OMUKUENDYE ou wanumana nokuasoya umueete? O Jose. Ovakulu vae vemulandesa kovalume ava vekahi nokuenda ko Egitu. Oko, Jose makakala omupika. Omokonda yatyi ovakulu vae valingila otyipuka otyo otyivi? Omokonda ankho valingila onkhi Jose.

Tate yavo Jako ankho uhole unene Jose. Oe walekesa okuti umuhole unene, etyi atuma okumutungila otyikutu tyimue otyiwa. Etyi ovakulu vae vamona okuti Jako uhole unene Jose, avahimbika okumulingila onkhi, no kumuyala. Tupu, ankho pena otyipuka otyikuavo ovakulu vae vemuyalela.

Jose onthiki imue walota onondyoi onombali. Monondyoi ombo onombali, ovakulu vae ankho vemutuikila konongolo. Etyi Jose atolela ovakulu vae onondyoi ombo, oundyale wavo aulingi omunene.

Onthiki imue, ankho ovakulu va Jose valisa onongi mba Jako tate yavo. Iya Jako atumu Jose ekevetale oñgeni vekahi. Etyi ovakulu vae vemumona, vamue avati: ‘Tumuipaei!’ Mahi, Rubem omukulu wavo ati: ‘Au, muhalingei ngotyo!’ Moluotyo vakuata Jose avemuyumbu monyombo imue ihena omeva. Avaumphama opo vasoke etyi mavemulingi.

Pomuvo watyo oo, kuatumbuka ovalume vamue ova Ismayeli. Judaa apopila onondenge mbae okuti: ‘Tumulandesei kova Ismayeli.’ Ngatyo valinga. Avalandesa Jose 20 onombongo mbovivela. Otyipuka otyo valinga ankho otyivi unene.

Oityi pahe ovakulu va Jose mavakapopila tate yavo? Vaipaa onkhombo, avapolo otyikutu tya Jose avetyikohaila mohonde. Iya avatuala otyikutu otyo keumbo ku tate yavo Jako avati: ‘Tuavasa otyikutu etyi. Tyitala, inkha o tya Jose.’

Jako etyiimbuka okuti otyo yatyo. Iya eliyavela okuti: ‘Jose waipawa notyinyama tyimue mohika.’ Ovakulu va Jose vahandele tate yavo asoke ngotyo. Jako anumana unene. Alili omona wae ononthiki ononyingi. Mahi, Jose ankho kankhile. Tutalei etyi tyapita nae oko vemutuala.