PAHE tala Abel na Kaim. Aveho vekula. Kaim walinga omulimi. Ankho ulima ovilia, novinyango, nomakovi, no mbatata, novikuavo vali.

Abel walinga omunthita wonongi. Abel ankho uhole okutekula oviketa vionongi. Oviketa ovio avikulu, iya Abel liwa liwa akala notyunda tyonongi.

Onthiki imue, Kaim na Abel vaetela Huku otyiawa. Kaim waeta ovikuna alima. Iya Abel aeta oongi yakongoka nawa. Yehova apande Abel notyiawa tyae. Anthi kapandele Kaim notyiawa tyae. Ove utyii omokonda yatyi?

Hamokondako otyiawa tya Abel ankho tyikahi vali nawa tyipona tya Kaim. Omokonda Abel ankho ondalawa. Ankho uhole Yehova nomukulu wae. Anthi Kaim ankho ondingavivi. Oe ankho utupu ohole nondenge yae.

Ngotyo, Huku atolela Kaim apilulule onkhalelo yae. Anthi Kaim katavelele. Kaim ankho wanumana unene mokonda Huku wapanda Abel. Moluotyo, Kaim wapopila Abel okuti: ‘Tuende kepia.’ Puetyi ankho vekahi kepia aveke, Kaim avete ondenge yae Abel. Wemuveta unene alo Abel ankhia. Otyipuka otyo tyalinga Kaim hatyiviko?

Namphila Abel ankhia, Huku nkhele umuhinangela. Abel wali ondalawa, iya Yehova kalimbwa ovanthu onondalawa. Ngotyo, onthiki imue Huku makatutilisa Abel. Momuvo watyo oo, Abel kamakankhia vali. Makakala nomuenyo apeho pano pohi. Hatyiwako okunoñgonoka ovanthu nga Abel?

Anthi Huku kehole ovanthu nga Kaim. Moluotyo, puetyi Kaim aipaa ondenge yae, Huku wemuhitisa mokumutuma kokule nombunga yae. Etyi Kaim atunda meumbo okukakala konthele onkhuavo yoohi, watyinda omphange yae. Iya omphange yae akalinga omukai wae.

Mokuenda kuononthiki Kaim nomukai wae vahimbika okukala novana. Ovana ovakuavo va Andau na Eva, ovalume novakai avelinepe, iya navo avakala novana. Momuvo uhehi, ovanthu avalingi ovanyingi kombanda yoohi. Matulilongesa kombinga yovanthu vamue.