ETYI Moisesi ehika ko Egitu, wapopila omukulu wae Arau kombinga yomahuviso oo. Moisesi na Arau valekesa ova Isilayeli omahuviso oo, iya ovanthu avetavela okuti Huku ukahi navo.

Konyima yotyo, Moisesi na Arau, avaende okukapopia na Farao. Avemupopila okuti: ‘Yehova Huku yova Isilayeli wati: “Yeka ovanthu vange vaende ononthiki ononthatu, alo mehoko, opo vakandingile efendelo.”’ Mahi, Farao akumbulula okuti: ‘Ame hitavela ku Yehova. Himayeke ova Isilayeli vaye.’

Farao anumana unene mokonda ovanthu ankho vahanda okuyekapo ovilinga, opo vakafende Yehova. Moluotyo evekuluminya okuundapa vali unene. Ova Isilayeli avahimbika okupopia Moisesi okuti tukahi nokumona ononkhumbi mokonda yove. Iya Moisesi anumana. Mahi, Yehova apopila Moisesi okuti uhasukalale. “Ame mandyikuluminya Farao ayeke ovanthu vange.’

Moisesi na Arau avaende vali okukapopia na Farao. Monthiki oyo avalingi ehuviso. Arau wayumba pohi otyimuti tyae, atyipiluluka onyoka imue onene. Ovanongo va Farao navo avayumbu ovimuti viavo pohi, navio avityituka ononyoka. Pahe tala, onyoka ya Arau ikahi nokunyinapo ononyoka mbovanongo va Farao. Nongotyo, Farao kayekele ova Isilayeli vaye.

Etyi omuvo wehikapo, Yehova waavela Farao elongeso. Utyii oityi alinga? Waetele omahingano 10 mo Egitu.

Konyima yomahingano omanyingi, Farao waihana Moisesi emupopila okuti: ‘Talamesa ehingano eli, ame mandyiyeke ova Isilayeli vaye.’ Anthi, etyi ehingano liatalama, Farao kayekele ovanthu vaye. Konyima yehingano lia 10, Farao ayeke pahe ova Isilayeli vaye.

Omahingano oo aeho 10 wei? Ikula efo tulilongese kombinga yomahingano oo.