MOISESI ankho wakalisila onongi komphunda yo Horebe. Iya oko amono otyinkhondo tyatema, mahi atyihapi.

‘Moisesi asoko okuti: ‘otyipuka etyi hinetyimone. Mandyifuenepo ndyi-​ketyitale nawa. Etyi afuenapo, weiva ondaka itundilila motyinkhondo otyo aiti: ‘Uhafuene pano. Lula ononkhaku mbove, mokonda ukahi pohika ikola.’ Ondaka oyo, ankho oandyu ya Huku ikahi nokupopia. Iya Moisesi elihitika kotyipala.

Ondaka oyo aiti, Huku wati: ‘Ame namona ononkhumbi mbovanthu vange mo Egitu. Ndyihanda oku-​keveyovola. Mandyikutumu ukapole ovanthu vange mo Egitu.’ Yehova ankho uhanda okutuala ovanthu vae kotyilongo otyiwa tyo Kanaa.

Anthi Moisesi ati: ‘Pahe ame amelie? Mandyilingi ñgeni? Inkha ndyendako, iya ova Isilayeli avamphulu okuti: “Olie wekutuma?” Oityi mandyipopi?’

Huku akumbulula Moisesi ati, mopopi okuti: ‘“YEHOVA, Huku ya Abraiau, Huku ya Isake no ya Jako wanthuma kuonwe.”’ Yehova ayawisako okuti: ‘Eli, olio enyina liange apeho.’

Mahi Moisesi ati: ‘Iya inkha kavetavela okuti ove wanthuma?’

Huku emupulu okuti: Oityi unatyo pokuoko?

Moisesi akumbulula okuti: ‘Otyimuti.”

Huku ati: ‘Tyiyumba pohi.’ Etyi Moisesi etyiyumba pohi, otyimuti atyipiluluka onyoka. Yehova alekesa vali Moisesi ehuviso ekuavo. Ati: ‘Paka okuoko kuove mokati kotyikutu tyove.’ Moisesi apake okuoko kuae motyikutu. Etyi ekupolamo, okuoko kuae ankho kutunda too. Ankho kukahi ngoti kuna ouvela wotyilunda. Yehova aavela Moisesi epondolo liokulinga ehuviso lia tatu. Konyima Huku wati: ‘Tyina wamalingi omahuviso oo, ova Isilayeli mavetavela okuti ame nekutuma.’

Etyi Moisesi akondoka keumbo, watolela Jetru okuti: ‘Mandyi-hande okukatala oñgeni ombunga yange ikahi ko Egitu.’ Ngotyo Moisesi alekela Jetru. Iya ahimbika oungendi wae okukondoka ko Egitu.