KONYIMA Yombila Onene ovanthu vamue vakakalele kotyilongo tyimue tyitiwa o Ur. Ankho epundaumbo limue liakolela, liokuna onondyuo onongwa. Anthi, ovanthu vomepundaumbo olio, ankho vafenda ono huku mbomatutu, ngetyi ankho valinga ko Mbabele. Ovanthu vomo Ur no vomo Mbabele, ankho kavelifuile na Noe nomona wae Sem, ankho vatuaileko okuumbila Yehova.

Noe omulume wekolelo, wankhia etyi papita 350 omanima konyina yombila onene. Etyi papita omanima evali, akutyitwa omulume ou weete polutalatu olu. Ankho wali omunthu umue wakolela unene komaiho a Huku. Enyina liae ankho o Abraiau. Abraiau nombunga yae ankho vakala mepundaumbo lio Ur.

Onthiki imue Yehova wapopila Abraiau okuti: ‘Tunda mepundaumbo lino lio Ur, enda kotyilongo tyimue mandyikulekesa.’ Okuti Abraiau watavelele okusapo ovipuka aviho oviwa mo Ur? Enga, watavelele. Ankho Abraiau apeho utavela ku Huku, otyo atilwa epanga lia Huku.

Vamue pombunga ya Abraiau avemulandula puetyi atunda mo Ur. Tate yae Tera, no tyimphumba tyae Lot, nomukai wae Sara, navo vaile nae. Mokuenda kuononthiki, avehiki potyilongo tyimue ankho tyitiwa o Harã. Opo Tera ankhila. Ankho vekahi kokule no Ur.

Konyima Abraiau nombunga yae, vatunda po Harã, avaende kotyilongo tyitiwa o Kanaa. Kotyilongo oko, Yehova wemupopila okuti: ‘Etyi, otyo otyilongo mandyiavela ovana vove.’ Iya Abraiau akala mo Kanaa. Ankho ukala momakaka.

Huku ahimbika okukuatesako Abraiau. Moluotyo, Abraiau akala noviunda ovinene vionongi novipako ovikuavo vali, novaundapi ovanyingi. Mahi, Abraiau na Sara ankho vetupu omona nawike.

Puetyi Abraiau ankho ena omanima 99, Yehova emupopila okuti: ‘Ame ndyilaa okuti, ove mokakala tate yovanthu ovanyingi.’ Abraiau na Sara ankho vakulupa. Iya oñgeni ankho vapondola okutyita ovana?