ULUETE ovalie Dina akatalelapo? Ukatalelapo ovahikuena vamue vomo Kanaa. Okuti tate yae Jako wahambukilue? Opo utyivile okukumbulula epulo olio, nkhele hinangela oityi Abraiau na Isake ankho vasoka kombinga yovakai vomo Kanaa.

Okuti Abraiau wahandele omona wae Isake anepe omuhikuena womo Kanaa? Au, kahandele. Okuti Isake na Rebeka ankho vahandele omona wavo Jako anepe omuhikuena womo Kanaa? Au, kavahandele. Utyii omokonda yatyi?

Omokonda ovanthu vomo Kanaa, ankho vafenda ono huku mbomatutu. Ankho havanthuko ovawa vetavela okulinepa navo. Tupu, ankho havanthuko ovawa vetavela okukala omapanga. Moluotyo tupondola okukala nonthumbi yokuti Jako ankho kahambukilwe omona wae okulinga oupanga novahikuena vomo Kanaa.

Dina welipakele movitateka ovinene. Uluete omukuendye ou womo Kanaa polutalatu apa, ukahi nokutala Dina? Enyina liae o Sikem. Onthiki imue puetyi ankho Dina akatalelapo vakuavo, Sikem wemukuata kononkhono iya alangalapo nae. Otyo ankho tyapenga, mokonda vokuelinepa, ovo vala vapondola okulala pamue. Moluotyo, otyipuka otyo otyivi Sikem alinga Dina, tyaetele ovitateka ovinene.

Etyi onomphange mba Dina vetyiiva avanumana unene. Simiau na Levi vanumanene unene, iya avapolo omitunga, okukalwisa ovalume vomepundaumbo olio. Ovo no nondenge mbavo, avaipaa Sikem novalume ovakuavo. Jako anumana unene, mokonda yotyipuka otyo otyivi tyalinga ovana vae.

Ovitateka ovio viahimbikile ñgeni? Omokonda ya Dina walingile oupanga novanthu vehetavela ovitumino via Huku. Onthue katuhande okulinga oupanga novanthu ngovo. Ine tuhanda?