OVA Filisteu ankho veya vali okulwisa ova Isilayeli. Ovakulu va David vetatu ankho omasualali a Saulu. Onthiki imue Jesse watolela David okuti: ‘Pola okulia no nombolo utuaile ovakulu vove. Otale oñgeni vekahi.’

Etyi David ehika pokapamendu komafualali, akahatekela komutete womasualali ankho elipongiya pala okulwa. Opo akaovole ovakulu vae. Goliya omu Filisteu umue omunene ankho weya okulinga omukuele ova Isilayeli. Omulume oo ankho ulinga ngotyo ononthiki ambuho, komuhuka no kekumbi. Wetyilinga ononthiki 40. Ankho upopia peulu okuti: ‘Holovonei omulume umue eye okulwa naame. Inkha amandyipaa, onthue matukala ovapika venyi. Mahi, inkha ame nemuipaa, onue mamulingi ovapika vetu. Ndyimuleva umue okuti holovonei omulume eye okulwa naame.’

David apulu kesualali limue okuti: ‘Omunthu maipaa omu Filisteu oo, nokuyovola ova Isilayeli molukundo olu, oityi mafetwa?’

Esualali aliti: Saulu memupe emona enyingi. Tupu memuavela omona wae omuhikuena opo alinge omukai wae.’

Mahi, ova Isilayeli aveho ankho vena ouoma na Goliya, mokonda ankho omunene unene. Tupu ankho omule unene. Ankho una onometulu o 3. Tupu ankho una efualali ekuavo limutyindilako otyiyakulilo tyae.

Omasualali amue aakapopila Ohamba Saulu, okuti David wahanda okukalwa na Goliya. Anthi, Saul atolela David ati: ‘Ove kupondola okulwisa omu Filisteu oo. Umona omututu. Omu Filisteu oo, efualali tunde kohale.’ David akumbulula okuti: ‘Ame naipaa ehunyu nonkheyama, ankho viahandele okulia onongi mba tate. Iya omu Filisteu oo, ndyikemuipaa vala ngetyi nai-​paa omanyama oo. Yehova ma-​nkhuatesako.’ Moluotyo, Saulu ati: ‘Enda, Yehova ekukuateseko.’

David walauka pokandongi kamue, akoyopo omamanya etano ekahi nawa, eepake mokasako kae. Apolo otyifuta tyae, aende okukelivasa nomulume oo omunene. Etyi Goliya emumona ahimbika okuyola. Ankho Goliya wasoka okuti katyipuiya okuipaa David.

Goliya ati: ‘Endyu vala kuno. Ohitu yove hono mandyiave koviila no kovinyama opo vilie.’ Anthi, David ati: ‘Ove ukahi nokuiya kuame nomutunga, neo-​nga. Mahi, ame ndyikahi noku-iya kuove menyina lia Yehova. Onthiki yohono Yehova mekuave pomaoko ange, iya ame mandyi-​kuipaa.’

Ngotyo, David akahateka noku Goliya. Apolo emanya mokasako kae, elipake motyifuta, iya eliyumbu no nonkhono mbae ambuho. Emanya olio alikaveta mombamba ya Goliya. Goliya atokela pohi, iya ankhi. Etyi ova Filisteu vamona okuti onkhalamutue yavo yankhia, aveho avahimbika okukahateka. Ova Isilayeli avahatekela monyima yavo, iya avafindi ovita.