OKAPITULO 37

Okuti Mandyimbatisalwa?

Honeka etyi usoka. Ku ove onondaka ombu mbuli pombuelo mbapopia otyili ine omatutu?

Omunthu wokuhanda okufenda Huku una okumbatisalwa.

□ Otyili

□ Omatutu

Omunthu una okumbatisalwa ahalinge onkhali ku Huku.

□ Otyili

□ Omatutu

Una okumbatisalwa ukayovolwe.

□ Otyili

□ Omatutu

Ine kumbatisalwa, linga-linga oviwa, linga-linga ovivi, Huku kamesuku-ale.

□ Otyili

□ Omatutu

Ine omapanga ove eli nokumbatisalwa, opo ngotyo no ove upondola okumbatisalwa.

□ Otyili

□ Omatutu

INE uli nokulikuatehila ukale noupanga wapama na Huku, ulikuatehila ulinge etyi tyipopia Ombimbiliya, uhole okulongesa vakwenyi Ombimbiliya, opo hamwe uhole okulipula ine pahe upondola okumbatisalwa. Opo utale ine pahe upondola okumbatisalwa, tupopie nawa ovipuka evi viapopiwa konyima.

● Omunthu wokuhanda okufenda Huku una okumbatisalwa.

Otyili. Sesusi wapopia okuti ovanthu aveho vahanda okulinga ovalongwa vae vena okumbatisalwa. (Mateusi 28:19, 20) Utyii-ale okuti Sesusi nae wambatisalelwe? Opo ulinge omulongwa wa Sesusi Kilisitu, no ove una okumbatisalwa. Mahi tyina nkhele wehenembatisalwe, tete una okusoka nawa. Tyokuhanda okumbatisalwa tyina okukala komutima.

● Omunthu una okumbatisalwa ahalinge onkhali ku Huku.

Omatutu. Tyina umbatisalwa, ngotyo una nokupopila ovanthu aveho okuti welipakula-le ku Siovaa. Okuti okutuka umwe onthiki ulipakula ku Siovaa kupondola vali okulinga ovipuka uhole? Au, hatyo-ko. Omunthu ulipakula tupu, omokonda wahanda okulinga etyi Siovaa atuma Mondaka yae Ombimbiliya.

● Una okumbatisalwa ukayovolwe.

Otyili. Ombimbiliya ipopia okuti omunthu wokuhanda okukayovolwa na Huku, tyimwe ena okulinga okumbatisalwa. (1 Petulu 3:21) Mahi hakuti monthiki umbatisalwa ngotyo welipwa-ko mokayovolwa-le. Kupondola vala okumbatisalwa ukayovolwe. Una okumbatisalwa mokonda uhole Siovaa iya wahanda okumufenda apeho. — Maluku 12:29, 30.

● Ine kumbatisalwa, linga-linga oviwa, linga-linga ovivi, Huku kamesuku-ale.

Omatutu. Omukanda wa Tiaku 4:17 wati: “Inkha umwe utyii okulinga etyi tyaviuka mahi ehetyilingi, ukahi nokulinga onkhali.” Onondaka ombo mbupopia ovanthu aveho, ava vokuambatisalwa no vokuahambatisalelwe. Ine pahe wekula, etyi tyaviuka netyi tyapenga utyii, opo katomphole nomukulu umwe omupulu etyi upondola okulinga umbatisalwe. Upondola okupula ovo tate yove, okuti hatyo, opulu omukulu umwe weete okuti uhole Huku.

● Ine omapanga ove eli nokumbatisalwa, opo ngotyo no ove upondola okumbatisalwa.

Omatutu. Tyokumbatisalwa, ove muene una okulihinda-tyo, tyina okutunda komutima. (Salmo 110:3) Una okumbatisalwa vala tyina: (1) wamanoñgonoka nawa etyi Huku akevelela komunthu Ombangi; (2) wamelisoko umwe nawa oti: ‘Ame mandyityivili okulinga atyiho Siovaa akevelela Konombangi mbae.’ — Eclesiastes 5:4, 5.

Ombatisimu Ikola

Okumbatisalwa umona oviwa, mahi apeho hinangela okuti ombatisimu ikola. Okutuka umwe onthiki umbatisalwa una okulinga atyiho wapopila Siovaa etyi welipakula.

Okuti tyina ulitala ñgaa pahe upondola umwe okumbatisalwa? Ine wafwapo, opo upondola okuhambukwa mokonda molingi otyipuka otyiwa vali omunthu apondola okulinga: Okufenda Siovaa nomutima wove auho, nokulikuatehila ulinge ovipuka mavilekesa okuti umuhole unene. — Mateusi 22:36, 37.

ETYI TYILI MOKAPITULU MAKALANDULAKO

Tala ovipuka vimwe vikahi nawa upondola okupanga okulinga movilinga vya Siovaa.

OTESITU OMU YAPOLWA

“Avei omalutu enyi ngotyilikutila tyina omuenyo, tyasukuka, tyitavelwa na Huku, ngotyo mamuumbila Huku nonondunge mbenyi ambuho.” — Ova Loma 12:1.

HETEKELA ETYI

O voho  vekukwateseko uvase mewaneno omunthu upondola okukukwatesako upameke oupanga wove na Siovaa. — Ovilinga 16:1-3.

OKUTI OVE UTYII-ALE . . . ?

