MOMBIMBILIYA muna omukanda utiwa Rute. Muna ehipululo liombunga imue yakaleleko mo Isilayeli pomuvo wovakoyesi. Rute ankho omuhikuena wo kotyilongo tyo Moabe. Ankho kalingi onthele yo Isilayeli, elongo lia Huku. Mahi, etyi Rute elilongesa kombinga ya Yehova, Huku yotyotyili, akala nohole onene na Huku. Noemi ankho omukai umue wakuatesileko Rute okulilongesa kombinga ya Yehova.

Noemi ankho omu Isilayeli. Noemi nomulume wae novana vavo vevali vailukilile kotyilongo tyo Moabe, pomuvo wondyala mo Isilayeli. Onthiki imue omulume wa Noemi ankhi. Konyima yotyo, ovana va Noemi avanepe ovahikuena vevali vomo Moabe ankho vatiwa o Rute na Orpa. Anthi, etyi palamba omanima 10, ovana vevali va Noemi navo avankhi. Noemi novahikuena ovo vevali avanumana unene. Pahe oityi Noemi alinga?

Onthiki imue, Noemi watokola okukondoka kotyilongo tyae. Rute na Orpa vahandele okukala nae. Moluotyo, navo avemulandula. Anthi, etyi vaendapo vala katutu Noemi watalama apopila ovahikuena ovo okuti: ‘Kondokei keumbo, mukakale novo me yenyi.’

Noemi waavela onombesinyu ovahikuena ovo iya evelekela. Ovo avahimbika okulila, mokonda ankho vehole unene Noemi. Iya avati: ‘Au, nonthue matuende noove kotyilongo tyove.’ Mahi, Noemi evekumbulula okuti: ‘Kondokei, vana vange. Hahe muende keumbo.’ Orpa akondoka keumbo, anthi Rute kakondokele.

Noemi watala ku Rute iya ati: ‘Orpa wakondoka. Noove kondoka keumbo na Orpa.’ Anthi, Rute wakumbulula okuti: ‘Wahankhuluminye okukusapo. Yeka ndyende noove. Oku wenda naame oko mandyiende, oku ukakala naame oko mandyikakala. Ovanthu vove mavakakala ovanthu vange, Huku yove makakala Huku yange. Oku ukankhila naame oko mandyikankhila, iya oko mandyikapakwa.’ Etyi Rute apopia onondaka ombo, Noemi kemupopilile vali akondoke keumbo.

Okuhulako, Rute na Noemi vehika mo Isilayeli. Iya omo vakala. Rute ahimbika okuundapa momapia, mokonda ankho omuvo wokuteya otiliku. Mboaz ayeke Rute akapupulule otiliku mepia liae. Ove utyii olie ankho me ya Mboaz? Ankho o Raabe, wo mepundaumbo lio Jerikoo.

Onthiki imue, Mboaz watolela Rute okuti: ‘Ame neiva atyiho kombinga yove, nohole walekesa Noemi. Ndyityii okuti wasapo tate yove na me yove notyilongo tyove, iya weya okukala pokati kovanthu uhei. Yehova akale nokankhenda noove.’

Rute akumbulula okuti: ‘Walekesa ohole onene naame. Pahe ndyiliivite nawa, puetyi wapopia naame nonkhalelo imue ongwa.’ Mboaz ankho uhole unene Rute, iya kapakalele omuvo omunyingi avelinepe. Otyo atyihambukiswa unene Noemi. Mahi, Noemi ahambukwa vali unene etyi Rute na Mboaz vatyita omona wavo wotete utiwa o Obede. Obede akala tate mbwale ya David. Matulilongesa unene kombinga ya David.