JOSE wahandele okunoñgonoka inkha ovakulu vae 10 nkhele onondingavivi, no kuatena omitima. Moluotyo, apopi okuti: ‘Onue muvalavi. Mueya okutala opi otyilongo tyetu tyapamena.’

Ovakulu vae avemukumbulula okuti: “Au, onthue tunondalawa. Atuho tulilandula. Ankho tuali 12, mahi pahe umue kepo vali. Omututu watyo wesala keumbo na tate.’

Jose elilingisa okuhevetavela. Apake Simiau mokaleya, iya vakuavo atumu okuveavela ovilia, vakondoke keumbo. Mahi, evepopila okuti: ‘Putyina mukondoka kuno, etelelei ondenge yenyi omututu watyo.’

Etyi vehika keumbo ko Kanaa, ovakulu va Jose vatolela tate yavo ovipuka ovio aviho. Jako akala tyanumana unene. Eliyave okuti, ‘Jose kekoale, pahe Simiau keko vali. Ame himayeke muende nomona wange Benjamim.’ Mahi, etyi okulia kuavo kuapwa, Jako ayeke vaye na Benjamim ko Egitu, opo vakalande vali ovilia.

Jose wamona ovakulu vae ankho vekahi nokuiya. Ahambukwa unene okumona ondenge yae Benjamim. Mahi, ovakulu vae nawike ankho utyii okuti omulume oo wakolela mo Egitu o Jose. Jose alingi otyipuka tyimue opo aheteke ovakulu vae 10.

Jose watuma ovaundapi vae veyulise ono sako mbavo ovilia. Iya atumu okupaka okopo yae mosako ya Benjamim, otyo ovakulu vae vehetyii. Vaendapo vala katutu, Jose atumu ovaundapi vae konyima yavo. Etyi vevevasa, avati: ‘Omokonda yatyi muavakela okopo yomuhona wetu?’

Ovo vakumbulula okuti: ‘Onthue katuavakele okopo yae. Inkha mueivasa nomunthu umue pokati ketu, mupondola okumuipaa.’

Iya ovaundapi ovo avahimbika okuovola okopo oyo monosako ambuho. Aveivasi mosako ya Benjamim, ngetyi weete polutalatu apa. Ovaundapi avati: ‘Onue amuho mupondola okuenda, mahi Benjamim tuenda nae.’ Oityi ovakulu vae 10 valinga?

Vakondoka aveho na Benjamim kondyuo ya Jose. Iya Jose apopila ovakulu vae okuti: ‘Onue amuho mupondola okuenda keumbo, mahi Benjamim makala omupika wange.’

Judaa akumbulula okuti: ‘Inkha ndyikondoka keumbo tyihena Benjamim, tate yange mankhi. Mokonda umuhole unene. Moluotyo mbambavo, ndyikale ame omupika wove, omukuendye muyeka akondoke keumbo.’

Ngotyo Jose wetyimona okuti ovakulu vae vapiluluka. Ankho hanondingavivi ko vali. Pahe tutalei oityi Jose alinga.