Okumbatisalwa tyesukisa unene mokonda otyo tyitwimbukisa okuti onthwe matukayovolwa.  — Ezequiel 9:4-6.

SOKA ETYI UPONDOLA OKULINGA!

Okumbatisalwa, tyikukwatesako onoñgonoka vali nawa etyi Ombimbiliya ilongesa: ․․․․․

Ame nahanda ñgeno ndyipula kovo tate okuti ․․․․․

OITYI OVE USOKA?

● Oityi omunthu ambatisalelwa?

● Oityi tyipondola okutwaala omona kokumbatisalwa vala liwa otyo nkhele omututu?

● Oityi tyipondola okulingisisa omona elikondola ehelipakula, nii ahambatisalwa?

[Onondaka Mbavilapo]

“Okuhinangela okuti ame ndyimunthu wa Huku, nambatisalwa, tyankhuatesako okulinga ovipuka nonondunge, andyilityilika ovipuka vina ankho vipondola okunyona.” — Holly

[Okakasa/Olutalatu]

Omapulo Ayemba Kombatisimu

Oityi tyilekesa ombatisimu? Okuyavekwa momaande oyaulwa-mo, tyilekesa okuti weyeka-po ondyila yoove, wapita mondyila ya Siovaa.

Oityi tyihangununa okupakula omwenyo woove ku Siovaa? Otyo tyilekesa okuti aviho ove wahanda moviyekepo, olingi vala etyi Huku ahanda. (Mateusi 16:24) Okulipakula ku Siovaa, okuti tyina uhanda okumbatisalwa tete nkhele olikwambela.

Oityi una okulinga tyina wamambatisalwa? Una okweendela mweetyi ondaka ya Huku ipopia, nokutyilongesa vakweenyi. Wesukisa okukala epanga lya Huku nokulikwambela nokulilongesa ondaka yae Ombimbiliya. Wesukisa okufenda Siovaa mokonda ove umuhole — tyahakuluminywa na vakwenyi.

Omunthu una okumbatislwa nomanima eñgapi? Petupu eti omunthu atiwa olio ena okumbatisalwa. Mahi una  okukala nonondunge anoñgonoke oityi tyitiwa okulipakula.

Oityi wesukisa okulinga tyina ove wahanda okumbatisalwa mahi ovo tate yove a vati nkhele kevelela? Pamwe vapopia ngootyo mokonda vahanda ove unoñgonoke nawa otyili. Tavela etyi vapopia, tyina ukevelela lilongesa unoñgonoke nawa otyili, opameka oupanga wove na Huku. — 1 Samuel 2:26.

[Okakasa]

Otambela

Usoka Okumbatisalwa?

Tala oñgeni oupanga wove na Huku ukahi mokukumbulula omapulo aa pombwelo. Tyina wehenehoneke ekumbululo liove nkhele tete tanga umwe o tesitu ilipo.

Omo vipuka patyi ove ulekesa okuti uyumba onthumbi mu Siovaa?​ — Salmo 71:5. ․․․․․

Oñgeni ove molekesa okuti utyivila okupunga otyiwa notyivi?​— Ova Hebeleu 5:14. ․․․․․

Okuti apeho ulikwambela? ․․․․․

Ovipuka patyi uhole okwiita tyina ulikwambela?  Omalikwambelo ove alekesa umwe okuti uhole Siovaa? — Salmo 17:6. ․․․․․

Pombwelo apa honeka-po ovipuka uhanda okwiita momalikwambelo ove. ․․․․․

Tuñgapi ove ulinga elilongeso lioulike? — Josué 1:8. ․․․․․

Ovipuka patyi ulilongesa melilongeso liove lioulike? ․․․․․

Pombwelo apa honeka-po ovipuka uhanda okulinga. ․․․․․

Ovilinga viove vina umwe ouwa? (Utyivila okuhangununina vakwenyi ovipuka wii vyo Mbimbiliya? Uhole okukondoka vali kwava walongesile vesuka notyili? Uli nokulikwatehila opo uvase omunthu ulongesa Ombimbiliya?)

□ Yoo □ Au

Okuti ulinga ovilinga vya Huku naapa umwe ovo tate yove vehetyihande? — Ovilinga 5:42.

□ Yoo □ Au

Pombwelo apa honeka-po ovipuka uhanda okulinga movilinga vya Huku. — 2 Timotiu 2:15. ․․․․․

Okuti apeho wenda komaliongiyo ine weenda vala pamwe-pamwe?​ — Ova Hebeleu 10:25. ․․․․․

Oityi ove uhole okulinga momaliongiyo? ․․․․․

Okuti ove wenda komaliongiyo naapa ovoho vahai-ko (tyina vehekutyilika)?

□ Yoo □ Au

Okuti uhambukilwa okulinga etyi Huku ahanda? — Salmo 40:8.

□ Yoo □ Au

Uhinangela ovipuka vimwe ovivi vakwenyi vekuhindilile ove oviaanye? — Ova Loma 12:2. ․․․․․

Oityi mohande okulinga, opo uhumbe vali unene Siovaa? — Sunda 20, 21. ․․․․․

Ine ovoho nomapanga ove vayekako okufenda Siovaa, noove moyekeko? — Mateusi 10:36, 37.

□ Yoo □ Au

[Olutalatu]

Okumbatisalwa tyikupilulula ngetyi otyinepo tyipilulula omunthu — hatyipuka-ko uti tyitavela okutyiyeka-yekapo