KONDYE yotyikunino tyo Endene, Andau na Eva vahimbika okukala novitateka ovinyingi. Ovo ankho vena yokuundapa unene opo vakale nokulia. Ovo ankho kavatale vali omiti viokuna ovinyango oviwa. Anthi ankho vatala vala omakete, nolunkhwenya. Etyi otyo tyapita puetyi Andau na Eva vahatavelele ku Huku, nokuayekapo okukala omapanga Ae.

Ovitateka vieliyauisa vali, etyi Andau na Eva vahi-​mbika okunkhia. Hinangela okuti, Huku wevelondolele okuti inkha valia otyinyango tyomuti wailikua mavankhi. Tyotyili, monthiki valia kotyinyango, ovo vahimbika okunkhia. Ovo vatopa ngatyi mokuhatehelele ku Huku.

Ovana va Andau na Eva aveho vatyitwa konyima yetyi Huku evetaata motyikunino tyo Edene. Otyo tyihangununa okuti ovana vavo tupu vena yokukulupa no kunkhia.

Inkha Andau na Eva vatavelele ku Yehova, ñgeno novana vavo vakala nomuenyo wehambu. Ovo ñgeno vakala apeho nehambu kombanda yoohi. Ñgeno nawike ukulupa, uvela, no kunkhia.

Huku uhanda ovanthu vakaleko apeho nehambu, iya walaa okuti onthiki imue ovanthu mavakakala nehambu olio. Oohi hayoko vala maikakala ongwa. Novanthu aveho mavakakala nekongoko. Ovanthu aveho kombanda yoohi mavakakala omapanga omawa avakuavo no a Huku.

Anthi Eva kakalele epanga lia Huku omuvo omunyingi. Ngotyo, Eva etyi atyita ovana vae, tyemupuiya unene. Ankho tyimuihama unene. Mokuhetavelele ku Yehova tyotyili tyaetela Eva ononkhumbi ononene. Ove kutyitavela?

Andau na Eva vakala novana ovanyingi, ovakuendye no vahikuena. Puetyi omona wavo wotete atyitwa, vemuluka okuti o Kaim. Omona wavo wavali vemuluka okuti o Abel. Oityi tyeya okupita navo? Ove utyii?