OLUTALATU olu lulekesa ouye omupe, ngauna Huku alekesile omuuli wae Isaia. Isaia ankho waliko konyima yononkhia mba Jona.

Opalaisu, ‘ouye omupe’ ine ‘otyikunino.’ Omphangu ei kaiku-​hinangelesa otyipuka tyimue wamonale momukanda ou? Yelifwa unene notyikunino tyina otyiwa Yehova alingile pala Andau na Eva. Ine hatyoko? Mahi, onthiki imue oohi maikakala omphangu yombembwa?

Yehova watuma omuuli wae Isaia, opo ahoneke kombinga youye omupe ine opalaisu, yovanthu va Huku. Isaia wati: ‘Omahunyu no nongi mavikakala kumue nombembwa. Ononthane mambukalia kumue noviketa viononkheyama. Iya avikaliswa nokamukuendye. Olukembe inkha lukanyana nonyoka, kaikemulinga omapita.’

Ovanthu ovanyingi vati: ‘Otyo katyivilwa. Mokonda apeho kombanda yoohi kuna vala ononkhumbi. Iya ononkhumbi ombu mambukakalako apeho.’ Pahe nkhele sokolola: Eumbo patyi Huku apele Andau na Eva?

Huku wapakele Andau na Eva mopalaisu, omphangu imue yombembwa. Vavombesa vala eumbo liavo olio eewa, mokonda kavetavelele ku Huku. Moluotyo, vakulupa iya avankhi. Mahi, Huku walaa okuti makaavela ovanthu vana vemuhole, ovipuka aviho Andau na Eva vavombesa.

Mouye omupe ine omopalaisu, natyimue matyikalingwa omapita, ine okunyonwa. Mamukakala ombembwa yotyotyili. Ovanthu aveho mavakakala nekongoko nehambu. Matyikakala ngetyi ankho Huku ahandele ponthyimbi. Matukelilongesa oñgeni Huku makaeta onkhalelo oyo.