TALA Josue. Ukahi nokupopia okuti: ‘Kumbi, talama. Iya ekumbi alitalama. Liatalama umue pokati nakati keulu onthiki aiho. O Yehova wetyilinga. Mahi, tutalei omokonda yatyi Josue ahandela ekumbi litalame.

Etyi onohamba ononthano onondingavivi mbotyilongo tyo Kanaa vahimbika okulwisa ova Gibionita, ovo vatuma ovalume ku Josue opo vakaite ekuateso. Ovo avati: ‘Mbambavo kanyauka endyu utuyovole. Onohamba ambuho mbanthele ina yomphunda mbeya okuluisa ovapika vove.’

Josue nomafualali ae aeho avaende. Vaenda ounthiki auho. Etyi vehika ko Gibeau, omafualali onohamba ononthano atila ouoma iya avahimbika okukahateka. Iya Yehova alokesa omamanya omanene, aaipaa omafualali omanyingi tyipona aa aipawa nomafualali a Josue.

Josue ankho uluete okuti apa katutu ekumbi malinyingila. Makunthikovela, iya omafualali onohamba ononthano onondingavivi maatili. Mokonda yotyo, Josue welikuambela ku Yehova iya ati: ‘Kumbi, talama.’ Etyi ekumbi liatalama, ova Isilayeli vetyivila okuveluisa iya avafindi.

Ankho muna vali onohamba ononyingi onondingavivi mo Kanaa ankho mbuyele ovanthu va Huku. Josue nomatolopa ae, vatualako nokulwa omanima epandu pala okufinda ono hamba 31 mbo motyilongo. Konyima yotyo, Josue aavununina otyilongo tyo Kanaa omihoko vio Isilayeli.

Papita omanima omanyingi, iya konyima Josue ankhi. Ankho una omanima 110. Puetyi Josue nomapanga ae ankho vena omuenyo, ovanthu vetavelele ku Yehova. Mahi, etyi ovalume ovo onondalawa vankhia, ovanthu vahimbika okulinga ovipuka ovivi iya avelipake movitateka. Moluotyo, ankho vasukisa ekuateso lia Huku.