OTYIPUKA etyi tyilinga ngoti onyoka yeliwingila kotyimuti. Mahi hanyokako. Onyoka ei yalingwa notyivela. Yehova ankho watolela Moisesi eipake kotyimuti opo ovanthu vapondole okutalako iya avakala nomuenyo. Anthi ononyoka ononkhuavo mbukahi pohi ombotyili. Mbukahi nokunumata ovanthu nokuveetela ouvela. Ove utyii omokonda yatyi?

Omokonda ova Isilayeli vapopia omapita Huku na Moisesi. Vati: ‘Omokonda yatyi wetupolela ko Egitu, opo tunkhile mehoko lino? Muno mutupu okulia ni omaande okunwa. Onthue katuhande vali okulia omaná.’

Anthi, omaná ankho okulia kumue okuwa. Yehova weveavelele omaná nehuviso. Ngetyi evepele omaande nehuviso. Mahi ovanthu kavapandulile onkhalelo omu ankho Huku evetekulila. Moluotyo, Yehova watuma ononyoka ombu pala okuhitisa ova Isilayeli. Ononyoka mbevenumata, iya ovanyingi avankhi.

Konyima, ovanthu veya ku Moisesi iya avati: ‘Tualinga onkhali, mokonda tuapopia omapita Yehova noove. Pahe likuambela ku Yehova opo etupole ononyoka ombu.’

Moluotyo, Moisesi walinga elikuambelo pala ovanthu. Yehova atolela Moisesi alinge onyoka ei yotyivela. Huku wapopila Moisesi eipake kotyimuti, opo kese omunthu wanumatua atale konyoka oyo. Moisesi alingi ngetyi Huku apopia. Iya ovanthu vokuanumatwa vatala konyoka yotyivela avaveluka.

Eli elongeso limue enene pala onthue. Atuho tukahi ngova Isilayeli vana ankho vanumatwa no nonyoka. Atuho tukahi monkhalelo imue yononkhia. Mouye auho, ovanthu vekahi nokukulupa, nokuvela, nokunkhia. Atyiho otyo, omokonda omulume wotete nomukai wotete, Andau na Eva kavatavelele ku Yehova, iya onthue tuvana vavo. Mahi Yehova waava ondyila imue opo tupondole okukala nomuenyo wahapu.

Yehova watumine Omona wae Yesu Kristu pano pohi. Yesu aipaelwa momuti, mokonda ovanthu ovanyingi ankho vasoka okuti ondingavivi. Anthi Yehova waava Yesu opo etuyovole. Inkha tutala mu Yesu, nokulandula onomphai mbae, tupondola okukamona omuenyo wahapu. Mahi, matukelilongesa vali unene kombinga yotyo komutue.