UTYII oityi ovanthu ava vekahi nokukoya pohi? Tyituela, tyilinga ngoti omamanya ombila. Mahi hamamanyako ombila, okulia.

Ankho papita vala ohanyi tunde etyi ova Isilayeli vatunda mo Egitu. Ovo ankho vekahi mehoko. Ankho muna vala okulia kwehehi, iya ovanthu avahimbika okupopia okuti: ‘Tuahandele ñgeno Yehova wetuipaelele mo Egitu. Kuna ankho tuna okulia akuho tuhanda.’

Moluotyo, Yehova ati: ‘Mandyilokesa okulia.’ Ngatyo Yehova alinga. Komuhuka etyi ova Isilayeli vapindukapo vamona otyipuka etyi tyituela, avahimbika okulipula okuti: ‘Etyi otyityi?’

Moisesi ati: ‘Etyi okulia Yehova emuavela.’ Ovanthu avekuluku okuti OMANÁ. Ankho kupepa ngo mungome walingua nowiki.

Moisesi apopila ovanthu okuti: ‘Kese munthu akoye etyi tyituuka okulia monthiki. Avalingi ngotyo kese nthiki komuhuka. Iya putyina omutenya wamatokota, omaná isenguluka.

Tupu Moisesi apopi okuti: ‘Muhakoyei omaná pala onthiki onkhuavo.’ Anthi ovanthu vamue kavatavelele. Ove utyii oityi tyapitapo? Etyi tyati komuhuka, omaná aiho vapakele yeyula omativa, nokuanika omapita.

Yehova atolela ovanthu okuti, muna vala onthiki ike mosimano yokukoya omaná pala ononthiki onombali. Onthiki oyo omutano. Yehova wevepopila vapake okulia pala onthiki onkhuavo, mokonda monthiki yotyasapalo kamakukala okulia. Puetyi vapaka omaná pala onthiki yotyasapalo, oyo kayalingile omativa, ni kayanikile omapita. Olio ehuviso ekuavo Yehova alinga.

Omanima aeho ova Isilayeli vakala mehoko, Yehova wevetekula nomaná.