa unene iya pahe ankho tyiti umwe nae na mee vambeta unene etyi ndyimona. Me ankho umbeta, tupu ankho umphopia vala omapita. Apeho ankho upopia okuti ndyikahi omapita iya mandyikamoneswa ononkhumbi mo ifelunu yotupia. Ovipuka ovio ankho vinthilisa unene owoma.

Mokonda yokuvetwa vala unene, pamwe ankho hiende-ale kosikola. Etyi ndyina omanima 11, andyipolwa koo tate andyitualwa kondyuo imwe yakaputu ngo oko ndyikakala, konyima avampholo-ko vali avanthuala mondyuo yono mandele. Pahe etyi natuukisa omanima 14, mondyuo omo andyihene-mo. Mahi tupu ankho hahandele okukondoka keumbo, pahe ankho ndyikala vala momatapalo pohika pamwe patiwa Kings Cross, ko Sydney.

Momatapalo omo ankho ndyikala, pahe andyilipake vala mokusipa no mokunwa no mokutala ovipuka vihongiliya ovanthu okulinga oundalelapo novipuka ovikuavo vali ovivi. Onthiki imwe pamonekele otyipuka tyimwe tyanthilisile unene owoma. Ankho ndyikala mondyuo yomukulu umwe una ombale amunyingila ovalume vevali veya okumutalelapo. Omukulu oo amphopila okuti kalangalepo, andyikalangalapo umwe, mahi ankho ndyiveivite tyina vekahi nokutomphola. Omukulu oo ankho mahande okundandesa kovalume ovo, ankho vekahi nokupopia okuti mavanthyoleka mombaluku avanthuala ko Japão opo ndyikaundape mombale imwe. Andyitili unene owoma andyilombokela pondyanena otyo ndyiulula ovanthu vankhuateseko.

Andyilivasi nomulume umwe ankho weya okupila ko Sydney, andyimupopila otyitateka tyange. Andyimuiti onombongo ahamphe, amphopila okuti tuende atuho apa nehikila opo ukelikohe nokulia-po katutu. Ame anehemuyeke umwe vali. Etyi pakala enima atulinepe.

OÑGENI OMBIMBILIYA YAPILULULA OMWENYO WANGE:

Etyi nahimbika okulilongesa Ombimbiliya no Nombangi mba Siovaa andyihambukwa unene mahi tupu andyinumana. Nanumanene unene etyi nanoñgonoka okuti Satanasi oe utumonesa ononkhumbi, mokonda ankho nalongeswa vala okuti o Huku utumonesa ononkhumbi. Tupu andyitulu omutima etyi nanoñgonoka okuti etyi nalongeswa tundee po una omatutu vala. Siovaa kamonesa ovanthu ononkhumbi mo ifelunu yotupia.

Tupu andyihuvu unene okutala okuti ovipuka aviho Onombangi mba Siovaa valinga, vaendela umwe muetyi Ombimbiliya ipopia. Kavapopi vala okuti vayumba onthumbi mu Huku mahi muene vetyilekesa umwe mu atyiho valinga. Ame ndyipuilisa unene, namphila ovipuka ankho ndyipopia neevi ndyilinga vitupu-ale oku viapilukila, mahi Onombangi mba Siovaa ankho vena oluembia nonthilo na ame.

Otyipuka ankho ndyilwa umwe natyo olusoke luokuti hisilivila. Ame ankho hilihande, ndyilitoya. Otyipuka otyo tyakalele umwe ehimbwe netyi pahe nakala Ombangi ya Siovaa andyimbatisalwa nkhele ankho ndyitualako okusoka ngotyo. Ankho ndyityi umwe okuti ndyihole unene Siovaa, mahi ankho ndyisoka okuti Siovaa kamakala-le noluembia na ame.

Otyipuka otyo ankho ndyisoka netyiyeka-po vala etyi palamba omanima 15 tundee apa nambatisalwa. Onthiki imwe omukuatate umwe, walingile elongomona apopi o tesitu ya Tiaku 1:23, 24. Ono velesikulu ombo mbueleka Ondaka ya Huku notyilivandyelo, omu tulitalela umwe ngetyi Siovaa etutala. Pahe andyisoko ine etyi ndyimona ku ame tyelikalela netyi Siovaa amona. Tete ankho tyepuiya okutyitavela. Mokonda mwene ankho ndyisoka-le okuti Siovaa kenthyole-ale, ankho tyimphuiya okutavela okuti kumbi makala noluembia naame.

