KONDYE yowato, ovanthu ankho vasukalala novipuka viomuenyo ngetyi ankho valingale. Nkhele ankho kavatavela okuti makuiya ombila onene. Vatuaileko nokuyola unene. Anthi, liwa liwa avayekepo okuyola.

Kapapitile omuvo omunyingi ombila aihimbika okuloka. Omeva keulu ankho auyuka vala, ngatyina uuyula omaande nombaliti. Noe ankho una ehunga. Mahi ankho pahe lietaka unene pala ovanthu vanyingile mowato. Epito ankho liaikwa nawa na Yehova.

Mokamuvo kehehi oohi aiho yeyula omeva. Aikala ngo manyana omanene. Omeva ateya omiti, akulungutisa omamanya omanene, aayuele unene. Ovanthu ankho vatila ouoma avalondo konomphunda. Inkha vatavelele Noe avanyingila mowato puetyi nkhele epito lieheneikwe, ñgeno valinga nawa. Anthi, pahe ankho lietaka unene.

Omeva atualako nokulonda unene. Yaloka oule wovitenya 40 novinthiki 40. Onomphunda ambuho ambupuila momeva. Ovanthu aveho novinyama ankho vikahi kondye yowato avinkhi, ngetyi tyapopile Huku. Anthi aveho ankho vekahi mokati kowato vahupile.

Noe novana vae valinga ovilinga oviwa viokutunga owato. Omeva akatulapo owato, iya auyalala kombanda yomeva. Onthiki imue ombila yatyako, iya ekumbi alihimbika okumoneka. Tyihuvisa ngatyi! Ankho kononthele ambuho mboohi elunga vala enene. Otyipuka ankho tyimoneka vala kombanda yomeva owato.

Omakihi ankho kaeko vali. Ankho kaatyopo vali ovanthu. Omakihi aeho, novoina yavo kumue novanthu ovakuavo onondingavivi vankhia. Iya ovohe yomakihi avaende napi?

Ovohe yomakihi ankho havanthuko ngonthue. Ankho onoandyu mbeile okukala pano pohi ngovanthu. Ngotyo, etyi Ombila onene yeya, ovo kavankhile kumue novanthu ovakuavo. Vayekapo omalutu opahitu avakondoka keulu ngo noandyu. Anthi, kavayekelwe vali valinge onthele mombunga yo noandyu mba Huku. Ngotyo, valinga onoandyu mba Satanasi. Mombimbiliya vaihanwa okuti onoandyu onombi, ine ovilulu.

Huku aetako omphepo imue onene iya omeva ombila aahimbika okutepuluka. Puetyi papita onohanyi ononthano, owato auumphama kombanda yomphunda. Apapiti vali ononthiki ononyingi iya ovanthu mokati kowato avahimbika okumona onomphunda. Omeva atualako nokutepuluka.

Noe alupula ekwaila. Olio liakanthanana anthi alikondoka. Mokonda kaliavasile omphangu apa lilapela. Liatualako nokulinga ngotyo ovikando ovinyingi, anthi otyo likondoka okupululukuapo kombanda yowato.

Noe wahandele okutala inkha omeva atepuluka kombanda yoohi, moluotyo walupula opomba. Anthi opomba nayo yakondoka mokonda kayavasile omphangu pala okulapela. Noe alupula opomba otyikando tyavali, iya aiyetelela eefo lio mundyambi komulungu. Ngotyo, Noe wanoñgonoka okuti omeva apuiinina. Konyima, Noe weilupula otyikando tyatatu, iya aivasi omphangu yakukuta itavela okukala.

Huku apopila Noe okuti: Pahe ‘Lupuka mowato, kumue nombunga yove aiho novinyama.’ Vakalele mowato ononthiki mbulamba penima. Tusokei ehambu vakalele nalio puetyi vatunda mowato nomuenyo.