ETYI David ahimbika okutumina mo Jelusalei, Yehova wakuatesako omasualali ae okufinda onondyale mbavo, ovikando ovinyingi. Yehova ankho walaele okuavela ova Isilayeli otyilongo tyo Kanaa. Ngotyo, nekuateso lia Yehova otyilongo atyiho, atyilingi tyavo.

David ankho omutumini umue omuwa. Ankho uhole Yehova. Ngotyo, etyi David atambula o Jelusalei, otyipuka atetekela okulinga, okueta otyikasa tyomphango tya Yehova mo Jelusalei. Iya ahande okutunga ondyuo ya Huku opo apakemo otyikasa otyo tya Yehova.

Etyi David alinga omukulu, walinga otyipuka tyimue otyivi unene. David ankho utyii okuti tyapenga okupola otyipuka tyamuene. Mahi, onthiki imue kokangulohi, ankho ukahi nokuendaenda mombala yae. Iya amono omukai umue omuwa unene. Enyina liomukai oo, o Bateseba. Omulume wae ankho esualali lia David, litiwa o Uria.

David ankho wahanda unene Bateseba, atumu okumueta mombala yae. Omulume womukai oo, ankho ukahi kovita. Iya David alangalapo na Bateseba. Konyima Bateseba weliiva okuti omunthimba. Otyo atyisukalalesa unene David. Iya atumu omukanda ku Joabe onkhalamutue yomasualali ae, opo apake Uria komutue wovita ovinene opo aipawe. Etyi Uria ankhia, David anepe Bateseba.

Yehova anumana unene na David. Moluotyo, watuma omuumbili wae Natã akapopile David kombinga yonkhali oyo. Natã oyou tala ukahi nokupopia na David. David elivele unene mokonda yonkhali oyo alinga. Moluotyo, Yehova kemuipaele. Mahi, Yehova ati: ‘Mokonda yotyipuka otyo otyivi walinga, mokakala novitateka ovinyingi meumbo liove.’ Iya David akala tyili novitateka ovinene.

Tete, omona wavo na Bateseba wankhia. Konyima yotyo, otyiveli tya David Amnon, wakuata omphange yae Tamar kononkhono, alangalapo nae. Omona omukuavo wa David Abesalau, anumana unene mokonda yetyi tyalinga Amnon, iya emuipaa. Konyima Abesalau apandua novanthu ovanyingi, iya elipake kouhamba. Mahi, Abesalau aipawa movilwa ankho akatulila tate yae. Iya David afindi ngotyo ovita ovio. Enga, David wapita mononkhumbi ononyingi.

Mokuenda kuatyiho otyo, Bateseba atyiti omona omulume utiwa o Salomau. Etyi David akulupa, ankho ukahi nokuvela, iya omona wae Adonia elipake kouhamba. Mahi, David atumu o saserdote ankho utiwa o Zadoke, apake omulela pomutwe wa Salomau. Okulekesa okuti o Salomau malingi ohamba. Etyi pakala katutu David ankhi. Ankho una omanima 70. Watumina omanima 40. Mahi, pahe Salomau alingi ohamba yova Isilayeli.