Mwivisi Wouhamba wa Huku:

Soka ñgeno noove umutumwa (umu apositolu), muna vakwenyi muli Komphunda Yomindyambi. Mukati vala ñgaa Sesusi uli komutwe wenyi. Tyina nkhele eheneende no keulu, emupopila okuti: “Onwe mamupewa ononkhono tyina omphepo ikola yamemulaukila, mamukalinga onombangi mbange mo Selusalei no mo Sundeya no mo Samaliya, amwii atee konohika mbokokule-kule kombanda yohi.” (Ovil. 1:8) Otyipuka otyo ñgeno tyekukalesa ñgeni?

Tyipondola ñgeno wasoka oti otyilinga otyo otyinene unene, kamatutyivili. Hamwe ñgeno welipula okuti: ‘Pahe onthwe twehehi-ale ñgaa, oñgeni matutyivili ‘okupa ovanthu oumbangi atee konohika mbokokule-kule kombanda yohi’?’ Upondola ñgeno wahinangela onondaka Sesusi apopile motyinthiki alalela-ko tyina kutya aipawe, etyi atile: “Omupika hamunene vali ku hekulu. Ine ame ame vahukaisa, opo noonwe mavemuhukaisa; Ine vetavela ondaka yange, opo no yenyi maveitavela. Mahi mavemulingi ovipuka ovio aviho kombanda yenyina liange, mokonda Ou wanthuma kavemwii.” (Swau 15:20, 21) Tyina pahe wasokele konondaka ombo, upondola olipulu oti: ‘Oñgeni mandyityivili okupa ovanthu oumbangi tyina onthwe matuyalwa, nokumoneswa ononkhumbi?’

Noonthwe hono otyo tulipula ngootyo. Otyilinga onthwe Onombangi mba Siovaa tuna-tyo, tyike vala no tyovatumwa, o tyokupa ovanthu oumbangi atee “konohika mbokokule-kule kombanda yohi,” “kovanthu vomihoko aviho.” (Mat. 28:19, 20) Oñgeni matuvili okulinga otyilinga otyo, ngwe tuyelwe umwe ngeetyi tyatolelwe?

Omukanda Ovilinga Viovatumwa, uhipulula oñgeni ovatumwa novalongwa va Kilisitu vo kohale vetyivilile okufwisapo otyilinga tyokwivisa etyi vakwateswako na Siovaa. Omukanda ou uli nokutanga, walingwa umwe opo ukukwateseko okunoñgonoka vali nawa ovipuka ovatumwa valingaile, novipuka ovinene viamonaikile pomuvo opo viahonekwa momukanda Ovilinga. Matyikuhuvisa okutala okuti ovipuka vialingailwe novanthu va Huku kohale, vielifwa umwe neevi hono ovanthu va Huku vekahi nokulinga. Motyimono okuti katwelifwile vala movilinga tulinga, mahi tupu twelifwa umwe noomu twaonganekelwa. Okusoka umwe nawa-nawa kovipuka ovio, matyikupe onthumbi yokuti Siovaa Huku oe uli nokululika eongano liae pano pohi.

Onthwe twelikwambela, twahanda tyina ulilongesa nawa omukanda Ovilinga, ukale nonthumbi yokuti Siovaa mekukwatesako, ononkhono mbomphepo yae ikola mambukuyake. Twahanda otyo tyikupe ononkhono utwaleko ‘okupa ovanthu oumbangi waoya wayemba Kouhamba wa Huku,’ nokukwatesako vakwenyi veye mondyila yeyovo. — Ovil. 28:23; 1 Tim. 4:16.