ETYI nkhele David ehenenkhie, watolela Salomau oñgeni ondyuo ya Yehova ina yokutungwa. Menima liakuana lioutumini wae, Salomau ahimbika okutunga ondyuo ya Huku. Yatungwa omanima epanduvali nomeya, iya aipu. Yatungwa novanthu ovanyingi. Tupu yapesela onombongo ononyingi unene. Mokonda yatungwa no olu onyingi, no palata onyingi.

Ondyuo oyo ya Huku, ankho yatetwa onondyuo mokati. Ankho ina onondyuo onombali mbakolela, nga mbuna ankho mbukahi mekaka lia Huku (tabernáculo). Mahi, onondyuo ombu ankho ononene vali, tyipona mbuna mbekaka. Salomau watuma okupaka otyikasa tyomphango tya Huku, mondyuo yakolela vali. Iya ovipuka ovikuavo ankho vikala mekaka lia Huku, evipake mondyuo onkhuavo mokati kondyuo ya Huku.

Etyi ondyuo ya Huku yapwa okutungwa, kualingwa otyipito tyimue otyinene. Salomau watuika konongolo elikuambela ngetyi weete polutalatu apa. Salomau wapopila Yehova okuti: ‘Eulu heneneko opo ufuemo. Pahe mondyuo ei onthutu mofumo ñgeni? Mahi, Huku yange mbambavo tehelela ovanthu vove putyina velikuambela mondyuo ino.’

Etyi Salomau amana okulikuambela, peulu patunda otupia, atuyoko ovinyama viotyilikutila ankho viapongiywa. Ondyuo ya Huku, aiho aiyula otyitei tya Yehova. Otyo tyalekesa okuti Yehova ankho ukahi nokutehelela. Ankho wahambukua nondyuo oyo ikola, nelikuambelo lia Salomau. Ngotyo, ondyuo oyo ya Huku yalinga omphangu omu ovanthu ankho veya okufendela.

Salomau watumina nounongo omanima omanyingi. Moluotyo, ovanthu ankho vena ehambu enene. Anthi, Salomau wahimbika okunepa ovakai ovanyingi vovilongo ovikuavo, viahafende Yehova. Tala omukai umue ukahi nokufenda otyilolo polutalatu olu? Okuhulako ovakai va Salomau, vemuyapula, ahimbika oku-​fenda ono huku ononkhuavo. Utyii oityi tyapitapo, etyi Salomau alinga ngotyo? Ankho katekula vali ovanthu noluembia. Walinga ondingavivi, iya ovanthu ankho vetupu vali ehambu.

Yehova anumana unene na Salomau, iya emupopila okuti: ‘Ame mandyikupolo ouhamba, andyiuavela omunthu omukuavo. Himetyilingi pononthiki mbove. Mandyityilingi mouhamba womona wove. Mahi, himapolo ovanthu aveho mouhamba womona wove.’ Tutalei oñgeni otyo tyaenda.