OKAMONA aka hakawako? Enyina liae o Samuele. Iya omulume ou wakuata pomutue wa Samuele, o Elí o saserdote yo Isilayeli. Elkana na Ana ovotate ya Samuele vemueta ku Elí.

Samuele ankho una vala omanima ekuana ine etano. Anthi makala muno mondyuo ikola ya Yehova na Elí nono saserdote ononkhuavo. Omokonda yatyi Elkana na Ana vaetela Samuele okamona okatutu pala okuumbila mondyuo ikola ya Yehova? Tutalei.

Omanima okualamba, Ana ankho wanumana unene, mokonda ankho utupu omona. Ana wahandele unene okutyita omona. Ngotyo, onthiki imue, puetyi Ana akatalelapo ondyuo ikola ya Yehova, welikuambela okuti: ‘Yehova, wahalimbueko kuame. Inkha umpha omona, ame mandyikuavelae opo ekuumbile ononthiki ambuho mbomuenyo wae.’

Yehova wakumbulula elikuambelo lia Ana. Etyi papita onohanyi mbuhehi Ana watyita omona ou Samuele. Ana ankho uhole unene omona wae. Ana ahimbika okumulongesa kombinga ya Yehova etyi ankho nkhele omututu. Atolela omulume wae okuti: ‘Tyina Samuele amakupuka, mandyimutuala kondyuo ikola akaumbile Yehova.’

Etyi otyo Ana na Elkana vekahi nokulinga polutalau olu. Mokonda Samuele ankho walongesua nawa novohe yae, wakala nehambu liokukaumbila Yehova mondyuo yae yakolela. Ana na Elkana, kese enima veya kondyuo ei yakolela pala okufenda no kutalelapo omona wavo. Iya kese enima, Ana wetela Samuele otyikutu tyimue otyipe oe muene alinga.

Samuele watualako okuundapa mondyuo yakolela ya Yehova omanima omanyingi. Iya Yehova novanthu aveho ankho vehole unene Samuele. Ovana va Elí, Hofeni na Fineia ankho kavasilivila. Ankho valinga ovipuka ovinyingi ovivi. Tupu ankho valingisa vakuavo ononkhali ku Yehova. Elí, ñgeno uevepola otyilinga tyou saserdote, mahi ketyilingile.

Samuele kayekele ovipuka ovio ovivi ankho vilingwa mondyuo ikola ya Yehova vimuyapule okuumbila Yehova. Anthi, ovanthu vokuhole Yehova ankho kavehi. Moluotyo papita omuvo omunyingi ankho Yehova kapopi vali nomunthu. Etyi Samuele ekula, papita otyipuka tyimue:

Samuele ankho ulele mondyuo ikola, etyi apahuluapo nondaka imue yemuihana. Samuele akumbulula okuti: ‘ Ame uno.’ Samuele apindukapo akahatekela ku Elí, ati: ‘Wandyihana, ame uno.’

Mahi Elí akumbulula okuti: ‘Ame hekuihanene; kondoka poula.’ Samuele akondoka poula.

Iya ondaka aiihana otyikando tyavali okuti: Samuele. Samuele apindukapo akahatekela ku Elí. Ati: ‘Wandyihana, ame uno.’ Anthi Elí akumbulula okuti: ‘Ame hekuihanene mona wange, kalangalepo.’ Samuele akondoka poula.

Ondaka yaihana otyikando tyatatu okuti: ‘Samuele.’ Samuele akahatekela ku Elí. Iya ati: ‘Otyikando etyi wandyihana ame uno.’ Pahe Elí anoñgonoka okuti o Yehova ukahi nokumuihana. Moluotyo, watolela Samuele okuti: ‘Enda ukalangalepo, inkha ekuihana vali, tavela okuti: “Popia Yehova, omuumbili wove ukahi nokutehelela.”’

Etyi Yehova emuihana vali, Samuele apopi ngetyi Elí emutolela. Iya Yehova atolela Samuele okuti mahitisa Elí novana vae. Konyima, Hofeni na Fineia vankhia puetyi ankho valwa nova Filisteu. Elí, etyi etyiiva watoka ongali, ateke ehinga iya nae ankhi. Ngotyo, ondaka ya Yehova yafuisuapo.

Samuele wekula, iya akala omukoyesi wahulako mo Isilayeli. Etyi akulupa, ovanthu vemuita okuti: ‘Holovona ohamba imue opo itutumine.’ Samuele kahandele okulinga otyipuka otyo, mokonda tyilityili ohamba yavo o Yehova. Anthi Yehova watolela Samuele atehelele ovanthu.