PAPITA omanima nomanima. Omanima 10, omanima 20, omanima 30, omanima 39. Iya ova Isilayeli ankho nkhele vekahi mehoko. Anthi, Yehova watekula ovanthu vae omanima aeho oo. Huku weveavela omaná pala okulia. Komutenya wevehongolela neundu lihitike ekumbi opo kuhatokote, iya kounthiki wevehongolela neundu liotupia. Mokuenda kuomanima oo aeho, ovikutu viavo kaviatandukile iya onomphai mbavo kambaihamene.

Pahe ankho omohanyi yotete yenima 40 tunde apa ova Isilayeli vatunda mo Egitu. Ovaisilayeli ankho vekahi vali po Kades. Pana ankho vali etyi ovalavi 12 vatumua okukalava otyilongo tyo Kanaa. Miriã omphange ya Moisesi wankhila po Kades. Pohika opo ankho pena ovitateka ovinyingi.

Ovanthu ankho vetupu omaande. Moluotyo avahimbika okupopia Moisesi okuti: ‘Inkha tuankhile ñgeno hahe. Omokonda yatyi wetupolela ko Egitu okutueta mohika ino ihasilivila ihena natyike? Itupu ovilia, nomakuyu, nono uva, nono romã, ni vala omaande okunwa.’

Etyi Moisesi na Arau vaya kondyuo ikola pala okukelikuambela, Yehova atolela Moisesi okuti: ‘Ongiya ovanthu aveho. Kala komutue wavo opopila onkhanda oyo, opo mutunde omaande atuuka pala ovanthu novipako viavo aviho.’

Moisesi waongiya ovanthu iya apopi okuti: ‘Tehelelei, onue vokuhena onthumbi mu Huku. Arau naame, okuti matupolo omaande monkhanda ei pala onue? Iya Moisesi avete monkhanda notyimuti ovikando vivali, iya amutundu omaande omanyingi. Ankho pahe vena omaande atuuka pala ovanthu novipako aviho.

Yehova anumanena unene Moisesi na Arau. Utyii omokonda yatyi? Omokonda Moisesi na Arau vapopia okuti ovo mavapolo omaande monkhanda. Mahi, tyotyili o Yehova wapola omaande monkhanda. Mokonda Moisesi na Arau kavatolele otyili, Yehova wevepopila okuti mevehitisa. Yehova apopi okuti: ‘Onue kamamutuala ovanthu vange mo Kanaa.’

Konyima, vatunda po Kades avai alo Komphunda itiwa Hor. Arau, oko ankhila. Etyi ankhia, ankho una 123 omanima. Ovaisilayeli avanumana unene, avemulili ononthiki 30. Iya omona wae Eleazar akala osaserdote yo Isilayeli.