KONYIMA yonohanyi onombali tunde puetyi vatunda ko Egitu, ova Isilayeli vehika Pomphunda yo Sinai, tupu itiwa Horebe. Pomphangu oyo opo Yehova apopilile na Moisesi motyinkhondo tyokuatema. Ovanthu avakala opo ononthiki mbumue.

Moisesi walonda komphunda, iya ovanthu avesala nokukevelela. Etyi ehika komphunda, Yehova watolela Moisesi okuti ndyihanda ova Isilayeli vanthavele opo vakale ovanthu Vange vakolela. Etyi Moisesi atuluka, watolela ova Isilayeli etyi Yehova apopia. Iya ovanthu avakumbulula okuti matutavela Yehova, mokonda tuahanda okukala ovanthu vae.

Pahe Yehova alingi otyipuka tyimue tyihuvisa. Konthongo nthongo yomphunda akuhimbika okutunda omuihi, nokutitima unene. Yehova apopila tupu ovanthu okuti: ‘Ame Yehova Huku yenyi nemupola ko Egitu.’ Iya konyima atumu okuti: ‘Fendei vala ame, muhafendei onohuku ononkhuavo.’

Huku aavela vali ova Isilayeli ovitumino etyive. Ovanthu avakala unene nouoma. Avatolela Moisesi okuti: ‘Popia ove nonthue, mokonda tuna ouoma wokuti inkha Huku apopia nonthue tupondola okunkhia.’

Konyima, Yehova atolela Moisesi okuti: ‘Endyu kuno komphunda. Mandyikuavela omamanya evali omanthanda, oku nahoneka ovitumino nahanda ovanthu veviundapese.’ Moisesi alondo vali komphunda. Akalako ovitenya 40 novinthiki 40.

Huku ankho una ovitumino ovinyingi pala ovanthu vae. Moisesi ahoneka ovitumino ovio. Tupu Huku waavela Moisesi omamanya evali omanthanda. Komamanya oko, Huku wahonekako ovitumino 10 apopilile ovanthu aveho. Ankho vitiwa Ovitumino Ekwi.

Ovitumino Ekwi viakolela. Mahi novitumino ovikuavo Huku aavela ova Isilayeli viakolela. Pokati kovitumino ovio, tyimue tyati: ‘Una yokukala nohole na Yehova Huku yove nomutima wove auho, no nondunge mbove ambuho, nomuenyo wove auho, no nonkhono mbove ambuho.’ Otyikuavo tyati: ‘Una yokukala nohole no omunthele yove ngetyi ove muene ulihole.’ Omona wa Huku, Yesu Kristu, wati: Evi ovio ovitumino vivali ovinene vali Yehova aavela ovanthu vae o Isilayeli. Komutwe matukelilongesa ovipuka ovinyingi kombinga yo Mona wa Huku, nomalongeso ae.