Etyi pakala ononthiki mbumwe, andyitange o tesitu imwe yapilululile unene etyi ankho ndyisoka. Natangele Isaías 1:18, omu Siovaa apopia okuti: “Endywei, pahe endywei tutomphole, tuhonye,”. . . . “Ononkhali mbenyi mbahula okulinga ngatyina uti mbakuhuka, Mambutweleswa ngomeva elikwata.” Ankho ongatyina Siovaa ekahi nokumphopila okuti: “Vicky, Vicky endyu tutomphole, tuhonye. Ame ndyikwii nawa ndyii ononkhali mbove, ndyii etyi tyili momutima wove, ame ndyikuhole.”

Otyinthiki tyina anahalala. No ngotyo ame nkhele ankho hitavela okuti Siovaa unthyole, pahe andyihimbika okusoka kotyilikutila tya Sesusi. Andyityimono okuti Siovaa wapua-elundo na ame, omuvo oo auho ankho ukahi vala nokulinga ovipuka vilekesa okuti unthyole unene. Mahi ovipuka ndyilinga ankho ongatyina ndyimupopila okuti: “Oluembia una na ame kaluhi. Otyilikutila tyomona wove tyitupu-ale esilivilo, katyituuka ndyievelwe ononkhali mbange.” Ongatyina ankho ndyikahi nokukondolela Siovaa otyilikutila tyeyovo. Mahi pahe etyi nasoka umwe nawa kotyilikutila tyeyovo, andyityimono umwe okuti Siovaa unthyole.

OUWA NAPOLA-KO:

Pahe nasukuka iya ndyina ehambu. Otyinepo tyange pahe tyikahi nawa, iya ndyihambukwa unene okupopila vakuetu ovitateka nakala-kala navio. Pahe ndyina oupanga wapama na Siovaa.

• ENIMA ATYITWA: 1974

• KOTYILONGO ATYITILWA: RUSSIA

• EHIPULULO: ANKHO UHOLE UNENE OVIIMBO VITIWA HEAVY-METAL

OMWENYO WANGE KOHALE:

Natyitilwa mepunda-umbo lyo Votkinsk, epunda-umbo ankho mukala omukulu umwe wankhimana uhoneka oviimbo utiwa Tchaikovsky. Onthue ankho tuahepa unene. Tate ankho una ovituwa oviwa mahi ankho unwa unene. Mokonda yotyo ankho tutupu-ale ehambu.

Ame ankho ndyina elundo liokuenda kosikola. Etyi pakala andyihimbika okulitehelela okuti hisilivila. Pahe ankho hipopila-le vali nawike ovipuka viange tupu ankho hiyumbu vali onthumbi movanthu. Ankho tyinumanesa vala okuenda kosikola. Tyina ankho ndyilinga otyilinga tyimwe tyo kosikola ankho hityivili-ale okutyihangununa nawa, no kapuka vala okatutu ñgeno ankho kapopiwa monondaka mbehehi. Pahe pomukanda wange wo kosikola avahoneka-po okuti: “Ketyivili okupopia nawa, ketyivili okuhangununa ovipuka, ketyivili okupopia etyi asoka.” Onondaka ombo ankho mbunumanesa unene pahe ankho tyivilapo vala tyokusoka okuti ndyitupu-ale esilivilo. Pahe andyihimbika vala okulipula oityi neila kouye.

Etyi ndyimukuendye andyihimbika okunwa unene. Tete ankho tyina ndyinwa, ndyikala nawa, mahi pahe tyokunwa atyihimbika okundinga navi. Omwenyo wange ankho kawapepele-ale vali, andyisoyo unene. Pamwe ankho ndyikala vala mondyuo. Pahe andyihimbika okusoka okuliipaa.

Etyi natuukisa omanima 20, apamoneka otyipuka tyimwe tyanthulisile katutu omutima, mahi momuvo wehehi. Andyihimbika okutehelela oviimbo vitiwa heavy-metal. Okuiva oviimbo vina ankho tyinthyambukiswa, tupu andyihimbika okulinga oupanga novanthu ankho vehole oviimbo ovio. Pahe andyikulisa vala onohuki, andyituulwa komakutwi, tupu ankho ndyivala ngetyi ndyivala ovanthu vokuimba oviimbo ndyihole. Andyikala vala omunthu wo nondyaya, wehesukilea-le novipuka, tupu apeho ankho ndyiyayesa vala ombunga yange.

