TALA ononthemo novinyango viapia viayova kotyimuti etyi. Otyimuti etyi otya Arau. Ononthemo ombu novinyango viayova kotyimuti tya Arau motyinthiki tyike vala. Tutalei omokonda yatyi.

Ovaisilayeli ankho vakala mehoko omuvo omunyingi. Pahe vamue ankho vasoka okuti Moisesi kapondola vali okukala onkhalamutue yavo. Iya Arau ankho kapondola vali okukala osaserdote. Ovanthu ankho vasoka ngotyo o Korá na Datã, na Abirão kumue no 250 ononkhalamutue mbovanthu. Aveho veya ku Moisesi avemupopila okuti: ‘Omokonda yatyi ulipakela komutue wetu?’

Moisesi atolela Korá novalanduli vae okuti: ‘Muhuka komuhuka etei ovityiyo vienyi viotupia amupakeko oisensu. Iya amuiya kondyuo ikola ya Yehova. Opo tutale olie Yehova akoya.’

Etyi tyati komuhuka, Korá novalanduli vae avaende kondyuo ikola. Ovanthu ovakuavo navo avalandulamo opo vakakuateseko ovalume ovo. Yehova anumana unene. Moisesi ati: ‘Hondovokei pomakaka ovanthu ovo onondingavivi.’ Muhakuatei otyipuka natyike tyavo. Ovanthu avatavela, iya avahondovoka pomakaka a Korá, na Datã, na Abirão.

Moisesi apopi okuti: ‘Pahe mamutale olie Yehova akoya. Oohi maiyikuka pokati opo inyinepo ovanthu ava vonondingavivi.’

Moisesi kenemane okupopia, oohi yeliikula pokati. Omakaka no vipuka via Korá, na Datã, na Abirão, novanthu ankho vekahimo, avanyinuapo noohi. Etyi ovanthu veiva vana vokuanyinwapo noohi vekahi nokuliyavela, navo aveliyavela okuti: ‘Tukahatekei, opo oohi tupu ihetunyinepo.’

Korá, no 250 ovalanduli vae ankho nkhele vatalama ponthele yondyuo ikola. Yehova atumikisa otupia, aveho avapipo. Yehova atolela omona wa Arau, Eleazar apolepo ovityiyo viotupia viovalume ovo vokuankhia iya evipake ko altar. Opo vikale ngelondolo pala ova Isilayeli, liokuti Arau novana vae ovo vala ono saserdote mba Yehova.

Anthi, Yehova wahandele ovanthu vetyinoñgonoke nawa okuti Arau novana vae ovo vakoyua pala okukala ono saserdote. Ngotyo Huku watolela Moisesi okuti: ‘Kese onkhalamutue yomuhoko wo Isilayeli aete otyimuti tyae. Pomuhoko wa Levi, Arau aete otyimuti tyae. Ovimuti ovio ovipake mondyuo ikola komutwe wotyikasa tyomphango. Otyimuti tyomulume naholovona opo akale osaserdote matyiyovo ononthemo.’

Komuhuka, etyi Moisesi ekevitala, wavasa otyimuti tya Arau tyayova ononthemo ombu, novinyango viapia. Pahe utyii omokonda yatyi otyimuti tya Arau tyayovela ononthemo?