OKUTI weivile otyimbulu tyipopia? Au. Ovinyama kavipondola okupopia. Anthi Ombimbiliya ipopia kombinga yotyimbulu tyimue tyapopile. Tutalei oñgeni tyaenda.

Ovaisilayeli ankho velipongiya opo vanyingile motyilongo tyo Kanaa. Barake, ohamba yoko Moabe, ankho watila ouoma wova Isilayeli. Moluotyo, watuma okukapola omulume umue walunguka utiwa o Mbalaau, opo ahingane ova Isilayeli. Barake walaa okuavela Mbalaau onombongo ononyingi. Moluotyo, Mbalaau wavelama kotyimbulu tyae ahimbika oungendi wae opo ekelivase na Barake.

Yehova kahandele Mbalaau akahingane ovanthu Vae. Moluotyo, Huku watuma oandyu nomutunga omulaale italame mondyila pala okutyilika Mbalaau. Mbalaau ankho oandyu keiyete, mahi otyimbulu tyae tyiiyete. Iya otyimbulu atyihande okuyapuka oandyu oyo. Konyima, atyilangalapo mondyila. Otyo tyanumanesa unene Mbalaau, iya ahimbika okuveta otyimbulu tyae notyimuti.

Iya Yehova alingi otyimbulu tyipopie na Mbalaau. Otyimbulu atyipulu okuti: ‘Oityi nekulinga umbete ngotyo?

Mbalaau ati: ‘Nalinga otyova tyove. Inkha nali nomutunga ñgeno nekuipaa.’

Otyimbulu atyipulu okuti: ‘Nthiki imue nekulingiliale otyipuka ngetyi?’

Mbalaau akumbulula okuti: ‘Au.’

Yehova ayeke Mbalaau amone oandyu yatalama mondyila nomutunga. Oandyu aiti: ‘Omokonda yatyi uvetela otyimbulu tyove? Ame neya okukutyilika, mokonda kupondola okukahingana o Isilayeli. Inkha otyimbulu tyove katyayapukile, ame ñgeno nekuipaa, mahi otyimbulu tyove ñgeno hetyilingile omapita.’

Mbalaau apopi okuti: ‘Nalinga onkhali. Ame ankho hityii okuti ove watalama mondyila.’ Oandyu aiyeke Balaau ekelivase na Barake. Mbalaau nkhele wahandele okuhingana ova Isilayeli. Anthi, Yehova watuma Mbalaau aavele ova Isilayeli ononkhano onongwa ovikando vitatu.