OVE utyii ovalie ovalume ava? Utyii oityi vekahi nokulinga? Vekahi nokuenda kovita. Iya ovalume veli komutue, vekahi nokuimba. Mahi, ove upondola okupula okuti: ‘Omokonda yatyi ovanthu ava vekahi nokuimba vahatyindile omitunga no maonga okukalwa? Tutalei.

Jeosafa ankho ohamba yomihoko vivali vio Isilayeli, pomuvo wa Jezabele na Akabe Ohamba yomihoko 10 vio Isilayeli. Mahi, Jeosafa ankho ohamba imue ongwa. Tupu Asa, tate ya Jeosafa ankho wali ohamba ongwa. Moluotyo, ovanthu vomihoko vivali, ankho vena omuenyo omuwa.

Mahi, ankho pena otyipuka tyimue tyaetesa ovanthu ouoma. Jeosafa watolelua okuti: ‘Omafualali omanyingi oko Moabe, noko Amom no Komphunda yo Seir, ekahi nokuiya okukulwisa.’ Moluotyo, ova Isilayeli ovanyingi veliongiya mo Jelusalei, okuovola ekuateso ku Yehova. Avaende kondyuo ya Huku, iya Jeosafa elikuambela okuti: ‘Yehova Huku yetu, onthue katutyii oityi matulingi. Tutupu epondolo liokulwisa omafualali omanyingi ngoo. Tukahi nokuita opo utukuateseko.’

Yehova evetehelela. Iya atumu omuumbili wae opo apopile ovanthu okuti: ‘Ovilwa evi havienyiko, ovia Huku. Onue kamamulu. Talei vala oñgeni Yehova memuyovola.’

Ngotyo, etyi kuatya Jeosafa watolela ovanthu okuti: ‘Yumbei onthumbi mu Yehova.’ Atumu ovalume vokuimba vapite komutue womasualali, opo vaende nokuimba oviimbo vinkhimaneka Yehova. Utyii oityi tyapita puetyi vehika popepi no nondyale mbavo? Yehova wapaka ondyaya pokati komafualali onondyale mbavo. Aahimbika okuliipaa oo muene. Etyi ova Isilayeli vehika, vavasa vala omafualali aeho onondyale mbavo ankhia.

Jeosafa kalingile onondunge, okuyumba onthumbi mu Yehova? Nonthue matukala ovanandunge, inkha tuyumba onthumbi mu Yehova.