OVALUME ava vekahi nokupopia na Jako uvei? Jako waenda ononthiki ononyingi, iya pahe avasi ovalume ava ponyombo. Ankho valisa onongi mbavo. Jako evepulu okuti: ‘Mukalapi?’

Avati, ‘tukala ko Harã.’

Jako evepulu vali okuti: ‘Labau mumuii?’

Avakumbulula okuti, ‘Enga, tumui. Una wiya ngotyo omona wae Rakele, nonongi mba tate yae.’ Ove Rakele omueete ukahi nokuiya?

Etyi Jako amona Rakele nonongi mba inanthu, apoloko emanya kombanda yonyombo, opo onongi mbunwe. Ape Rakele ombesinyu, nokumupopila enyina liae. Rakele ahambukwa unene, ahatekela keumbo okukatolela tate yae Labau.

Na Labau ahambukwa unene mokonda ya Jako weya okukala nae. Etyi Jako aita okunepa Rakele, Labau ahambukwa. Anthi, Labau atolela Jako okuti ndyundapele omanima epanduvali momapia ange, opo ndyikupa Rakele. Jako etavela ovilinga ovio, mokonda ankho uhole unene Rakele. Mahi, utyii etyi tyaendelepo monthiki yokunepa?

Labau waavela Jako omona wae omukulu watyo utiwa o Leia, ehemupe Rakele. Etyi Jako etavela okuundapa vali omanima epanduvali, Labau emuavela pahe Rakele. Kohale Huku ankho wayekele ovalume vanepe oluvale. Anthi pahe, Ombimbiliya ilekesa okuti omulume una yokunepa vala omukai wike.