Andyisoko okuti okutehelela oviimbo heavy-metal matyinkhalesa nawa, mahi hatyoko tyamonekele-po. Otyiimbo otyo ankho tyikahi no kunkhalesa omunthu omukuavo! Tupu etyi nanoñgonoka ovipuka ovivi konthele yovilolo ankho ndyifenda andyinumana unene.

Andyihimbika vali okusoka vala okuliipaa. Mahi pahe otyikando etyi ankho ndyihanda umwe okuliipaa. Ankho hityilingi vala mokonda yokusoka oñgeni matyikalesa me. Me ankho unthyole unene iya wandingila ovipuka ovinyingi. Otyipuka otyo pahe ankho tyinumanesa vala unene. Ankho hihande vali okukala nomwenyo tupu ankho hipondola okuliipaa.

Pahe opo ndyihasoke vala unene kovipuka ovio, ankho ndyitanga vala omikanda vimwe ñga vyo ko Russia. Andyivasi-mo ehipululo limwe ankho lipopia One story involved a hero who served in a church. Etyi natanga ehipululo olio na ame andyihande okulingila-vo tyimwe Huku na vakuetu. Andyilikuambela umwe nomutima wange auho. Ame ankho hinelinge-ale otyipuka tyina. Andyimuiti andekese etyi ndyina okulinga ndyikale nomwenyo omuwa. Etyi ankho ndyikahi nokulikuambela tyina ndyitehela omutima wange watula umwe nawa. Apamoneka otyipuka tyimwe Tyanthyuvisile unene. Namana vala okulikuambela Ombangi imwe ya Siovaa avete pepito, amphopila okuti mandongaisa Ombimbiliya. Tyina, ankho elikuambelo liange umwe liakumbululwa. Oyo, oyo umwe onthiki yotete nakala nehambu.

OÑGENI OMBIMBILIYA YAPILULULA OMWENYO WANGE:

Andyiyumbuhi ovipuka aviho vielikuata no tyiimbo heavy-metal. Mahi tyepuiyile unene okutyilinga. Apakala umwe omuvo omunyingi otyo oviimbo vina vihatundu-ale momutwe wange. Apeho tyina ankho ndyikuata pomphangu imwe mapahiki oviimbo ovio ankho ndyihinangela etyi ankho ndyikahi kohale. Mahi ankho hihande okuhonyeka ovipuka vina ovivi novipuka oviwa ankho vili momutima wange. Mokonda yotyo ankho hiende vali pana pahikiswa oviimbo ovio. Tupu tyina pamwe ndyisoka kuvio ankho ndyilikuambela liwa-liwa okulikuambela umwe unene. Okulinga ngotyo atyinkhuatesako okukakala “Nombembwa ya Huku, ipona enoñgonoko aliho.” — Ova Filipu 4:7.

Mokulilongesa Ombimbiliya nanoñgonoka okuti omukilisitau una okupopila vakuavo ovipuka etavela. (Mateusi 28:19, 20) Mahi ame ankho hisoko okuti nthiki imwe naame mandyityilingi. Ovipuka ankho ndyikahi nokulilongesa ankho vinkhalesa nehambu nombembwa. Ankho ndyityii okuti vakuetu navo vena okunoñgonoka ovipuka ovio. Namphila nkhele ankho ndyina owoma mahi andyihimbika umwe okupopila vakuetu evi ndyili nokulilongesa. Okupopila vakuetu otyili tyo Mbimbiliya atyinkhuatesako unene. Atyinkhuatesako okuyumba onthumbi ovipuka aviho ankho ndyili nokulilongesa.

OUWA NAPOLA-KO:

Pahe nanepa iya ame nombunga yange tuna ehambu enene. Nakala nelao liokukuatesako ovanthu ovanyingi okunoñgonoka otyili nakuatesako me nomufikuena tulilandula nae. Okuumbila Siovaa nokukuatesako vakuetu okumunoñgonoka tyampha ehambu limwe enene.