NOE ankho una omukai wike novana vetatu. Ovana vae ankho vatiwa o Sem, na Kã, na Jafé. Kese umue ankho una omukai wae. Ngotyo, ombunga ya Noe ankho veli etyinana.

Huku watuma Noe atunge owato umue enene. Owato oo, ankho omunene ngo mbapolo. Anthi, ankho ukahi ngo tyikasa tyimue otyinene otyilaale. Huku wapopila Noe okuti tunga owato, outete tutatu pokati okuenda no peulu, ouyapaula onondyuo mokati. Onondyuo ombo ankho o pala Noe, nombunga yae, novinyama, no pala okupaka okulia.

Tupu Huku watolela Noe alinge nawa owato oo, opo muhanyingile omeva. Huku wati: ‘Ame mandyilokesa ombila imue onene pala okuhanyaunako ouye auho. Ovanthu aveho vokuli kondye yowato mavankhi.’

Noe novana vae vatavela ku Yehova, avahimbika okutunga. Anthi, ovanthu ovakuavo ankho vayola. Avatualako nokulinga ovipuka ovivi. Nawike watavela ku Noe puetyi evetolela etyi Huku malingi.

Papita omuvo omunyingi pala okutunga owato, mokonda ankho omunene unene. Puetyi papita omanima omanyingi, owato aumanuhuka. Iya Huku atolela Noe apake ovinyama mokati kowato. Huku wapopila Noe okuti konombuto mbumue mbovinyama polako ovinyama vivali, otyindume no tyindema. Anthi, konombuto ononkhuavo Huku atolela Noe apoleko ovinyama epanduvali. Tupu Huku watolela Noe apakemo onombuto ambuho mboviila. Noe alingi atyiho Huku emutuma.

Konyima, Noe nombunga yae navo vanyingila mowato. Iya Huku epito eliyiki. Noe nombunga yae pahe avakevelela. Pahe sokolola. Ñgeno ove ukahi mokati kowato na Noe nombunga yae nokukevelela. Okuti ombila onene maiya umue ngetyi Huku apopia?