Vavasa Otyipuka Tyimwe Otyiwa Vali
OVANTHU va Huku kavalingi o Natale. Okuti tyina vahalingi o Natale vehole okulivela? Veli nokupumbwa? Ovana vavo vekahi ngatyina vakutwa? Tanga etyi vamwe vapopia.
Eve
Okusoka ku Sesusi Kilisitu: “Pwetyi ankho nehenekale Ombangi ya Siovaa, kokapela ankho ndyendako vala po Natale no po Pasikwa. Ankho ndyendako umwe, mahi nii ankho hisoko-ale ku Sesusi. Pehepano hilingi vali o Natale. Ndyenda komaliongiyo, tupu pahe ndyilongesa ovanthu vanoñgonoke Sesusi!” — EVE, ukala ko AUSTRALIA.
Reuben
Okukala notyali tyihambukiswa: “Ndyihambukwa unene okupewa otyipuka ankho nahakevelela! Ndyilingilapo vakwetu oupuka umwe ouwa. Tyina ndyiveavela-o vahambukwa naame ndyihambukwa.” — REUBEN, ukala ko IRLANDA DO NORTE.
Emily
Okukwatesako vakwetu: “Tyina tuameivi okuti pena ou wavela twii, tuhole okumulingilapo okakulia. Pamwe tumutwaila ononthemo, no nombolo noupuka oukwavo vali maumuhambukiswa. Katutupu okuti tuna vala okutyilinga monthiki yongandi, tutei vala onthiki twahanda okutyilinga, atutyilingi.” — EMILY, ukala ko AUSTRÁLIA.
Wendy
Okuhonyeka ombunga: “Tyina tuliovola nombunga yetu, ovana vanoñgonoka ovo ina-kulu, novo ina-nthu, novo tyepwa tyavo, novo he-nkhai yavo. Mokonda katuovola vala nombunga yetu povipito, kavetukuluminya tukale navo povipito viavo mokonda vetyiale okuti onthwe tuvehole.” — WENDY, ukala ko ILHAS CAIMÃ.
Sandra
Ombembwa: “Ovipuka vilingwa po Natale nii ha viombembwa-ale, palingwa ovipuka ovinyingi vitalula ovanthu avahasoko kombembwa. Pahe omutima wange upumphi mokonda nanoñgonoka oviwa Huku makalingila ovanthu. Ndyina onthumbi yokuti ovana vange mavakakala nehambu liahapu komutwe wandyila.” — SANDRA, ukala ko ESPANHA.