ULUETE etyi tyikahi nokupita apa? Ovalume ava omasualali o Isilayeli. Ava vanyongamena pohi vekahi nokunwa omaande. Omulume ou watalama ponthele yavo o Gideão, omukoyesi. Ukahi nokutala oñgeni vekahi nokunwa omaande.

Tala ovalume ava vekahi nokunwa omaande mo nonkhalelo mbelikalaila. Vamue vapaka ovipala viavo momaande. Mahi, omukuavo ukahi nokupola omaande nomaoko, opo apondole okutala etyi tyikahi nokupita kononthele. Otyo ankho tyakolela, mokonda Yehova watolela Gideão aholovone vala ovalume vana valava putyina vanwa. Ovakuavo, Huku wati, vapondola okuenda keumbo. Tutalei omokonda yatyi.

Ova Isilayeli vekahi vali movitateka. Mokonda kavatavelele ku Yehova. Ovanthu voko Midiã vahimbika okuvetumina nokuvemonesa ononkhumbi. Moluotyo, ova Isilayeli veliyava ku Yehova okuita ekuateso, iya Yehova evetehelela.

Yehova watolela Gideão apongiye omafualali, ngotyo Gideão wapongiya 32.000 omafualai. Anthi, onondyale mbavo ankho vena 135.000 omafualali. Mahi Yehova atolela Gideão okuti: ‘Una ovalume ovanyingi.’ Omokonda yatyi Yehova atolela ngotyo?

Omokonda inkha ova Isilayeli vafinda ovita, mavasoko okuti vafinda kononkhono mbavo muene. Ñgeno vasoka okuti kavasukisile vali ekuateso lia Yehova opo vafinde. Moluotyo, Yehova wapopila Gideão okuti: ‘Popila ovalume aveho vokuna ouoma vakondoke keumbo.’ Etyi Gideão evepopila, 22.000 omasualali ae akondoka keumbo. Esala vala no 10.000 ovalume pala okuluisa 135.000 omafualali.

Yehova nkhele ati: ‘Una ovalume ovanyingi.’ Moluotyo, Yehova atumu Gideão atuale ovalume vakanue omaande pokandongi aka. Vana vanyongamena momaande tyina vanwa vekondola keumbo. Yehova walaa okuti: ‘Ame mandyikuavela efindo novalume 300 ankho vekahi nokulava puetyi vanwa.’

Etyi omuvo wokulua wehikapo, Gideão wayapula ovalume vae oviha vitatu. Gideao waavela kese umue onkhwino, nounthenda woluma kumue notyimimi mokati. Etyi tyehika mokati kounthiki, aveho veliseta avapake pokati ovikaka viomafualali onondyale mbavo. Iya aveho kumue avahiki ononkhwino mbavo no kutyatyula ounthenda wavo, avaulula onkhwo okuti: ‘Omutunga wa Yehova nowa Gideão.’ Etyi omasualai onondyale atumphuluka, akala tyangwangwana nokuatila ouoma. Avahimbika okukahateka, iya ova Isilayeli avafindi ovilwa.