TALA etyi tyikahi nokupita apa. Andau na Eva vekahi nokutewa motyikunino otyiwa tyo Endene. Utyii omokonda yatyi?

Omokonda valinga otyipuka tyimue otyivi unene. Iya pahe, Yehova wevehitisa. Ove utyii otyipuka otyivi Andau na Eva valinga?

Valinga otyipuka tyimue Huku evepopila pala vehetyilinge. Huku wevepopilile okuti vapondola okulia ovinyango viomiti vikahi motyikunino. Mahi ankho muna omuti wike Huku evepopilile okuti muhalieiko, inkha muliako mamunkhi. Omuti oo, ankho owa Huku. Iya onthue tutyii okuti otyivi okupola otyipuka tyimue tyehetyove, hatyoko? Ngotyo, oityi tyapitapo?

Onthiki imue etyi Eva ankho ekahi aike motyikunino, onyoka imue yapopia nae. Sokolola vala. Onyoka yapopilile Eva opo alie otyinyango tyomuti una Huku evetolele okuti muhalieiko. Anthi Yehova kalingile ononyoka pala mbupopie. Otyo tyilekesa okuti pena omunthu umue waundapesa onyoka pala okupopia. Omunthu watyo oo, olie?

Andau ankho haeko. Anthi, pokati kovanthu vana Yehova alinga puetyi nkhele ehenelinge oohi, opo patunda umue wapopia na Eva. Ovanthu ovo onoandyu, onthue katupondola okuvemona. Oandyu oyo yali nelungavi. Yahandele okutumina nga Huku. Tupu yahandele ovanthu veitavele tyipona okutavela Yehova. Oandyu oyo yaundapesa onyoka pala okupopia.

Oandyu oyo yetyivila okukengelela Eva. Etyi oandyu yatolela Eva okuti inkha alia otyinyango tyailikua makala nga Huku, Eva etavela. Ngotyo, Eva walia kotyinyango, iya tupu na Andau aliko. Andau na Eva kavatavelele ku Huku, mokonda yotyo, vatewa motyikunino, eumbo liavo ewa.

Anthi nthiki imue Huku makapilulula oohi ino aiho opo ikale omphangu imue ongwa ngo tyikunino tyo Endene. Komeho matukelilongesa oñgeni tupondola okulinga onthele movilinga ovio. Anthi pahe, tutalei oityi tyapita na Andau na Eva.