OVE utyii oityi omukainthu ou ekahi nokupopia? Ukahi nokutolela omukai ou, kombinga ya Eliseu omuuli wa Yehova. No kombinga yovipuka vihuvisa Eliseu alinga nekuateso lia Yehova. Omukai ou kei natyike kombinga ya Yehova, mokonda hamu Isilayeli ko. Mahi, tutalei oñgeni omukainthu ou eya meumbo liomukai ou.

Omukai ou owo kotyilongo tyo Siria. Omulume wae o Naamã, onkhalamutue yomafualali o Siria. Omafualali o Siria, akuata omukainthu ou omu Isilayeli, avemueta komukai wa Naamã opo alinge omuundapi wae.

Naamã ankho una ouvela umue omuvi utiwa otyilundu. Ouvela oo, unyona olutu luomunthu, nominwe uvitokesako. Ngotyo, omukainthu ou ukahi nokupopila omukai wa Naamã okuti: ‘Ame nahandele ñgeno omuhona wange wenda komuuli wa Yehova ko Isilayeli. Opo ekemuhakule otyilundu tyae.’ Iya avetyitolela Naamã.

Naamã ankho wahanda unene okuhakulwa. Moluotyo, atokola okuenda ko Isilayeli. Etyi ehika ko Isilayeli, aende kondyuo ya Eliseu. Eliseu watuma omuundapi wae apopile Naamã okuti, kelikohe Menyana lio Jordau ovikando epanduvali. Otyo tyanumanesa unene Naamã, iya ati: ‘Omanyana o kotyilongo tyetu omawa vali tyipona kese enyana mo Isilayeli. Etyi amana okupopia onondaka ombo aende.

Mahi, omuundapi umue apopila Naamã okuti: ‘Tatekulu, inkha Eliseu ekutumine okulinga otyipuka tyimue tyepuiya, ñgeno wetyilinga. Omokonda yatyi kukelikohela vala ngetyi Eliseu apopia?’ Naamã etavela komuundapi wae, aende okukanyingila onthuitwi mo Jordau ovikando epanduvali. Etyi atundamo ohitu yae aiho ikahi nawa, waveluka.

Naamã ahambukwa unene. Akondoka ku Eliseu, emupopila okuti: ‘Pahe ndyityii nawa okuti Huku yova Isilayeli, oe vala Huku yotyotyili ouye auho. Moluotyo, mbambavo tambula otyiawa etyi nekuetela.’ Mahi, Eliseu akumbulula okuti: ‘Au, ame himatambula.’ Eliseu ankho utyii okuti tyapenga okutambula ofeto, mokonda o Yehova wavelula Naamã. Mahi, Geazi omuundapi wa Eliseu, ankho uhanda ovipuka ovio.

Moluotyo etyi Naamã apita, Geazi wahatekela monyima yae, ati: Eliseu wanthuma umuavele oviawa vimue, pala ovaenda vae veya okumutalelapo.’ Otyo ankho ounkhembi. Mahi, Naamã ankho ketyii okuti ounkhembi. Iya emuavela.

Etyi Geazi akondoka keumbo, Eliseu ankho utyiiale etyi akalingile. Mokonda ankho Yehova wemutolelatyo. Moluotyo Eliseu apopila Geazi okuti: ‘Mokonda yotyipuka otyo otyivi walinga, pahe mokala notyilundu tya Naamã.’ Iya liwa liwa akala notyilundu.

Oityi tupondola okulilongesila kuotyo atyiho? Tete, tyitulongesa okuti tuna yokulinga ngomukainthu oo, okupopila ovanthu kombinga ya Yehova. Mokonda otyo tyipondola okukuatesako ovanthu. Vali, katupondola okukala nomalityindailo nga Naamã potete. Mahi, tuna yokutavela kovaumbili va Huku. Tatu, katupondola okukemba ngetyi tyalingile Geazi. Okutanga Ombimbiliya katyitulongesa ovipuka ovinyingi?