INKHA ñgeno ove wankhia, iya opindukapo vali, me yove ukala ñgeni? Mahambukwa unene. Mahi, omunthu wankhia upondola okupindukapo vali? Okuti lumue tyamonekeliale?

Tala omulume ou, nomukai ou, no kamukuendye aka polutalatu apa. Omulume ou, omuuli wa Huku utiwa o Elia. Omukai ou omuhepe woko Salefa, iya okamukuendye aka omona wae. Onthiki imue omona ou wavela. Watualako nokuvela unene alo ankhia. Iya Elia apopila omukai ou okuti: ‘Eta kuno omona.’

Elia watyinda omona oo aede nae mondyuo yae, emulangeka koula. Elikuambela okuti: ‘Yehova mbambavo pindulapo omona ou.’ Iya omona ahimbika okufuima. Elia emukondola ku me yae, emupopila okuti: ‘Tala omona wove una omuenyo.’ Otyo me yae ahambukilwa unene.

Omuuli omukuavo wa Yehova ankho wakolela, o Eliseu. Eliseu ankho omukuatesiko wa Elia. Tupu Yehova waundapesa Eliseu pala okulinga omahuviso. Onthiki imue, Eliseu wapita kepundaumbo lio Sunei, avasiko omukai umue walekesa Eliseu onkhenda onene. Konyima omukai oo akutula okamukuendye.

Onthiki imue etyi omona oo ekula, walandula tate yae ankho ukahi nokuundapa kepia. Iya oko omona ahimbika okuliyavela okuti: ‘Omutwe wange wihama.’ Iya emutuala keumbo. Konyima omona ankhi. Me yae anumana unene. Mahi, akanyauka okukaihana Eliseu.

Etyi Eliseu ehika, wanyingila mondyuo ankho mukahi omona oo wankhia. Elikuambela ku Yehova, iya alangala kombanda yomona oo wokuankhia. Olutu luomona aluhimbika okutokota, iya omona atu ononthesi ovikando epanduvali. Etyi me yae eya wavasa omona wae una omuenyo, ahambukwa unene.

Otyinyingi tyovanthu tyankhia. Otyo tyanumanesa unene onombunga mbavo, no mapanga avo. Onthue tutupu epondolo liokupindulapo ovanthu vokuankhia. Mahi, Yehova una epondolo. Komutue matukelilongesa oñgeni, Yehova makapindulapo ovanthu ovanyingi vokuankhia.